Psalms 103

¹NGORO yakwa, gatha Jehova; gwata kĩrĩa o gĩothe gĩĩ thĩinĩ wakwa nikigathe rĩĩtwa rĩake rĩamũre.

²Ngoro yakwa, kĩgathe Jehova, na ndũkariganĩrũo nĩ wega o na ũmwe marĩa agwĩkaga:

³Arĩ we ũkuohagĩra waganu waku wothe; ndũari ciaku ciothe o nacio nowe mũkũhonia;

⁴O we mũkũũri muoyo waku harĩ irima rĩa gĩkuũ, na nowe mũgwĩki maũndũ ma ũtugi na ma matha maigũ, ta arĩ thũmbĩ aragwĩkĩra ya ũnene;

⁵Ningĩ nowe ũrĩa ũhũnagia kanua gaku hũni ya wega, wĩthĩ waku ũgakĩanakaha ta wa nderi.

⁶Jehova-rĩ, nĩwe mwĩki ciĩko cia ũthingu, arĩa othe agũmĩre agagĩtua matuĩro ma kĩhooto nĩ ũndũ wao.

⁷Mĩthiĩre ĩo yake nĩaamenyithirie Musa, mĩĩkĩre yake nĩ ciana cia Isiraeli aakĩonirie.

⁸Jehova nĩ wa matha maingĩ na nĩ muuma-andũ mũno; ndahiũhaga kũrakara, na e na ũtugi mũingĩ.

⁹Ndangĩikara o acirithanagia hĩndĩ ciothe, na ndangĩtũũra arakarĩte nginya tene na tene.

¹⁰Ndatwĩkĩte ta ũrĩa mahĩtia maitũ maagĩrĩirũo, kana agatũcokeria kũringana na ũrĩa waganu witũ ũigana.

¹¹Nĩ amu-rĩ, o ũguo matu-inĩ kũhaicĩte o igũrũ rĩa thĩ, no taguo ũtugi wake ũneneheire arĩa amwĩtigĩri.

¹²O ta ũrĩa irathĩro kũraihanĩrĩirie na ithũĩro, no taguo atũthengeirie mehia maitũ matũraihĩrĩrie.

¹³O ũrĩa mũthuri aiguagĩra ciana ciake tha, noguo Jehova aiguagĩra arĩa mamwĩtigĩrĩte.

¹⁴Nĩ gũkorũo we nĩoĩ ũũmbe ũrĩa twombirũo; nĩaririkanaga atĩ ithuĩ tũrĩ o rũkũngũ.

¹⁵Mũndũ-rĩ, matukũ make mahaana o ta ria; ta kĩro gĩa gĩthaka, noguo atumũkaga.

¹⁶Amu kĩhũragwo nĩ rũhuho, gĩgaitĩka, na hau kiuma gĩtingĩgacoka kuonwo.

¹⁷No rĩrĩ, ũtugi wa Jehova ũtũũraga harĩ arĩa amwĩtigĩri kuuma o tene na nginya tene na tene, naguo ũthingu wake ũkinyagĩrĩra ciana cia ciana ciao,

¹⁸Arĩa marũmagia kĩrĩkanĩro gĩake, makaririkanaga mataaro make magakĩmekaga.

¹⁹Jehova ahandĩte gĩtĩ gĩake kĩa ũnene kũrĩa igũrũ; ũthamaki wake wathaga maũndũ mothe.

²⁰Kĩgathei Jehova, inyuĩ araika ake, inyuĩ njamba cia hinya, inyuĩ mwĩkaga o ũrĩa oigĩte, mũgagĩthikagĩrĩria mũgambo ũrĩa ekuuga.

²¹Gathai Jehova, inyuĩ mbũtũ ciake ciothe cia ita, o inyuĩ atungati ake mwĩkaga o ũrĩa endaga.

²²Gathai Jehova, inyuĩ mawĩra make mothe, kũndũ guothe wathani-inĩ wake o kũrĩa warũma: wee, ngoro yakwa, no kĩgathe Jehova!