Proverbs 16

¹Mataarĩria ma ngoro nĩ andũ metaaragĩria, ĩndĩ irĩkia na rũrĩmĩ riumaga kwĩ Jehova.

²Mĩthiĩre ya mũndũ yothe no mĩtheru, we akĩĩonera, no Jehova athimaga maroho.

³Rekagĩrĩria Jehova maũndũ marĩa ũbataragio nĩ gwĩka, na mathugunda maku nĩmarĩhotekaga.

⁴Jehova nĩombire kĩndũ o gĩothe nĩ ũndũ wa gĩtũmi gĩakĩo, ĩĩ-ni, o gwata arĩa aaganu akĩmomba nĩ ũndũ wa mũthenya ũrĩa wa ũũru.

⁵Mũndũ o wothe wa ngoro ya ngũrũ nĩ kĩndũ kĩĩ magigi harĩ Jehova; o na kwanyitanwo moko, ndatũũra atarĩ mũherithie.

⁶Waganu nĩũitũrũragio nĩ ũtugi na maũndũ marĩa ma ma; tondũ wa gwĩtigĩra Jehova, andũ nĩmathenganagĩra na ũũru.

⁷Mĩthiĩre ya mũndũ yatuĩka no ĩrĩa ĩkenagia Jehova, atũmaga o gwata thũ ciake igĩe na ũiguano nake.

⁸Kaba kũnyihĩrũo indo, hamwe na ũthingu, gũkĩra uumithio mũnene ũtarĩ wa kĩhooto.

⁹Mũndũ nĩethugundagĩra na ngoro yake atĩ athiĩ na njĩra ’na, ĩndĩ makinya make nĩ Jehova ũmaroragia na harĩa mekũgera.

¹⁰Nĩ ũgo ũrĩ mĩromo-inĩ ya mũthamaki; kanua gake gatingĩhĩtia ituĩro-inĩ.

¹¹Kĩgeri, o na ratiri, iria cia kĩhooto, nĩ cia Jehova; mahiga ma mondo, marĩa ma gũthima, mothe no wĩra wake.

¹²Harĩ athamaki kũmaramara nĩ ũndũ wĩ magigi, nĩ amu gĩtĩ kĩa ũnene kĩrũmagio no ũthingu.

¹³Mĩromo ĩrĩ ũthingu nĩyo ĩkenagĩrũo nĩ athamaki, na kwenda makenda mũndũ waragia ndeto njerekereru.

¹⁴Marũrũ ma mũthamaki nĩ ta arekio a gĩkuũ, ĩndĩ mũndũ mũũgĩ no kũmahoreria.

¹⁵Gũthererũo gĩthiithi nĩ mũthamaki kũrĩ muoyo; kwagĩrĩrũo nĩwe nĩ ta itu rĩa mbura ĩrĩa ya gũkũria.

¹⁶Githĩ kũgĩa na ũũgĩ-ũrĩa-wa-ma ti kwega mũno kũrĩ kũgĩa na thahabu? ĩĩ-ni, kaba gwĩthurĩra kũgĩa na mbuguĩro gũkĩra kũgĩa na betha.

¹⁷Andũ arĩa arũngĩrĩru, barabara yao nĩ mũndũ ethemagie ũũru-inĩ; ũrĩa ũmenyagĩrĩra njĩra yake nĩ muoyo wake aragitĩra.

¹⁸Mwĩgatho ũrũmagĩrĩrũo nĩ mwanangĩko, ngoro ya ngũrũ nĩĩtũmaga mũndũ agũe.

¹⁹Wega nĩ gũtuĩka wa ngoro horeri hamwe na athĩni, kũrĩ kũgayanaga mataha hamwe na andũ arĩa egereri.

²⁰Ũrĩa ũrũmbũyagia ũhoro, nĩ wega arĩonaga; mũndũ o wothe mwĩhoki Jehova, nĩwe mũkeni.

²¹Ũrĩa wĩ na ũũgĩ-ũrĩa-wa-ma ngoro-inĩ yake atuagwo mũtaũku, na mĩromo ĩrĩa yaragia ciugo ii mũrĩo nĩyongererithagia andũ wĩruti.

²²Ũgerekereri wa maũndũ, harĩ ũrĩa wĩ naguo, nĩ itherũkĩro rĩa muoyo, ĩndĩ irimũ njũra-matũ, ũrimũ nĩguo kĩherithia gĩacio.

²³Ngoro ya mũndũ mũũgĩ nĩyũhĩgagia kanua gake, ĩgakĩongerera mĩromo yake ndeto cia wĩruti.

²⁴Ndeto njega nĩ ta mũruru wa ũũkĩ: harĩ ngoro ii na mũrĩo, na harĩ mahĩndĩ nĩ ũgima.

²⁵Kwĩ njĩra mũndũ onaga ta arĩ yo nũngarũ, no gĩturi kĩayo nĩ mĩirigo ya gũtonya gĩkuũ-inĩ.

²⁶Mũruti-wĩra, kũhũta gwake nĩkũrutithanagia nake, nĩ amu nĩ mũmero wake ũmũringagĩrĩria.

²⁷Mũũra-huhũ nĩathugundaga maũndũ ma gwĩka andũ arĩa angĩ ũũru, nayo mĩromo yake nĩ ta ĩrĩ na mwaki wa gũcinana.

²⁸Mũndũ mũtũrĩku nĩ kũhura ahuraga mahiũrania, mũndũ wa mũhuhu atigithanagia andũ marĩ ũrata mũnene.

²⁹Mũndũ mũtoi ahenagĩriria ũrĩa ũngĩ wa itũũra rĩao, agakĩmũtongoria na njĩra ĩtarĩ njega.

³⁰Ũrĩa ũikaraga ahingĩte maitho nĩ maũndũ ma rũtũrĩko arathugunda; ũrĩa ũhihinyainie mĩromo nĩ ũũru ararehithie.

³¹Kĩongo kĩrĩ mbuĩ nĩ thũmbĩ ĩrĩ ũgemu; kuoneka kĩonekaga na njĩra ya ũthingu.

³²Ũrĩa ũtahiũhaga kũrakara nĩ mwega kũrĩ njamba; ũcio ũhotaga gwatha ngoro yake akĩrĩte ũrĩa wa kwĩgwatĩra itũũra.

³³Mbũgũ gũitwo nĩciitagwo rũũa-inĩ, ĩndĩ woni wacio wothe uumaga kwĩ Jehova.