Titus 3

¹MARIRIKANAGIE atĩ maathĩkagĩre anene na andũ arĩa maathanaga, na mamaiguage, na maikarage mehaarĩirie kũruta wĩra o wothe mwega,

²ningĩ matikanacambie mũndũ, kana mogitanage, no nĩmatuĩke acayanĩrĩri, na monagie andũ othe mĩtugo ya ũhoreri.

³Nĩ ũndũ kwarĩ hĩndĩ o na ithuĩ twarĩ akĩgu, na twarĩ aremi, na tũkahenekaga; twarĩ ngombo ciohetwo nĩ merirĩria moru na maũndũ ma gwĩkenia ma mĩthemba mĩingĩ, na twatũire tũiganagĩra muku na tũkaiguanagĩra ũiru, ningĩ tũgathũũrũo, o na tũgathũũrana o mũndũ na mũndũ ũrĩa ũngĩ.

⁴Ĩndĩ rĩrĩa ũtugi wa Ngai Mũhonokia witũ naguo wendani ũrĩa endete andũ naguo ciaguũkire-rĩ,

⁵nĩ kũhonokia aatũhonokirie, ti tondũ wa ciĩko iria twekaga ithuene cia gwĩtua athingu, no nĩ ũndũ wa tha ciake, nĩ gũtũthambia o gũthambio kũrĩa gũtũmaga mũndũ aciarũo rĩngĩ na erũhio na Roho Mũtheru.

⁶Na nĩ Roho ũcio aatũitĩrĩirie na ũtana na ũndũ wa Jesu Kristo Mũhonokia witũ,

⁷nĩ getha tũtuwo athingu nĩ ũndũ wa Wega wake, na agai a gũkagaĩrũo muoyo ũrĩa ũtagathira, kũringana na ũrĩa tũtũire tũwĩrĩgĩrĩire.

⁸Ũhoro ũcio nĩ wa kwĩhokeka; ngũkĩenda waragie ũhoro wa maũndũ macio ũmagwatĩirie, nĩ getha andũ arĩa metĩkĩtie Ngai mekagĩre kĩyo gĩa kwĩmenyeria kũrutaga mawĩra mega. Maũndũ macio nĩ mega na nĩ ma kũguna andũ.

⁹No rĩrĩ, themaga maũndũ marĩa moranganagio na ũrimũ, na ũhoro wa njiarũa, na ngarari, na kũrũĩra maũndũ ma watho; nĩ ũndũ matirĩ na uumithio marehage, na nĩ ma tũhũ.

¹⁰Na ha ũhoro wa mũndũ wĩtĩkĩtie ũrutani mũhĩtanu-rĩ, warĩkia kũmũkaania hĩndĩ ya mbere na ya kerĩ, regana nake:

¹¹ũkĩmenyaga atĩ mũndũ ũrĩa ũtariĩ ũguo nĩ mũgariũkanu na akahĩtia, nake nĩ gwĩtuĩra etuĩrĩire cira atĩ nĩ mwĩhia.

¹²Atĩrĩrĩ, ndatũma Aritema kana Tukiko kũrĩ wee, geria na kĩyo gũũka kũrĩ niĩ o kũrĩa Nikopoli: tondũ nĩkuo nyonete arĩ wega atĩ njikare hĩndĩ ya heho.

¹³Zena ũrĩa wakiri, na Apolo-rĩ, ũmohere rũgendo na kĩyo, nĩguo matikae kwaga kĩndũ.

¹⁴Nao andũ aitũ-rĩ, nĩmakĩĩmenyerie kũrutaga mawĩra mega, nĩguo mateithanagie kwagĩa na mabata marĩa matangĩtigĩka, nĩ getha matigatuĩke ta mathatĩte ũhoro-inĩ wa gwĩkaga wega.

¹⁵Andũ arĩa othe tũrĩ nao nĩmaakũgeithia. Wee nawe ũgeithie andũ othe arĩa matwendete, me rũmwe na ithuĩ ũhoro-inĩ wa gwĩtĩkia. Wega wa Ngai ũrogĩa na inyuĩ inyuothe.