Proverbs 9

¹MŨTUMIA ũcio ũgwĩtwo Ũũgĩ-ũrĩa-wa-ma nĩeyakĩire nyũmba, na nĩaacũhĩtie itugĩ ciake mũgwanja.

²Nĩ mũthĩnju ngoima ciake, ndibei yake nĩaringĩrĩirie, na nĩarĩkĩtie gũ tandĩka metha yake.

³Nĩareketie airĩtu ake, akaanĩrĩrithia itũũra-inĩ o kũndũ gũtũũgaraire mũno,

⁴Akoiga, Mũndũ o wothe ũtarĩ mũũgĩ, nĩakerũre atonye na gũkũ! mũndũ ũrĩa wagĩte wĩcirio-rĩ, we akamwĩra,

⁵Ũkai mũkarĩe irio ciakwa, na mũnyue ndibei ĩrĩa ningĩrĩirie!

⁶Inyuĩ andũ aya mũtarĩ ogĩ-rĩ, tigai ũhoro wanyu, nĩguo mũtũũre, mũcoke gũthiaga na njĩra o ĩrĩa ya mbuguĩro!

⁷Ũrĩa wa gũtaara mũtendi nĩ njono ethũgũragĩra, na wa kũrũithia mwaganu nĩegĩragĩra kĩmeni.

⁸Tiga kũrũithia mũtendi, gũthũũra ndagagũthũũre; rũithia mũndũ mũũgĩ, nake no akwende.

⁹Mũndũ mũũgĩ, mũtaare, na nĩekũũhĩga makĩria; mũndũ mũthingu, mũrute, na nĩekwĩongerera wĩruti.

¹⁰Gwĩtigĩra Jehova nĩkuo kĩrutĩrĩrio kĩa ũũgĩ-ũrĩa-wa-ma, na kũmenya Ũrĩa Ũmwe Mũtheru nokuo kũgĩa na mbuguĩro.

¹¹Amu, nĩ ũndũ wakwa matukũ maku nĩ kuongerereka makongerereka, mĩaka yaku ya gũtũũra ĩgĩkĩrĩrĩrie.

¹²Wakorũo wĩ mũũgĩ, ũũgĩ ũcio nĩwe mwene ũrĩgunaga, na wakorũo wĩ mũtendi-rĩ, thĩna ũcio nowe ũrĩĩkuuagĩra.

¹³Mũndũ mũka ũrĩa kĩrimũ nĩ wa mbĩrĩrĩka, nĩ mwagu ũũgĩ o kwaga, ndarĩ ũndũ amenyete.

¹⁴Nake nĩ gũikara aikaraga thĩ mũromo-inĩ wa nyũmba yake, agaikaragĩra gĩtĩ itũũra-inĩ harĩa hatũũgaraire,

¹⁵Nĩguo agũtũkagĩre andũ arĩa mekũhĩtũka, arĩa megwĩthiĩra merekereire na njĩra,

¹⁶Akameraga atĩrĩ, Mũndũ o wothe ũtarĩ mũũgĩ, ta nĩakerũre atonye na gũkũ! ũrĩa ningĩ wagĩte wĩcirio, we akamwĩra,

¹⁷Maĩ ma ũici me mũrĩo, na irio cia kũrĩĩrũo hitho-inĩ nĩ njega!

¹⁸No mũndũ ũcio ndakoragwo amenyete atĩ nĩ andũ akuũ marĩ kuo, ndoĩ atĩ ageni a mũndũ mũka ũcio marĩ o kũrĩa kũriku kwa ngoma.