Proverbs 15

¹Icokia ihoreri nĩ gũthengia rĩthengagia marũrũ, no njiinũ nĩ gũthombotha ithombothaga marakara.

²Rũrĩmĩ rũa mũndũ mũũgĩ nĩrũhũthagĩra ũmenyi na njĩra njega, ĩndĩ tũnua twa irimũ tũitũrũraga ũkĩgu o gũitũrũra.

³Maitho ma Jehova monaga kũndũ guothe, magacũthagĩrĩria andũ arĩa oru o na arĩa ega.

⁴Rũrĩmĩ rũrĩa rũhoreragia nĩ ta mũtĩ wa muoyo, ĩndĩ rũrĩa rũhong’oraga ũhoro no gũthutha mũndũ ngoro.

⁵Kĩrimũ kĩa ũũra-matũ nĩkĩagagĩra ũtaari wa ithe bata, no mũndũ wa kũrũmbũiya akĩrũithio atuĩkaga mũbarĩrĩri.

⁶Mũciĩ wa mũndũ mũthingu gũikaraga mũthithũ mũnene, ĩndĩ uumithio wa arĩa aaganu nĩ wa mĩtangĩko mĩtheri.

⁷Mĩromo ya andũ arĩa ogĩ ĩhunjagia ũmenyi, ĩndĩ ngoro ya ũrĩa kĩrimũ ndĩũĩ gwĩka ũguo.

⁸Igongona rĩa mũndũ mwaganu no kĩndũ kĩĩ magigi he Jehova, no mahoya ma andũ arĩa arũngĩrĩru nĩ gũkena amakenagĩra.

⁹Njĩra ya arĩa aaganu nĩ kĩndũ kĩĩ magigi harĩ Jehova, no mũndũ ũthingatanaga o na ũthingu nĩ kwenda amwendaga.

¹⁰Kũrĩ iherithio rĩũru rĩetereire ũrĩa ũtigĩte njĩra; mũndũ ũthũũraga kũrũithio, ũcio nĩ wa gũkua.

¹¹Kwa-ngoma, o gwata Ininanĩro-inĩ, kũrĩ o ũthiũ-inĩ wa Jehova: makĩria ma ũguo, githĩ ti ngoro cia ciana cia kĩrĩndĩ!

¹²Mũtendi ndendaga kũrũithio; ndangĩĩtĩkĩra gũthiĩ harĩ andũ arĩa ogĩ.

¹³Ngoro ngenu ĩtũmaga gĩthiithi kĩa mwene gĩthere, ĩndĩ ngoro yatũũra na kĩeha nĩgĩthuthaga mũndũ roho.

¹⁴Ngoro ya mũndũ wĩ mbuguĩro ĩcaragĩrĩria ũmenyi, no kanua ka arĩa irimũ, kĩrĩa karĩaga no ũkĩgu.

¹⁵Matukũ ma arĩa maranyamarĩka no moru o mothe, no mũndũ wa ngoro njaũku, ũcio e na ndĩa ya kĩrũma.

¹⁶Kaba kũnyihĩrũo indo, hamwe na gwĩtigĩra Jehova, gũkĩra mũthithũ mũnene hamwe na kĩnyarirĩko.

¹⁷Kaba rũĩga rũa nyeni, harĩ kĩendano, gũkĩra njaũ ya gĩtuĩro hamwe na gĩthũũrano.

¹⁸Mũndũ wa marũrũ nĩ gũthombotha athombothaga mahiũrania, ĩndĩ ũrĩa ũtahiũhaga kũrakara, ngũĩ nĩ kũhoreria amĩhoragĩria.

¹⁹Njĩra ya kĩgũta nĩ ta kũndũ kũirige na mĩigua, no ya mũndũ mũrũngĩrĩru nĩ nyenje ĩgatuĩka kĩng’aratua.

²⁰Mwana mũũgĩ atũmaga ithe akene, no mũndũ kĩrimũ nĩ kũrurũka arurũkaga nyina.

²¹Ũrimũ nĩguo ũrĩ gĩkeno harĩ mũndũ ũtarĩ wĩcirio, no mũndũ mũtaũku, nĩ kũrũnga erũngagĩra mũgendere wake.

²²Kũndũ gũtarĩagwo kĩrĩra, mathondeko makuo nĩ gũthata mathataga, no kũrĩa kwĩ na aheani aingĩ a kĩrĩra nĩ kũrũma marũmaga.

²³Mũndũ nĩakenaga nĩ kanua gake gũcokia ũhoro wega, nakĩo kiugo kĩarĩtio o ihinda rĩagĩrĩire, kaĩ nĩ kĩega-ĩ!

²⁴Harĩ mũndũ ũrĩa mũũgĩ, njĩra ya muoyo no ya mwambato, nĩ getha ethengere kũrĩa thĩ Kwa-ngoma.

²⁵Mũciĩ wa mũndũ mwĩtũũgĩria, Jehova nĩ kuombororia akawombororia, no atũũre arũmĩtie mũhaka wa mũtumia wa ndigwa.

²⁶Mathugunda moru nĩ kĩndũ kĩĩ magigi harĩ Jehova, ĩndĩ ndeto nyendeku nĩ iria theru.

²⁷Mũhahatĩria wa indo nĩ mũciĩ wake mwene anyamaragia, ĩndĩ mũndũ ũthũire mahaki nĩ wa gũtũũra.

²⁸Ngoro ya mũndũ mũthingu yambaga gwĩcũrania ũrĩa ĩgũcokia, no kanua ka ũrĩa mwaganu nĩgaitũrũraga maũndũ moru.

²⁹Mũndũ mwaganu, Jehova amũikaraga haraya, ĩndĩ nĩaiguaga kũhoya kwa ũrĩa mũthingu.

³⁰Maitho kuona ũtheri nĩ gũkenia gũkenagia ngoro, na kũigua ũhoro mwega nĩ kũnoria kũnoragia mahĩndĩ.

³¹Gũtũ kũrĩa gũthikagĩrĩria mũrũithĩrie ũrĩa ũrehage muoyo, kuo nĩ gwa gũtũũrania na andũ arĩa ogĩ.

³²Mũregi gũtaarũo nĩ mwĩmeni we mwene, ĩndĩ ũrĩa wa gũthikĩrĩria akĩrũithio nĩagĩaga na wĩcirio.

³³Gwĩtigĩra Jehova nĩkuo ũtaari ũrĩa wĩkagĩra mũndũ ũũgĩ, na gũtĩĩka gũtongoirio nĩ kwĩnyihia.