Psalms 106

¹GOOCAI Jehova! Ĩ gĩcokeriei Jehova ngatho, tondũ nĩ mwega; tondũ ũtugi wake nĩ wa tene na tene.

²Nũ ũngiuga mawĩko ma ũhoti ma Jehova amaithĩranie, atĩ aiguithie andũ ũkumio wake wothe?

³Gũkena-rĩ, nĩ arĩa marũmagia kĩhooto, arĩa mekaga maũndũ ma ũthingu mahinda mothe.

⁴Ĩ Jehova, ndirikana na wĩtĩkĩri ũrĩa ũtũũraga naguo harĩ kĩrĩndĩ gĩaku; ũ’ng’ethere, ũkĩnginyĩrie ũhonokio waku,

⁵Nĩ getha nduĩke wa gũkona athurũo aku magaacĩire, rũrĩrĩ rũrũ rũaku ngenere gĩkeno kĩaruo, igai rĩu rĩaku-rĩ, tũgakĩĩraha hamwe narĩo.

⁶Ithuĩ nĩtũhĩtĩtie o ũndũ ũmwe na maithe maitũ, nĩ kwagana twaganĩte, o na tũkamaramara.

⁷Maithe maitũ matiarũmbũirie maũndũ maku ma magegania marĩa wekĩte me Misiri; matiaririkanaga ũrĩa ũtugi waku waingĩhĩte; no nĩ kũhanda maahandire rũng’athio me rũtere rũa iria, o Iria Itune.

⁸No we, tondũ wa rĩĩtwa rĩake, akĩmahonokia, nĩ getha atũme ũhoti wake ũmenyeke.

⁹Agĩgĩkũma Iria Itune, narĩo rĩkĩhũa, akĩmahĩtũkĩria o kũu kũriku o ta arĩ werũ.

¹⁰Akĩmahonokia guoko-inĩ kwa ũrĩa mũmathũũri, gũkũũra akĩmakũũra agĩkĩmaruta moko-inĩ ma thũ ciao.

¹¹Namo maĩ makihuba acio maarĩ muku nao; gũtirĩ o na ũmwe watigarire.

¹²Hĩndĩ ĩo magĩĩtĩkia uuge ũrĩa wake, magĩkĩmũinĩra makĩmũgooca.

¹³No rĩrĩ, mawĩko macio make, magĩcoka o narua kũriganĩrũo nĩmo; matiigana kwĩetereria ũtaari wake ũmatongorie:

¹⁴No gũitĩka maaitĩkire kũgĩa na thuti me kũrĩa werũ-inĩ, magĩkĩgereria Mũrungu kũu rũaga-inĩ.

¹⁵Nake akĩmahe kĩrĩa maamwĩtagia; no ngoro ciao, agĩcitonyia ũhĩnju.

¹⁶Ningĩ makĩiguĩra Musa ũiru maikaire kũu iraaro-inĩ, o na makĩiguĩra Haruni, ũrĩa mwamũre nĩ Jehova.

¹⁷Thĩ ĩgĩkĩemũka ĩkĩmerũkia Dathani, thiritũ ĩo ya Abiramu-rĩ, ĩkĩmakunĩkĩria.

¹⁸Na gĩkundi-inĩ kĩao hagĩakana mwaki, rũrĩrĩmbĩ rũgĩcina acio aaganu magĩthira.

¹⁹Marĩ Horebu nĩ gũthondeka maathondekire gĩcaũ, makĩinamĩrĩra mũhianano wombĩtwo na mũũmbĩre wa gũtwekio.

²⁰Magĩgĩkũũrania riri ũrĩa wao na kĩndũ gĩtuĩtwo ta ng’ombe ĩrĩaga nyeki.

²¹Makĩriganĩrũo nĩ Mũrungu mũhonokia wao, ũrĩa wekĩte maũndũ manene kũu Misiri,

²²Ageka mawĩko ma magegania thĩ ĩo ya Hamu, na ageka maũndũ marĩ itua-nda Iria-inĩ Itune.

²³We agĩkiuga atĩ nĩekũmanina, guca Musa, mũthurũo wake, aamũrũgamire mbere hau haarĩ mwanya, agarũre marũrũ make, ndakae kũmonũha.

²⁴Bũrũri ũrĩa wa kwendeka mũno, o naguo makĩwagĩra bata, makĩrega gwĩtĩkia uuge ũrĩa wake;

²⁵Magĩgĩikara makĩng’ong’oraga me thĩinĩ wa hema ciao, na matithikĩrĩrie mũgambo wa Jehova.

