Psalms 105

¹Ĩ GĨCOKERIEI Jehova ngatho, anĩrĩrai ngumo ya rĩĩtwa rĩake; ũhoro wa mawĩko make ũmenyithiei irĩndĩ ciothe cia thĩ.

²Mũinĩrei, mũkumiei na nyĩmbo; kĩheanei ũhoro wa maũndũ mothe ma magegania marĩa aaneka.

³Rĩĩtwa rĩu rĩake rĩamũre, wĩrahei nĩ ũndũ warĩo: arĩa marongoretie Jehova, ngoro ciao ta nĩikene.

⁴Rongoragiai Jehova, o gwata hinya wake; kĩmathagei ũthiũ wake o hingo ciothe.

⁵Ririkanai maũndũ ma magegania marĩa aaneka, mũkĩririkane morirũ marĩa make, o na matuĩro marĩa ma kanua gake,

⁶Inyuĩ mbeũ ya Iburahimu, ndungata yake, o inyuĩ ciana cia Jakubu, inyuĩ athurũo ake.

⁷We Jehova-rĩ, nĩwe Ngai witũ; matuĩro make makinyaga gũkũ thĩ guothe.

⁸Kĩrĩkanĩro gĩake nĩakĩririkanaga nginya tene na tene, uuge ũcio ekĩrire watho-rĩ, agakĩũririkanaga nginya mariika ngiri,

⁹O kĩo kĩrĩkanĩro kĩrĩa aarĩkanĩire na Iburahimu, mwĩhĩtwa o ro ũrĩa ehĩtire harĩ Isaaka;

¹⁰Agĩcoka agĩkĩrũmia harĩ Jakubu, agĩgĩtua mũtugo wa kũrũmagĩrĩrũo, atĩ gĩtuĩke kĩrĩkanĩro harĩ Isiraeli gĩa tene na tene,

¹¹Akiuga, Wee nĩwe ngahe bũrũri wa Kanaani, ũtuĩke igai rĩaku rĩrĩa ngũgereire.

¹²Na no hĩndĩ ĩrĩa maarĩ gakundi karĩa kangĩtarĩka, ĩĩ-ni, anyinyi mũno, o na ningĩ maarĩ ageni kuo;

¹³Na no gũthama maathamangaga makoima rũrĩrĩ-inĩ rũmwe magathiĩ rũrĩrĩ-inĩ rũngĩ, magakiuma kwa mũthamaki ũyũ, magathiĩ gwa kĩrĩndĩ kĩrĩa kĩngĩ.

¹⁴Ndaarekaga mũndũ o na ũmwe amanyarire; o na kũrĩ athamaki aarũithirie nĩ ũndũ wao,

¹⁵Akoiga, Tigai kũhutia andũ akwa aya njitĩrĩirie maguta, anabii acio akwa-rĩ, menyai mũmeke ũũru.

¹⁶Ningĩ agĩĩtĩra bũrũri ng’aragu, agĩkĩnina mwĩhoko wothe wa irio.

¹⁷Na nĩaatũmĩte mũndũ aambe athiĩ mbere yao; we Jusufu-rĩ, nĩ kwendio endirio agĩtuĩka ngombo.

¹⁸Magũrũ make magĩtuurio na bĩngũ, ngoro yake ĩgĩkĩohanio na igera,

¹⁹O nginya uuge wake ũgĩgakinyĩrĩra, kĩĩranĩro kĩa Jehova nĩ kũroria kĩamũroragia.

²⁰Mũthamaki agĩcoka agĩtũmana akĩmuohorithia; mũnene ũcio wa irĩndĩ-rĩ, nĩaakĩmũrekirie.

²¹Agĩcoka akĩmũtua wa gwathaga mũciĩ wake, mũnene wa kũramataga indo ciake ciothe;

²²Atuĩke wa kuoha akaburũ ake o rĩrĩa angĩenda, na arutage athuri ake ũũgĩ.

