Proverbs 17

¹Kaba o kenyũ gatheri ka ngima harĩ ũhoreri, gũkĩra nyũmba ĩiyũirũo nĩ ndĩa na kũrĩ na ngũĩ.

²Ndungata ĩrĩa thondeki maũndũ na ũũgĩ ĩgatuĩka njathi mũriũ wa mwene yo, ũrĩa ũrehage njono, na kũgwata nĩĩkagwata magai hamwe na ciana icio ciake.

³Nĩ nyũngũ ĩtaahagĩrũo betha, na kĩrugutĩro nĩho hatheragĩrio thahabu, ĩndĩ mũroria wa ngoro nĩ Jehova.

⁴Mwĩki naĩ athikagĩrĩria mĩromo ĩrĩa yaragia waganu; mũndũ wa maheni, rũrĩmĩ rũrĩa ategagĩra gũtũ no rũrĩa rũa ũthũkia.

⁵Mũnyũrũria wa ngĩa nĩ Mũmũũmbi airaga: mũndũ ũkenaga andũ mona ndirũ ndatũũra atarĩ mũherithie.

⁶Ũcũkũrũ nĩguo thũmbĩ ya athuri, na igema rĩa ciana nĩ maithe.

⁷Ndeto cia bata itiagĩrĩire kanua ka mũndũ ũtarĩ mbuguĩro, na makĩria mĩromo ya maheni ndĩagĩrĩire mũndũ mwĩkĩrĩre.

⁸Ihaki, ta ũrĩa mwene onaga, nĩ ta kahiga ke mũnyaka: o harĩa haarorio naho, ũhoro ũgakĩagĩra.

⁹Mũhumbi rĩĩhia rĩa mũndũ nĩ wendani arongoretie, no ũrĩa ũinagĩrĩria ũndũ atigithanagia arĩa marĩ ũrata mũnene.

¹⁰Irũithia nĩrĩtonyaga mũndũ wĩ na mbuguĩro gũkĩra njamiũ igana harĩ ũrĩa kĩrimũ.

¹¹Mũndũ ũrĩa mũũru arongoragia o ũremi, tondũ ũcio nĩ mũrekio mũũma-nda akarekerio.

¹²Kaba mũndũ gũtũngwo nĩ nyamũ ĩgwĩtwo nduba ĩĩ ndunye ciana ciayo, kũrĩ gũtũngwo nĩ kĩrimũ kĩrũmanĩrĩire na ũkĩgu wakĩo.

¹³Mũthukĩri wega na ũũru-rĩ, ũũru ndũgathama gwake.

¹⁴Kwambĩrĩria mahiũrania nĩ ta kũhingũrĩra nditi ya maĩ: gĩtiganagei na itetania gũtanakĩgĩa mburugano.

¹⁵Wa gũtuĩra mũndũ mwaganu atĩ nĩwe mũthingu, na wa gũtuĩra ũrĩa mũthingu atĩ nĩwe mwĩhia, o erĩ no kĩndũ kĩĩ magigi harĩ jehova.

¹⁶Nĩ ũndũ kĩ kĩrimũ gĩkuuĩte kĩgũri na guoko atĩ kĩgũre ũũgĩ, na kwaga nĩkĩagĩte wĩcirio?

¹⁷Mũrata wa mũndũ amwendaga o hingo ciothe; aciaragwo atuĩke mũrũ wa nyina hingo ya mĩnyamaro.

¹⁸Mũndũ mwagu wĩcirio nĩ ũrĩa wa kũng’athana na ũngĩ, agagĩtuĩka ithenya rĩa mũndũ me itũũra.

¹⁹Mwendi njũgitano nowe mwendi kwagarara watho: mũndũ wa gwĩtũũgĩrĩria mũno kĩhingo gĩa gwake mũciĩ nĩ mwanangĩko arecarĩria.

²⁰Mũndũ wa ngoro hotomu ndarĩ wega angĩona; ũrĩa wa rũrĩmĩ rũĩ ndeto ng’onyoku agũaga ũũru-inĩ.

²¹Mũciari kĩrimũ nĩ kĩeha egĩĩrĩire nakĩo; ithe wa mũndũ ũtarĩ mbuguĩro ndarĩ hingo angĩkena.

²²Ngoro ĩrĩa ngenu nĩ mũthaiga mwega, no roho mũthuthĩku ũtũmaga mahĩndĩ ma mũndũ mang’are.

²³Mũndũ mwaganu aamũkagĩra ihaki irute gĩthũri-inĩ nĩguo ogomagie mĩtuĩre ya macira matigatuwo na kĩhooto.

²⁴Ũthiũ wa mũndũ ũrĩ mbuguĩro ũikaraga ũrorete o ũũgĩ-inĩ, no maitho ma kĩrimũ maikaraga makĩriũngaga ituri cia thĩ.

²⁵Mwana ũrĩa kĩrimũ nĩ wa kĩeha harĩ ithe, na nĩ mwĩkĩri nyina mũmũciari ũcũngũ.

²⁶Ũndũ ũngĩ ũtarĩ mwega nĩ kũherithia mũndũ mũthingu, o na kana kũhũra arĩa ekĩrĩre nĩ ũndũ wa ũrũngĩrĩru wao.

²⁷Ũrĩa ũtaingĩhagia ndeto nĩwe wĩ na ũmenyi, mũndũ wa ngoro horo nĩwe mũtaũku.

²⁸O na kĩrimũ gĩekirĩra, nĩkĩĩragwo atĩ nĩ mũũgĩ; gĩatumia-rĩ, gĩgakĩĩrũo nĩ mũndũ ũrĩ mbuguĩro.