Proverbs 13

¹Mwana mũũgĩ nĩaiguaga ũtaari wa ithe, no mũndũ mũtendi ndarĩ irũithia angĩigua.

²Mũndũ arĩrĩaga wega wa maciaro ma kanua gake, ĩndĩ ngoro cia mĩgarũka irĩrĩaga ũtoi.

³Mwĩmenyereri kanua nĩ muoyo wake agitagĩra: mũtumũri mĩromo mũno nĩ mwanangĩko akagĩa naguo.

⁴Ngoro ya kĩgũta nĩĩĩriragĩria, na ndĩone kĩndũ, no ngoro ya mũndũ wĩ kĩyo nĩ kũnorio ĩrĩnoragio.

⁵Mũndũ mũthingu nĩathũire ũhoro wa maheni, ĩndĩ mũndũ mwaganu, maũndũ make me kĩheera, ningĩ me njono.

⁶Mũndũ wa mĩthiĩre mĩgima, ũthingu nĩũmũgitagĩra: mũndũ wa mahĩtia, waganu nĩũmũturũraga.

⁷Kũrĩ wĩtuaga mũtongu, na ndarĩ na kĩndũ: kũrĩ wĩtuaga mũkĩa, na e na ũtonga mũnene.

⁸Gĩkũũri kĩa muoyo wa mũndũ nĩ ũtonga wake, ĩndĩ mũkĩa akĩĩhĩtĩrũo ndangĩigua.

⁹Ũtheri wa andũ arĩa athingu nĩ gũcangarara ũcangararaga, no kĩmũrĩ kĩa mũndũ mwaganu nĩ kũhorio gĩkahorio.

¹⁰Mwĩgerero ũrehage o njũgitano, ĩndĩ ũũgĩ wĩ na arĩa ataarĩki.

¹¹Indo cia njũka-narua nĩ kũhũa irĩhũagĩrĩra, no mwĩmathĩri na moko make nĩ kuongerereka arĩongererekaga.

¹²Ũndũ mũtanye watũũrĩrĩra mũno, nĩũrũaragia mũndũ ngoro, ĩndĩ ũndũ mwĩrirĩrie wakinya, ũtuĩkaga ta mũtĩ wa muoyo.

¹³Mũndũ wothe ũmenaga ũhoro nĩ kwĩũnũhithia eũnũhithagia, no ũrĩa mwĩtigĩri maathani nĩarĩgwataga ngerenwa.

¹⁴Kĩrĩra kĩa mũndũ mũũgĩ nĩ gĩthima kĩa muoyo, nĩ gĩa gũtũma gũthengagwo mĩtego-inĩ ya gĩkuũ.

¹⁵Ũgerekereri mwega wa maũndũ ũtũmaga mwene endeke, ĩndĩ njĩra ya mĩgarũka ĩrĩ na mĩhĩnga.

¹⁶Mũndũ o wothe mũbarĩrĩri ekaga maũndũ make na ũmenyi, ĩndĩ kĩrimũ nĩ gũtandamũra gĩtandamũraga ũrimũ wakĩo.

¹⁷Mũtũmwo mwaganu athiaga kũingĩra ũũru-inĩ, ĩndĩ mũrekio mwĩhokeku nĩakinyagia ũhorohu.

¹⁸Mũregi ũtaaro akanyitwo nĩ ũthĩni, o na thoni, no mũndũ ũrũmbũyagia akĩrũithio agatuĩka wa gũtĩwo.

¹⁹Ũndũ mwĩrirĩrie wakinyĩrĩrĩka nĩũiguithagia ngoro ya mũndũ wega, ĩndĩ harĩ irimũ, gũtigana na ũũru nĩ ũndũ ũrĩ magigi.

²⁰Thiaga thiritũ na andũ arĩa ogĩ, nawe no ũgĩe na ũũgĩ, no ũrĩa ũtindanagia na irimũ nĩ gũtuurũo agatuurũo.

²¹Andũ a mahĩtia, ũũru nĩguo ũmathingataga, no andũ arĩa athingu makarĩhwo na maũndũ mega.

²²Mũndũ mwega atigagĩra o nginya acũkũrũ ake magai, naguo ũtonga wa mũndũ wa mahĩtia nĩ mũhoohio ũigĩirũo andũ arĩa athingu.

²³Mahianyũ ma arĩa athĩni nĩmoimaga irio nyingĩ, ĩndĩ nĩkũrĩ ũmathi ũninithagio nĩ wogogi.

²⁴Mũndũ wa kũiga rũthanju thĩ nĩ gũthũũra athũire mwana, no ũrĩa ũmwendete amũherithagia tene.

²⁵Mũndũ mũthingu arĩaga akehũnĩra, no nda ya ũrĩa mwaganu nĩ gũthirĩrũo ĩrĩthiragĩrũo.