²³Isiraeli nake agĩgĩkinya Misiri, we Jakubu agĩikara e mũgeni thĩ ĩo ya Hamu.

²⁴Kĩrĩndĩ kĩu gĩake Jehova agĩtũma gĩciare mũno, agĩtũma kĩgĩe na hinya kũrĩ a-muku akĩo.

²⁵Acio nĩaagarũrire ngoro ciao nĩguo mathũũre kĩrĩndĩ gĩake, magekaga ndungata icio ciake maũndũ ma wara.

²⁶Agĩgĩtũma Musa, ndungata yake, o na Haruni, ũrĩa mũthurũo wake.

²⁷Akĩringa ciama ciake mĩthemba mĩthemba gatagatĩ-inĩ kao, agĩkĩonania morirũ thĩ ĩo ya Hamu.

²⁸Akĩrehe nduma, agĩtũma gũcingimane; nao matiigana kũng’athĩria uuge wake.

²⁹Maĩ ma kwao nĩ kũgarũra aagarũrire ũrĩa maahaanaga magĩtuĩka thakame, akĩũraga ciũngũyũ ciakuo.

³⁰Bũrũri wao ũgĩcoka ũkĩhunja ciũra o kũhunja, nginya o thĩinĩ wa nyũmba cia athamaki ao.

³¹Kwaria akĩaria, gũgĩũka ngi mĩrumbĩ mĩingĩ mĩingĩ, ndaa nacio ikĩiyũra thĩ yao o nginya ndere guothe.

³²Ningĩ handũ ha mbura ya ndũire, aamaheire mbura ya mbembe, gwata nĩnĩmbĩ cia mwaki ciahenũrũkagĩra bũrũri wao.

³³Agĩkĩhũra mĩthabibu yao o na mĩkũyũ yao ya kũrĩyo; akiunanga mĩtĩ ĩrĩa yarĩ kũu kwao o nginya ndere.

³⁴Kwaria akĩaria, gũgĩũka ngigĩ, o gwata itono, itangĩgereka,

³⁵Ikĩrĩa ihuti o rĩothe rĩrĩa rĩarĩ thĩ ĩo yao, igĩkĩrambia maciaro ma tĩri wao ikĩnina.

³⁶Ningĩ akĩringa marigithathi mothe ma thĩ yao akĩmoraga, o mo mũtũrio wa hinya wao wothe.

³⁷Agĩkĩya kũmaruta kuo marĩ na betha na thahabu, na thĩinĩ wa mĩhĩrĩga ĩo yake gũtiarĩ mũndũ o na ũmwe watũgũgaga.

³⁸Misiri nĩ gũkenwo gwakenirũo moima kuo, tondũ nĩkwagũĩrĩirũo nĩ guoya nĩ ũndũ wao.

³⁹Nĩ gũtambũrũkia aamatambũrũkĩirie itu rĩmathiĩkagĩrĩrie, o na mwaki wa kũmamũrĩkagĩra ũtukũ.

⁴⁰Magĩĩtia, nake akĩrehe tũmakia-arũme, na akĩmahũnia mũgate uumĩte igũrũ.

⁴¹Ningĩ agĩtumũra ndũmba ya ihiga, ĩgĩthothoka maĩ; magĩgĩikũrũka kũu burugĩi-inĩ o ta rũũĩ.

⁴²Amu nĩ kũririkana aaririkanaga uuge ũrĩa wake mũtheru, agakĩririkana Iburahimu, ndungata yake.

⁴³Akĩruta kĩrĩndĩ gĩake kũu kĩĩ na gĩkeno, athurũo acio ake agĩkĩmoimia kuo me na mũkũngũiyo.

⁴⁴Akĩmahe mabũrũri ma ndũrĩrĩ; indo iria cianogeirũo nĩ irĩndĩ icio magĩkĩĩgĩĩra nacio:

⁴⁵Na nĩ getha matũũre marũmĩtie mĩtugo ĩrĩa aatuanĩire, na makĩmenyagĩrĩre kĩrĩra gĩake. Goocai Jehova!