Proverbs 10

¹ICI NĨ THIMO cia Suleimani. Mwana mũũgĩ atũmaga ithe akene, no mwana kĩrimũ atũũragia nyina na kĩeha.

²Mĩthithũ yumaine na ũmaramari ndĩrĩ ũndũ ĩgunaga, no ũthingu nĩũteithũraga mũndũ harĩ gĩkuũ.

³Jehova ndangĩreka ngoro ya mũndũ mũthingu ĩrĩo nĩ ng’aragu, ĩndĩ kĩrĩa kĩĩrirĩrie nĩ ũrĩa mwaganu nĩagĩikagia hanene.

⁴Mũruti wĩra na guoko kũregeru atuĩkaga o mũthĩni, no guoko kwa mũndũ ũrĩ kĩyo nĩkũrehage ũtonga.

⁵Mũũngania na riũa nĩ mwana wĩ na ũũgĩ: mũtindi-toro hingo ya magetha nĩ mwana wa kũrehe njono.

⁶Mũtwe wa mũndũ mũthingu ũtũũraga ũikarĩirũo nĩ irathimo, ĩndĩ kanua ka mũndũ mwaganu kahubagwo nĩ mbaara.

⁷Arĩa athingu makĩririkanwo nĩ kũrathimwo marathimagwo, ĩndĩ rĩĩtwa rĩa mũndũ mwaganu no kuora rĩkora.

⁸Ũrĩa wĩ na ũũgĩ wa ngoro nĩetĩkagĩra mawatho, no kĩrimũ kĩa mũhũhũtĩko nĩ kũbacana gĩkabacana.

⁹Mũthii na mĩthiĩre mĩkinyanĩru athiaga e na mwĩhoko, ĩndĩ mũndũ ũhotomagia ikĩro ciake, we no akamenyeka.

¹⁰Muunĩri ũrĩa ũngĩ riitho nĩ mũrehi wa haaro: mũndũ wa kũrũithia ũrĩa ũngĩ ũtheri-inĩ nĩ mũrehi wa thayũ.

¹¹Kanua ka mũndũ mũthingu nĩ gĩthima kĩa muoyo, ĩndĩ kanua ka mũndũ mwaganu kahubagwo nĩ mbaara.

¹²Rũthũũro rũtombothorithagia mahiũrania, ĩndĩ wendani nĩũhumbagĩra mehia o mothe.

¹³Mĩromo-inĩ ya mũndũ ũũĩ gũkũũrana, nĩ ũũgĩ-wa-ma ũkoragwo ho, ĩndĩ ũrĩa ũtarĩ wĩcirio, nĩ rũthanju rũmwagĩrĩire rũa ciande.

¹⁴Andũ arĩa ogĩ meigagĩra ũmenyo mũthithũ, no kanua ga kĩrimũ kĩũra-matũ nĩ karehi wanangi wa narua.

¹⁵Ũtonga wa mũndũ gĩtonga nĩ ta gĩtũũro e nakĩo kĩirige na hinya: ũkĩa wa arĩa ahũthũ nĩguo ũmaanangithagia.

¹⁶Ũrĩmi wa andũ arĩa athingu uumaga muoyo: uumithio wa arĩa aaganu uumaga o mahĩtia.

¹⁷Ũrĩa ũiguaga agĩtaarũo, arĩ njĩra ya muoyo, ĩndĩ ũrĩa wĩeheragĩra akĩrũithio nĩ kũhĩtia ahĩtagia.

¹⁸Mũhitha rũthũũro na ngoro aaragia na mĩromo ya ũrongo, ũrĩa wa gũtumũka na njambanio nake nĩ kĩrimũ.

¹⁹Kwaria ndeto nyingĩ, gũtiagaga wĩhia, no ũrĩa ũgiragĩrĩria mĩromo yake ndakaarie, ũcio nĩ mũũgĩ.

²⁰Rũrĩmĩ rũa mũndũ mũthingu nĩ ta betha ya ũthuro: nayo ngoro ya mũndũ mwaganu, ĩo ndĩrĩ bata.

²¹Mĩromo ya arĩa athingu nĩĩheaga andũ aingĩ gĩa kũrĩa, ĩndĩ andũ arĩa ora-matũ nĩ gũkua makuaga nĩ kwaga wĩcirio.

²²Kĩrathimo kĩa Jehova nĩkĩo kĩrehage ũtonga, na ndarĩ kĩeha onganagĩrĩria nakĩo.

²³Harĩ mũndũ kĩrimũ gwĩka naĩ nĩ ta ithako, nake mũndũ mũtaũku, ithako rĩake nĩ kũgĩa na ũũgĩ-ũrĩa-wa-ma.

²⁴Mũndũ mwaganu, ũndũ ũrĩa etigĩrĩte nĩguo ũkamũkora, nake ũrĩa mũthingu, ũrĩa eriragĩria nĩ gwĩtĩkĩrio agetĩkĩrio.

²⁵Kĩhuhũkanio kĩahĩtũka, ũrĩa mwaganu ndacokaga kuoneka, no mũndũ mũthingu nĩ gĩtina gĩtũũraga ho tene o na tene.

²⁶Ta rũgagati rũa thiki magego-inĩ, na ta ndogo maitho-inĩ, noguo kĩgũta gĩtariĩ harĩ arĩa magĩtũmaga.

²⁷Gwĩtigĩra Jehova nĩkuongererithagia mũndũ matukũ, no mĩaka ya arĩa aaganu nĩ gũtinio ĩrĩtinagio.

²⁸Itanya rĩa arĩa athingu, kĩrĩa rĩkoima nĩ gĩkeno, no kĩĩrĩgĩrĩro kĩa mũndũ mwaganu, kĩo nĩ gũtoma gĩgatoma.

²⁹Njĩra ya Jehova harĩ ũrĩa mwĩkindĩru nĩ kĩirigo kĩa hinya, no harĩ eki a maũndũ maaganu nĩ ya mwanangĩko.

³⁰Mũndũ ũrĩa mũthingu ndarĩ hingo akenyenyeka, no andũ arĩa aaganu matigatũũra bũrũri.

³¹Kanua ka mũndũ mũthingu gathundũraga ũũgĩ-ũrĩa-wa-ma, no rũrĩmĩ rũrĩa rũa thiaya nĩ kũrengwo rũkarengwo.

³²Arĩa athingu, mĩromo yao yũĩ kwaria ndeto iria ikwendeka, no kanua ka mũndũ mwaganu koĩ o ndeto cia thiaya.