²⁶Tondũ ũcio akĩmoera guoko na igũrũ, akiuga atĩ no amang’aũranĩrie kũu werũ-inĩ,

²⁷Na mbeũ yao amĩhurunje ndũrĩrĩ-inĩ, akĩmĩharaganĩrie na kũu mabũrũri-inĩ.

²⁸Ningĩ nĩmegwatanirie na Baali-Peoru, makĩrĩa magongona ma arĩa matarĩ na muoyo.

²⁹Magĩgĩtũma athirĩke nĩ maũndũ mao; makĩya kũharũkĩrũo nĩ mũmitũko.

³⁰Hĩndĩ ĩo gũkĩrũgama Finehasi, akĩhorohia ngero ĩo, mũmitũko ũcio ũgĩkĩrigĩrĩrio.

³¹Ũndũ ũcio akĩĩrũo nĩ ũthingu ekĩte, ngatho ĩo ĩtuĩke yake njiarũa na njiarũa, o kinya tene.

³²Na ningĩ makĩmũrakarĩria maĩ-inĩ ma Meriba, Musa agĩgĩkinyĩrĩrũo nĩ ũũru nĩ ũndũ wao,

³³Nĩ gũtuĩka nĩmaang’athĩirie Roho wake, nake nĩ kwaria aaririe na mĩromo yake ũrĩa ũtaagĩrĩire.

³⁴Ningĩ matiigana kũnina irĩndĩ cia bũrũri ta ũrĩa merĩtwo nĩ Jehova;

³⁵No rĩ’, nĩ gwĩtukania metukanirie na ndũrĩrĩ, na makĩĩmenyeria maũndũ ma cio.

³⁶Magĩtuĩka a gũtungatĩra mĩhianano ĩrĩa yacio, nayo ĩgĩtuĩka mũtego wa kũmagwatia;

³⁷Ĩĩ-ni, makarutagĩra ndaimono ariũ ao na aarĩ ao matuĩke kĩndũ gĩa gũcithĩnjĩra,

³⁸Magagĩita thakame ĩrĩa ĩtehĩtie, thakame o ĩo ya ariũ ao na aarĩ ao, arĩa maarutaga matuĩke kĩruti igongona cia mĩhianano ĩo ya Kanaani; bũrũri ũgĩkĩgwata gĩko nĩ gũitwo thakame.

³⁹Ũguo nĩguo methũkirie na ciĩko icio ciao, magĩgĩtuĩka ta ahũri ũmaraya nĩ maũndũ marĩa mekaga.

⁴⁰Marakara ma Jehova magĩgĩakanĩra kĩrĩndĩ gĩake, igai rĩu rĩake akĩrĩnyira o kũrĩnyira.

⁴¹Akĩmaneana moko-inĩ ma ndũrĩrĩ, magĩtuĩka a gwathagwo nĩ arĩa maamathũũraga.

⁴²Thũ icio ciao igĩikara o imakũrĩire, o kinya makĩya kũhooteka o marĩ moko-inĩ ma cio.

⁴³Mahinda nĩ maingĩ aamateithũrire, nao, tondũ wa gwĩtaara kũrĩa metaaraga, magĩtũũra o mamũng’athagĩria, makĩya gũkahwerereka tondũ wa waganu wao.

⁴⁴No we nĩaaroragĩrĩria mĩnyamaro yao, rĩrĩa aaigua magĩkaya;

⁴⁵Akaririkana kĩrĩkanĩro gĩake nĩ ũndũ wao, agacoka kũigua tha kũringana o na ũrĩa ũtugi wake ũingĩhĩte.

⁴⁶Na nĩaatũmaga matuĩke a kũiguĩrũo nĩ arĩa othe maamatahĩte makamatua mĩgwate.

⁴⁷Tũhonokie, Jehova Ngai witũ, ũtũũnganie ũtũrute ndũrĩrĩ-inĩ, nĩ getha tũcokagĩrie rĩĩtwa rĩaku rĩamũre ngatho, gũkumio gwaku-rĩ, tũgĩtũũre twĩrahaga nĩ ũndũ wakuo.

⁴⁸Jehova arogathagwo, o we Ngai wa Isiraeli, kuuma o tene wa tene na nginya o tene na tene. Nao andũ othe nĩmakiuge, Amen. Goocai Jehova!