Philemon 1

¹NĨ niĩ Paulo, njohetwo nĩ ũndũ wa Kristo Jesu, o na Timotheo, mũrũ wa Ithe witũ, twagũtũmĩra marũa maya, wee Filemona, ũrĩa twendete mũno, na ũtũire ũrutaga wĩra o ũndũ ũmwe na ithuĩ,

²na tũgatũmĩra Apufia, mwarĩ wa Ithe witũ, o nawe Arikipo, o wee ũrũagĩrĩra Ũhoro wa Ngai hamwe na ithuĩ, o na andũ a kanitha ũrĩa ũrĩ gwaku mũciĩ.

³Mũrogĩa na Wega o na thayũ, ciumĩte kwĩ Ngai Ithe witũ, o na Mwathani Jesu Kristo.

⁴Atĩrĩrĩ, rĩrĩa ngũgwetaga mahoya-inĩ makwa-rĩ, nĩnjokagĩria Ngai wakwa ngatho hĩndĩ ciothe,

⁵nĩ ũndũ wa kũigua ũrĩa ũtũire wendaga na ũkehoka Mwathani Jesu, o na andũ arĩa othe aamũre.

⁶Na nĩ’hoyaga atĩ ngwatanĩro ĩo yao, yumanĩte na wĩtĩkio waku, ĩgĩe na ũhoti wa kũmahotithia kũmenya mawega mothe marĩa monekaga kũrĩ ithuĩ nĩ ũndũ wa Kristo.

⁷Nĩ gũkorũo nĩ gũkena ngenete mũno na ngomĩrĩrio ngoro nĩ ũndũ wa wendani waku, kuona atĩ ngoro cia andũ arĩa aamũre nĩicanjamũrĩtwo nĩwe, wee mũrũ wa Ithe witũ.

⁸Hakĩrĩ ũguo-rĩ, o na ndahota kũũmĩrĩria gũgwatha, nĩ ũndũ wa Kristo, atĩ wĩke ũrĩa wagĩrĩire-rĩ,

⁹ndenda kaba ngũthaithe ũwĩke nĩ ũndũ wa wendani. Ũguo noguo niĩ Paulo, ndĩ mũthuri mũkũrũ, na rĩu ndĩ muohe nĩ ũndũ wa Kristo Jesu-rĩ,

¹⁰ngũgĩgũthaitha nĩ ũndũ wa mwana wakwa ũrĩa njiarĩire gũkũ kĩoho-inĩ, nĩwe Onesimo.

¹¹Nake tene ndaarĩ na kĩene harĩ wee, no rĩu nĩ mũndũ wĩ na kĩene harĩ wee o na harĩ niĩ.

¹²Nake nĩwe ũyũ ndamũcokia kũrĩ wee, na no ta gũtũma ndagũtũmĩra ngoro yakwa mwene.

¹³Na nĩingĩendete tũikare nake, nĩ getha andungatagĩre ithenya rĩaku kĩoho-inĩ gĩkĩ njohetwo nĩ ũndũ wa Ũhoro-ũrĩa-Mwega.

¹⁴Ĩndĩ ndirĩ ũndũ o na ũrĩkũ ingĩĩka itoĩ ũrĩa ũngĩenda, nĩ getha wega ũrĩa ũngĩĩka ndũgagĩtuĩke wa kũringĩrĩrio, no ũtuĩke wa kwĩendera.

¹⁵Tondũ no gũkorũo gĩtũmi kĩrĩa kĩratũmire eherio kũrĩ wee kahinda no getha, aarĩkia gũgũcokerera, mũtũũranie nake o tene na tene;

¹⁶na ningĩ atĩ ndagacoke arĩ o ngombo, tiga o akĩrĩte ngombo, acoke arĩ mũrũ wa Ithe witũ mwende mũno. Na rĩrĩ, akorũo nĩ mũndũ mwende mũno nĩ niĩ-rĩ, githĩ ndaagĩrĩirũo nĩ kwendwo nĩwe mũno makĩria ũhoro-inĩ wa mwĩrĩ, o na wa Mwathani?

¹⁷Tondũ wa ũguo, ũngĩkorũo nĩũtuaga atĩ tũrĩ rũmwe nawe, mwĩtĩkĩre o ta ũrĩa ũngĩnjĩtĩkĩra niĩ mwene.

¹⁸Nake angĩkorũo nĩagwĩkĩte ũũru o na ũrĩkũ kana hihi arĩ na thirĩ waku-rĩ, ũwandĩke ũtuĩke wakwa.

¹⁹Nĩ niĩ Paulo ndaandĩka na guoko gwakwa mwene atĩrĩ, niĩ nĩ niĩ ngarĩha thirĩ ũcio: ndingĩkĩenda kũgweta thirĩ witũ nawe, o ũrĩa wa muoyo waku.

²⁰Ĩĩ, nĩguo, mũrũ wa Ithe witũ, reke nyone ũteithio uumĩte kũrĩ wee thĩinĩ wa Mwathani: ta njanjamũra ngoro, ndĩ o thĩinĩ wa Kristo.

²¹Ngũkwandĩkĩra marũa maya ndĩĩhokete atĩ ndũngĩnema, na ngamenya atĩ nĩũgwĩka maũndũ macio njugĩte, o na ũkĩrĩrĩrie.

²²Hamwe na ũguo-rĩ, ’thondekera handũ ha gũikara: amu nĩnjĩrĩgĩrĩire atĩ nĩndĩrĩĩtĩkĩrio njũke kũrĩ inyuĩ, nĩ ũndũ wa mahoya marĩa mũ’hoyagĩra.

²³Epafara, ũrĩa tuohetwo ũndũ ũmwe nake nĩ ũndũ wa Kristo Jesu, nĩaakũgeithia;

²⁴nao aa Mariko na Arisitariko, na Dema, na Luka, arĩa tũrutithanagia wĩra nao, nĩmaakũgeithia o nao.

²⁵Wega wa Mwathani witũ Jesu Kristo ũrogĩa na maroho manyu. Amen.