Psalms 104

¹NGORO yakwa, gatha Jehova. Ĩ Jehova, Ngai wakwa, wee ũrĩ mũnene mũno; wĩguĩkĩte ũtĩĩku, o na ũkaru.

²Ũtũire wĩhumbĩte ũtheri ta nguo; wee nĩwe ũtambũrũkĩtie igũrũ ta kĩandarũa.

³Nowe ũrĩa ũigĩrĩire mĩgamba ĩrĩa yakĩrĩirũo nyũmba ciake cia ngoroba igũrũ rĩa maĩ; nowe ũrĩa ũtuaga matu ngari yake ya kũmũkuua; nowe ũrĩa ũthiaga agĩtwaragwo nĩ mathagu ma rũhuho;

⁴O ũrĩa ningĩ ũtũmaga huho ituĩke arekio ake, na mwaki ũrĩa ũhenũrũrũkaga o naguo agatũma ũtuĩke no atungati ake.

⁵Thĩ-rĩ, aamĩakĩrĩire igũrũ rĩa itina ciayo, ndĩkae gũkenyenyeka o na tene.

⁶Wamĩhumbĩrire iria rĩrĩa inene ta arĩ itonyo, maĩ magĩgĩikara mathikĩte irĩma.

⁷Ningĩ wamakũma makĩũra, ngwa ciaku ciagamba makĩgwata o kũhahũka,

⁸(Irĩma ikiumĩra, cianda igĩgĩcoka na thĩ,) magĩgĩkinya o harĩa wamathondekeire maikarage.

⁹Wamekĩrĩire mũhaka ũrĩa matangĩagarara, nĩguo matigacoke kũhumba thĩ rĩngĩ.

¹⁰Nĩwe ũrĩa ũtherũkagia ithima cianda-inĩ, igaikũrũkagĩra gatagatĩ-inĩ ka irĩma.

¹¹Nĩcio inyuagwo nĩ ndaara-gĩthaka o yothe; nĩho njagĩ ciĩnyotoragĩra.

¹²Kũu ngurumo-inĩ ciacio nĩkuo nyoni cia rĩera-inĩ itũũraga, ikainaga ii honge-inĩ cia mĩtĩ.

¹³Aitagĩrĩria irĩma maĩ moimĩte ciũmba-inĩ ciake iria cia igũrũ: wee-rĩ, thĩ ĩgakĩhũna maciaro ma wĩra waku.

¹⁴Nĩwe ũtũmaga nyeki ĩringũre ya kũrĩo nĩ mahiũ, na agakũria indo cia kũmera, iria irĩ ũteithio harĩ andũ; tĩri-inĩ gũkiumage irio,

¹⁵O na ndibei, ĩrĩa ĩkenagia mũndũ ngoro, na maguta ma gũtũma ũthiũ wake ũkengage, o na mũgate, ũrĩa wĩkagĩra ngoro ya mũndũ hinya.

¹⁶Mĩtĩ ya Jehova o nayo nĩĩhũnaga, o yo mĩtarakwa ĩrĩa ya Lebanoni, ĩrĩa aahandire.

¹⁷Thĩinĩ wayo nĩkuo nyoni ciaraga itara ciacio, nayo njũũ-rĩ, mĩkarakaba-inĩ nĩkuo nyũmba yayo.

¹⁸Irĩma iria ndaya nĩkuo gwa tũbũri twa werũ; ndwaro-inĩ cia mahiga-rĩ, nĩkuo mwangĩro wa ikami.

¹⁹Mweri-rĩ, aaũũmbire ũtuĩke wa kũmenyithanagia mahinda; riũa narĩo nĩrĩmenyaga ithũĩro rĩarĩo.

²⁰Wee ũtũmaga kũgĩe nduma, gũgagĩtuĩka ũtukũ, rĩrĩa nyamũ ciothe cia mũtitũ ikungaga ikoimĩra;

²¹Mĩrũthi ĩrĩa mĩĩthĩ ĩkarumaga nĩ kwĩrirĩria ndĩa yayo, ĩgagĩĩtagia irio ciayo harĩ Mũrungu.

²²Riũa rĩkaratha, nyamũ igethiĩra, ikearahania imamo-inĩ ciacio.

²³Andũ makoima na nja, magathiĩ wĩtungatĩri-inĩ wao magatinda wĩra-inĩ wao o nginya gũtuke.

²⁴Ĩ Jehova, nĩ maingĩ atĩa mawĩra marĩa ũrutĩte! o mothe ũmarutĩte na wara; thĩ nĩ kũiyũra ĩiyũire ũrĩmi waku.

²⁵Rĩrĩa nĩrĩo iria, o ũguo rĩnenehete na rĩkaarama; thĩinĩ warĩo kwĩ indo iria ciongoyaga itangĩgereka; nyamũ ii kuo nyinyi o na nene.

²⁶Nĩkuo marikabu ithiagĩra; nyamũ ĩrĩa ĩĩtagwo rĩwiathani nĩkuo ĩrĩ, ĩrĩa wombire ĩtũhage kuo.

²⁷Icio ciothe nowe iroragĩrĩria, nĩguo ũciheage irio ciacio o ihinda rĩacio rĩakinya.

²⁸O kĩrĩa wacihe nĩkĩo cioyaga; ũkumbatũragia guoko, igakĩhũna wega waku.

²⁹Ningĩ ũkahitha ũthiũ, cio igagĩcanjama; ũcokagĩra mĩheehũ yacio, igakua, igacoka rũkũngũ-inĩ gwacio.

³⁰Gũtũma ũtũmaga roho waku, nacio igakĩgĩa; ũthiũ wa thĩ ũgakĩwanakahia.

³¹Riri wa Jehova ũrotũũra tene o na tene; Jehova arokenagĩra mawĩra marĩa arutĩte,

³²O we ũcio ũringagia thĩ riitho, nayo ĩgathingitha; ahutagia irĩma, nacio ikoima ndogo.

³³Ngũtũũra nyinagĩra Jehova hingo ĩrĩa yothe ngũikara ndĩ muoyo; Ngai wakwa-rĩ, ndĩĩmũinagĩra ngĩmũgoocaga hĩndĩ ĩrĩa yothe ndĩ ho.

³⁴Macũrania makwa marogĩa na mũrĩo harĩ we: niĩ-rĩ, nĩ Jehova ndĩrĩkenaga nĩ ũndũ wake.

³⁵Arĩa ehia maroninwo, marindũke gũkũ thĩ, andũ aaganu-rĩ, maage gũcoka kũgĩa. Ngoro yakwa, no kĩgathe Jehova! Goocai Jehova!