Psalms 102

¹IGUA kũhoya gwakwa, Jehova, kũrĩra gwakwa reke gũgũkinyĩrĩre.

²Ndũkeĩ’hithĩre ũthiũ mũthenya ũrĩa ndanyamarĩka; inamĩrĩria gũtũ ũnjigue; mũthenya ũrĩa ndakaya-rĩ, kĩnyamũkĩrie o narua.

³Nĩ amu matukũ makwa nĩmarathirĩrĩkĩra ta ndogo, mahĩndĩ makwa namo mahĩĩte o ta gĩcinga.

⁴Ngoro yakwa nĩ kũringĩka ĩringĩkĩte ta nyeki, ĩkahoha, ngakĩriganagĩrũo o na kũrĩa irio.

⁵Tondũ wa mũcayo ũrĩa njayaga mahĩndĩ makwa nĩmagwatanĩte na nyama.

⁶’Huana o ta gakuua-ũrogi karĩa ka werũ-inĩ; nduĩkĩte ta ndundu, ĩrĩa ĩikaraga kũndũ kũrĩa kwĩ ihooru.

⁷Ndaaraga itahingĩte riitho, o na ngahaana ta kanyoni ka mwaga karĩ o goiki gacũmbĩrĩ ka nyũmba.

⁸Thũ ciakwa itindaga mũthenya wothe o igĩ’thirĩkia; acio mangũrũkĩire-rĩ, rĩrĩa mekũrumana marumanaga na niĩ.

⁹Nĩ gũkorũo ndĩaga mũhu o ta arĩ irio, na ngundo ĩrĩa ’nyuaga ngamĩtukanagia na maithori,

¹⁰Nĩ ũndũ wa mang’ũrĩka maku na gũthũgũta kũu ũ’thũgũtĩire: nĩ amu ũnjoete na igũrũ ũkandungumania na thĩ.

¹¹Matukũ makwa mahaanĩte ta kĩĩruru rĩrĩa kĩratambũrũka gĩcoke kĩbuĩrie; nĩ kũhoha ndĩrahoha ta nyeki.

¹²No rĩrĩ, wee, Jehova, ũgũtũũra ũikarĩire gĩtĩ kĩa ũnene o nginya tene na tene, kũririkanwo gwaku gũkinyagĩrĩre njiaro na njiaro.

¹³We nĩũkaarahũka ũiguĩre Zayuni tha, amu hingo yakuo ya gũkinyĩrio wega nĩĩkinyĩte, ĩĩ-ni, ihinda rĩrĩa rĩathĩrĩre nĩ ikinyu.

¹⁴Amu mahiga marĩa makuo, ndungata ciaku no imakenagĩra, gwata o rũkũngũ rũakuo, ikenda rũĩkwo wega.

¹⁵Nĩrĩo ndũrĩrĩ igetigĩra rĩĩtwa rĩa Jehova, athamaki othe a thĩ metigĩre riri waku:

¹⁶Nĩ tondũ Jehova agakorũo acokete gwaka Zayuni, akoneka arĩ o na riri wake;

¹⁷Agakorũo etĩkĩrĩte mahoya ma ũrĩa ũtigĩtwo e mwagi, kũhoya kwao agakĩaga gũkũrurũka.

¹⁸Ũhoro ũcio no nginya wandĩkwo nĩ ũndũ wa rũciaro rũrĩa rũĩ thutha, na kĩrĩndĩ kĩrĩa gĩgatũmwo kĩgĩe kuo nĩgĩkagoocaga Jehova.

¹⁹Nĩ tondũ nĩaaikirie maitho thĩ e kũu gwake gũtheru; e kũu igũrũ-rĩ, Jehova kũrora agĩkĩrora thĩ ĩno,

²⁰Atĩ aigue gũcaya kwa mũgwate, na ohore arĩa matuĩrĩirũo gũkua,

²¹Nĩguo andũ maganage rĩĩtwa rĩa Jehova Zayuni, ngumo yake ĩmemerekagio kũu Jerusalemu,

²²Rĩrĩa irĩndĩ cia thĩ igakorũo ciũnganĩte, gwata mothamaki, nĩguo itungatĩre Jehova.

²³Niĩ hinya wakwa nĩaũnyihĩtie ndĩ njĩra, matukũ makwa agakĩmanyihia.

²⁴Ngakiuga atĩrĩ, Ĩ Ngai wakwa, tiga gũ’thengia o rĩrĩa ndaigananĩria matukũ makwa gatagatĩ! wee-rĩ, mĩaka yaku ĩthiaga ĩgĩkinyagĩrĩra njiaro na njiaro.

²⁵Tene tene nĩwe waarire gĩtina gĩa thĩ, o narĩo igũrũ-rĩ, no wĩra wa moko maku.

²⁶Icio no gũthira igathira, nowe nĩ gũikara ũgaikara; icio ciothe nĩ gũkũra igakũra itambuthĩke o ta nguo; ũgacigarũrĩra ta itonyo, nacio igarũrũke:

²⁷Ĩndĩ wee-rĩ, nowe ũrĩa we; mĩaka yaku ndĩkagĩa na gĩturi.

²⁸Ciana cia ndungata ciaku nĩ gũtũũra igagĩtũũra, mbeũ yacio nayo nĩ kũrũmio ĩkarũmio ĩrĩ o mbere-inĩ yaku.