Proverbs 11

¹Ratiri ya kũhenania nĩ kĩndũ kĩĩ magigi harĩ Jehova, ĩndĩ ihiga rĩa gũthima, rĩrĩa rĩa ũigananu, nĩ kũrĩkenera arĩkenagĩra.

²Gwoka mwĩgerero, norĩo gũũkaga njono, ĩndĩ ũũgĩ wĩ na arĩa mateĩkĩrĩire.

³Andũ arĩa arũngĩrĩru, wĩkindĩru wao nĩ kuonia ũmonagĩrĩria njĩra, ĩndĩ arĩa mĩgarũka, ũhong’oku wao nĩ wa kũmaninithia.

⁴Ũtonga ndũrĩ kũguna ũngĩgunana mũthĩ ũrĩa wa matũkũya, no ũthingu nĩũteithũraga mũndũ harĩ gĩkuũ.

⁵Mũndũ ũrĩa mũkinyanĩru, ũthingu wake nĩũmũrũngagĩra njĩra, no ũrĩa mwaganu, waganu wake mwene nĩguo ũkamũgũithia.

⁶Ũthingu wa arĩa arũngĩrĩru nĩ kũmateithũra ũrĩmateithũraga, no andũ arĩa matuĩkaga mĩgarũka nĩ kũgwatio makagwatio nĩ ũthũkia ũcio wao.

⁷Mũndũ mwaganu aakua, kĩĩrĩgĩrĩro gĩake nĩ gũtoma gĩtomaga; itanya rĩa acio eki waganu no gũthira rĩthiraga.

⁸Ũrĩa mũthingu nĩatharagwo mĩnyamaro-inĩ, ũrĩa mwaganu agoka ho ithenya rĩake.

⁹Mũndũ ũtatĩĩte Ngai aaninithia mũndũ wa itũũra rĩao na kanua, ĩndĩ andũ arĩa athingu nĩmetharaga nĩ ũrĩa me na ũmenyi.

¹⁰Rĩrĩa arĩa athingu maragaacĩra, itũũra nĩ gũkena rĩkenaga, na rĩrĩa arĩa aaganu marathira, nĩ kũrũhio kũrũhagio.

¹¹Tondũ wa kĩrathimo kĩa andũ arĩa athingu, itũũra nĩ gũtũũgĩrio rĩtũũgĩragio, no kanua ka andũ arĩa aaganu nĩ kũrĩng’aũrania karĩng’aũranagia.

¹²Mũndũ kũrurũka ũrĩa ũngĩ nĩ wĩcirio atarĩ, no mũndũ mũtaũku nĩ gũkira ekiragĩra.

¹³Mũcangi na ndeto cia mũhuhu nĩatuhũraga maũndũ ma ndundu, ĩndĩ mũndũ wa ngoro njĩhokeku nĩ gũkira akiraga namo.

¹⁴Kũndũ gũtarĩ mĩtabarĩre mĩega, kĩrĩndĩ kĩa bũrũri nĩ kũgũa kĩgũaga, no kũrĩa kwĩ aheani aingĩ a kĩrĩra gũtũũraga kwĩgangarĩte.

¹⁵Ũrĩa ũtuĩkĩte ithenya rĩa mũndũ mũgeni no agatuurũo, ĩndĩ ũrĩa ũregaga gũtuĩka ithenya rĩa mũndũ mũgeni, ũcio egũtũũra na wĩhoko.

¹⁶Mũtumia ũrĩa wĩ ngoga agĩaga na gĩtĩo, anyarirani nao, kĩrĩa magĩaga nakĩo no ũtonga.

¹⁷Mũiguanĩri-tha nĩ mwĩĩki wega ngoro yake mwene, ĩndĩ mwagi-tha nĩ mwĩrĩ wake mwene anyamaragia.

¹⁸Mũndũ mwaganu, ũtungati ũrĩa agwataga no wa kũmũhenia, no mũndũ ũhandaga ũthingu, mehotoro make nĩ mehokeku.

¹⁹Ũrĩa ũrũmainie na ũthingu, we nĩagakinyĩrĩra muoyo, nake mũthingatani na ũũru nĩ gũkua gwake mwene athĩĩgĩtie.

²⁰Arĩa a ngoro hotomu nĩ kĩndũ kĩĩ magigi harĩ Jehova, no andũ a mĩthiĩre mĩkinyanĩru nĩ gũkena akenaga nĩo.

²¹Ona kwanyitanwo moko, mũndũ ũrĩa mũũru ndatũũra atarĩ mũherithie, ĩndĩ rũruka rũa arĩa athingu nĩ kũhatũrũo rũkahatũrũo.

²²Gĩcũhĩ gĩa thahabu kĩĩ iniũrũ rĩa ngũrũe: nĩ taguo mũka mũthaka atariĩ ũtarĩ ũgerereri.

²³Wega noguo mwĩrirĩrio wa mũndũ mũthingu, ĩndĩ kĩĩrĩgĩrĩro kĩa ũrĩa mwaganu no matũkũya.

²⁴Kũrĩ ũitangaga, na akongererekaga makĩria, na kũrĩ ũthunaga gũkĩra kwagĩra, na no gũthĩna athĩnaga.

²⁵Wa ngoro ngamini nĩ kũnorio arĩnoragio, na ũrĩa ũkundanagia maĩ, we nake no arĩkundagio.

²⁶Mũrega na mbembe aigĩte, nĩarĩgekagwo nĩ kĩrĩndĩ, ĩndĩ ũrĩa ũciendagia, nĩ kĩrathimo kĩrĩmũikaraga mũtwe-inĩ.

²⁷Ũrĩa ũcaragĩrĩria o maũndũ mega, nĩ ũtugi aremathĩra, ĩndĩ ũrĩa ũrongoragia marĩa moru, nomo marĩmũkora.

²⁸Mwĩhoki ũtonga wake nĩ kũgũa akagũa, no andũ arĩa athingu nĩ kũgaacĩra marĩgaacagĩra ta ithangũ rĩrĩa iruru.

²⁹Mũnyamaria mũciĩ wake, kĩrĩa akagwata no rũhuho; kĩrimũ kĩũra-matũ gĩgatuĩka njaguti ya ũrĩa ũrĩ ũũgĩ wa ngoro.

³⁰Maciaro ma andũ arĩa athingu matuĩkaga mũtĩ wa muoyo; mũndũ wĩ na ũũgĩ-ũrĩa-wa-ma nĩatahaga ngoro cia andũ.

³¹Rĩrĩi! Andũ arĩa athingu makĩrĩ a kũherithio me gũkũ thĩ-rĩ, makĩria githĩ ti arĩa aaganu, o acio mahĩtagia?