Psalms 107

¹Ĩ GĨCOKERIEI Jehova ngatho, tondũ nĩ mwega, tondũ ũtugi wake nĩ wa tene na tene.

²Arĩa akũũre nĩ Jehova nĩmakiuge ũguo, o arĩa akũũrĩte akamaruta guoko-inĩ kwa mũmaitha,

³Agakĩmongania amarutĩte mabũrũri-inĩ, mwena wa irathĩro na wa ithũĩro, ningĩ wa gathigathini na wa gũthini.

⁴Kũrĩ maakorirũo makĩũrũra werũ-inĩ, njĩra ya rũaga: nĩ kwaga maagĩte itũũra rĩa gũikara.

⁵Tondũ wa ũrĩa maarĩ ahũtu na makanyota, ngoro ciao ikĩenda kũhooteka thĩinĩ wao.

⁶Magĩgĩkaĩra Jehova tondũ wa ũrĩa mathĩnĩkĩte, nake akĩmateithũra mĩnyamaro-inĩ ĩo maarĩ nayo.

⁷Akĩmatwara o na njĩra nũngarũ, nĩguo makinye itũũra rĩa gũikara.

⁸O, ta nĩmacokerie Jehova ngatho nĩ ũndũ wa ũtugi wake, na maũndũ ma magegania marĩa ekaga ciana cia kĩrĩndĩ!

⁹Nĩ amu ngoro ĩrĩa ĩĩ na nyota nĩamĩhũnagia, ngoro ĩrĩa hũtu-rĩ, agakĩmĩiyũria maũndũ mega.

¹⁰Kũrĩ maaikaire nduma-inĩ, o nduma-inĩ ta ya gĩkuũ, marĩ ohe mĩtandiũko-inĩ, kuohwo na igera,

¹¹Nĩ ũndũ nĩmaang’athĩirie ndeto cia Mũrungu, ũtaaro wa Ũrĩa-wĩ-Igũrũ-Mũno-rĩ, makawagĩra bata;

¹²Agĩkĩhoria ngoro ciao na mĩnoga ya wĩra, makĩhigũka, na matione wa kũmateithia.

¹³Magĩgĩkaĩra Jehova tondũ wa ũrĩa mathĩnĩkĩte, nake akĩmahonokia mĩnyamaro-inĩ ĩo maarĩ nayo.

¹⁴Nĩ kũruta aamarutire nduma-inĩ, o kũu nduma-inĩ ya gĩkuũ, agĩgĩtua mĩkwa ĩrĩa mohetwo nayo.

¹⁵O, ta nĩmacokerie Jehova ngatho nĩ ũndũ wa ũtugi wake, na maũndũ ma magegania marĩa ekaga ciana cia kĩrĩndĩ!

¹⁶Nĩ amu mĩrango ĩrĩa ya rũthuku nĩamĩthuthangĩte, na agatinania mĩgĩĩko yayo, o ĩo ya igera.

¹⁷Ora-matũ-rĩ, tondũ wa njĩra ciao cia wĩathi, tondũ o wa waganu wao, nĩmerehagĩrĩre mĩtandiũko.

¹⁸Ngoro ciao igakinya kũnyira irio mĩthemba yothe, makaya gũthengerera ihingo-inĩ cia gĩkuũ.

¹⁹Magagĩkaĩra Jehova tondũ wa ũrĩa mathĩnĩkĩte, nake akamahonokia mĩnyamaro-inĩ ĩo me nayo.

²⁰Atũmaga ũhoro wake, akamahonia, agakĩmahatũra hau marima-inĩ mao ma mbĩrĩra.

²¹O, ta nĩmacokerie Jehova ngatho nĩ ũndũ wa ũtugi wake, na maũndũ ma magegania marĩa ekaga ciana cia kĩrĩndĩ!

²²Nĩmamũrutagĩre magongona ma gũcokia ngatho, na maganage mawĩko make me na mũkũngũiyo.

