Proverbs 8

¹MŨTUMIA ũrĩa, ti Ũũgĩ-ũrĩa-wa-ma, anga tiwe ũragũtũka, o we Ũtaũku-rĩ, githĩ tiwe ũraruta mũgambo?

²Tũcũmbĩrĩ-inĩ twa kũrĩa gũtũũgaraire gũkuhĩ na njĩra, o na kũrĩa njĩra igomanĩire-rĩ, nĩkuo arũgamaga;

³Ningĩ kĩhingo-inĩ, o hau rĩingĩrĩro-inĩ rĩa itũũra, o igukumĩro-inĩ rĩa mĩrango, nĩho aanagĩrĩra:

⁴Akoiga, Nĩ inyuĩ, o inyuĩ andũ, ndĩragũtũkĩra; mũgambo wakwa nĩ inyuĩ ciana cia kĩrĩndĩ njerekeirie.

⁵Inyuĩ mũtarĩ ogĩ-rĩ, ĩmenyerei wara; o inyuĩ irimũ, gĩai na ngoro ndaũku.

⁶Kĩiguei! amu nĩ mohoro me bata mũno ngwaria; ũrĩa nguuga ndatumũra mĩromo no maũndũ marĩa marũngĩrĩru.

⁷Tondũ kanua gakwa no ũhoro ũrĩa wa ma kangiuga; mĩromo yakwa ĩthũire waganu ta kĩndũ kĩĩ magigi.

⁸Ciugo ciothe cia kanua gakwa nĩ cia ũthingu, itirĩ na ũndũ o na ũmwe mũhĩngĩcanu kana mũhotomu.

⁹Ciothe no nguũku wega harĩ mũndũ mũtaũku, na harĩ arĩa agĩu na ũmenyi nĩ njerekereru.

¹⁰Amũkĩrai ũtaaro wakwa, tiga betha; iyũkiai ũmenyi, tiga thahabu, o na ĩrĩ ya ũthuro.

¹¹Nĩ gũkorũo ũũgĩ-ũrĩa-wa-ma nĩ kĩndũ kĩega kũrĩ ruru iria ndune, na indo ciothe iria ciendagwo itingĩgerekanĩka naguo.

¹²Niĩ, o niĩ Ũũgĩ-wa-ma, wara mwega ndĩũtuĩte gĩtũũro gĩakwa, na ngetuĩrĩria ũmenyi wa gũthugunda maũndũ.

¹³Gwĩtigĩra Jehova-rĩ, nĩ gũthũũra ũũru: mwĩtĩo, na mwĩtũũgĩrio, na ũthii njĩra njũru, o na kanua ka rũtũrĩko-rĩ, maũndũ macio niĩ nĩndĩmathũire.

¹⁴Nĩ niĩ mwene kĩrĩra, o na ũmenyi ũrĩa mũkinyanĩru; ũtaũku no niĩ, na nĩ niĩ ndĩ na ũhoti.

¹⁵Nĩ ũndũ wakwa-rĩ, athamaki mahotaga gũthamakĩra mabũrũri mao, na anene makahota gũtuagĩra andũ maũndũ ma ũthingu.

¹⁶No ũndũ wakwa aathani nĩmamenyaga gwathana, na makang’ũ ma bũrũri o ũndũ ũmwe, o kinya atua-cira othe a thĩ.

¹⁷Andũ arĩa manyenda, nĩo na niĩ nyenda; arĩa manjaragia na kĩyo-rĩ, kũnyona nĩmarĩnyonaga.

¹⁸Harĩ niĩ he na ũtonga o na gĩtĩo, ĩĩ-ni, ũtonga o ũrĩa wa ndĩrĩri, na nĩngĩ ũthingu.

¹⁹Maciaro makwa nĩ mega kũrĩ thahabu, gwata thahabu ĩrĩa theru mũno, uumithio wakwa ũgakĩra betha, na ĩrĩ ya ũthuro.

²⁰’Thiaga na rũtumo o rũrĩa rũa ũthingu, ngakĩgeraga njĩra o iria cia kĩhooto.

²¹Nĩguo ndũmage arĩa manyenda magwate magai, njiyũragie mĩthithũ yao.

²²Jehova nĩegĩĩrĩire na niĩ o kĩambĩrĩria-inĩ kĩa njĩra yake, o mbere ya kũruta mawĩra marĩa make ma tene.

²³Ndathondeketwo kuuma tene wa tene, o kuuma kĩambĩrĩria, thĩ ĩtarĩ yagĩa.

²⁴Hingo ĩrĩa maria-inĩ kũu kũriku gũtaagĩĩte o na kũmwe, norĩo ndaciarirũo; hingo gũtaarĩ na matherũkĩro ma gũtothokaga maĩ.

²⁵Ndaciarirũo mbere ithuri itarĩ ciahandwo, o rĩrĩa gũtaanagĩa na irĩma,

²⁶O we ataanomba thĩ, o na kana mawerũ, kana kĩambĩko kĩa ngũmba iria ciombire mabũrũri.

²⁷Hĩndĩ ĩrĩa aathondekire igũrũ, niĩ ndarĩ ho; rĩrĩa aathiũrũrũkĩirie ũthiũ wa iria kũu kũriku na rũkiriri,

²⁸O rĩrĩa aarũmirie matu mairũ ma igũrũ, rĩrĩa ningĩ matherũkĩro ma maĩ ma kũrĩa kũriku mũno maagwatire hinya;

²⁹Rĩrĩa ekĩrĩire iria rĩu inene mũhaka, nĩ getha maĩ matikanaagarare rĩathani rĩake; o ro rĩrĩa aakururire mĩkaro ya gĩtina gĩa thĩ:

³⁰Hingo ĩo yothe niĩ ndarĩ hamwe nake ndĩ wa kwĩrererũo nĩwe, ngatuĩka nĩ niĩ aakenaga nĩ niĩ mũthenya o mũthenya, ngatũhatũhaga ndĩ mbere yake hĩndĩ ciothe,

³¹Ngagĩtũhatũha nĩ ũndũ wa thĩ ĩo yake ya gũtũũrũo nĩ andũ, o ngĩkenaga nĩ rũruka rũu rũa andũ.

³²Rĩu, ariũ akwa-rĩ, no kĩiguei ũrĩa ndĩroiga, amu arĩa marũmagĩrĩra njĩra ciakwa no-o a gũkena.

³³Tuĩkai a kũigua ũtaarani, nĩguo mũũhĩge; menyai mũũrege!

³⁴Gũkena-rĩ, no mũndũ ũrĩa ũnjiguaga, ũrĩa ũtindaga andorereirie ihingo-inĩ cia gwakwa, agakĩnjetagĩrĩra o hingĩro-inĩ cia mĩrango yakwa.

³⁵Thima-rĩ, ũrĩa ũgĩĩte na niĩ nĩ muoyo agĩĩte naguo, nake nĩarĩĩrutagĩra ũtugi harĩ Jehova.

³⁶Nake ũrĩa ũhĩtainie na niĩ nĩ kwĩĩka eĩkaga ũũru ngoro yake mwene, amu arĩa othe ma’thũũraga nĩ gĩkuũ makoragwo mendete.