²³Andũ arĩa maikũrũkaga magathiĩ na iria me thĩinĩ wa marikabu, arĩa mathiaga wonjoria kũu maĩ-inĩ maingĩ,

²⁴Acio nĩmonaga mawĩko ma Jehova; maũndũ make me magegania magakĩmeonera me maĩ-inĩ macio mariku.

²⁵Amu rĩrĩa oiga, rũhuho nĩrũarahũkaga, rũrĩa rũa kĩhuhũkanio, naruo rũkaiyũkĩrĩria makũmbĩ ma maĩ, macio ma iria.

²⁶Andũ makoyũo na igũrũ o nginya matu-inĩ, ningĩ magacoka na thĩ o mũriko-inĩ; ngoro ciao igakĩregera nĩ ũũru ũrĩa marona.

²⁷Nĩ kwagaaga maagaagaga magĩtũgũgangaga ta mũndũ mũrĩu, magakĩũrũo nĩ ũũgĩ wao wothe.

²⁸Magagĩkaĩra Jehova tondũ wa ũrĩa mathĩnĩkĩte, nake akamaruta mĩnyamaro-inĩ ĩo marĩ nayo.

²⁹Atũmaga kĩhuhũkanio gĩcoke kũhorera, makũmbĩ macio moima kuo magagĩkira ngiria.

³⁰Nao magakena nĩ ũndũ rĩu mo nĩmahorerete, agakĩmakinyia rĩingĩrĩro-inĩ o rĩrĩa merirĩirie makinye.

³¹O, ta nĩmacokerie Jehova ngatho nĩ ũndũ wa ũtugi wake, na maũndũ ma magegania marĩa ekaga ciana cia kĩrĩndĩ!

³²Nĩmamũtũũgĩragie rĩrĩa kĩrĩndĩ kĩũngaine, na mamũkumagie gĩcirĩro-inĩ gĩa athuri.

³³Kũrĩa kwĩ na njũĩ atũmaga kũgarũrũke gũgatuĩka werũ mũũmũ, kũndũ kwĩ na ithima gũgatuĩka kwa nyota;

³⁴Thĩ ĩrĩa yumaga irio mũno agakĩmĩtua o rũng’ũrĩ rũa igata, nĩ ũndũ wa ũũru wa andũ arĩa mamĩtũũraga.

³⁵Ningĩ atũmaga werũ ũgarũrũke ũgatuĩka iria rĩa maĩ, thĩ nyũmũ ĩgatuĩka kũndũ kwĩ na ithima.

³⁶Nakuo agatũma gũikarũo nĩ andũ arĩa ahũtu, nĩ getha magwake itũũra rĩa gũtũũrũo,

³⁷Na mehandĩre mĩgũnda, na marĩme mĩthabibu, nĩguo magethage maciaro, magĩage na uumithio.

³⁸Kũrathima nĩamarathimaga, magathegea mũno; o gwata ũhiũ wao ndarekaga ũnyihe.

³⁹Na rĩrĩa maanyihĩrĩra, na maakunguĩrĩra, nĩ ũndũ wa gũkĩrio hinya, ningĩ mũtino o na kĩeha,

⁴⁰Anene-rĩ, nĩ kũmaagithia amaagithagia bata, agatũma matororage baraganya-inĩ, o kũu gũtarĩ njĩra.

⁴¹Ĩndĩ mũndũ ũrĩa mũkĩa-rĩ, amũigaga handũ haraya na igũrũ, harĩa atangĩtuĩka wa kũnyariragwo, na akamũingĩhĩria maciara o ta rũũru.

⁴²Andũ arĩa arũngĩrĩru monaga ũguo magakena, na wogogani wothe ũgakĩĩhumba kanua.

⁴³Mũndũ o na ũrĩkũ wĩ na ũũgĩ nĩakĩrũmie maũndũ macio, andũ marũmbũyagie o wega mĩtuganĩre ya Jehova.