Psalms 109

¹Ĩ NGAI ũrĩa ngumagia, ndũgagĩkire!

²Amu kanua ka mũndũ mũmaramari, kanua o karĩa ka ũrĩa-ma, nĩko mandumũrĩire; njirithĩtio na rũrĩmĩ rũa mũiganĩrĩro.

³Ĩĩ-ni, andũ acio mandigicĩirie na ndeto cia rũthũũro, na makandutĩra mbaara o tũhũ.

⁴Handũ ha wendani ũrĩa niĩ ndĩ naguo matuĩkĩte o a kũng’endagĩra, na niĩ no kũhoya ’hoyaga.

⁵Ithenya rĩa wega nĩ ũũru manjigĩrĩire, na handũ ha wendani wakwa ma’thukĩire na rũthũũro.

⁶Ũrĩa wĩkĩte ũguo-rĩ, mũigĩre mũndũ mwaganu igũrũ rĩake; mwena wake wa ũrĩo nĩkũrũgamage wa kũmũthitanga.

⁷Aacirithio-rĩ, nĩoimage ho atuĩtwo mwĩhia; gwata o kũhoya gwake nĩgũgĩtuĩke o kwĩhia.

⁸Matukũ make maronyiha; ũramati wake ũrooyũo nĩ mũndũ ũngĩ!

⁹Ciana ciake nĩituĩke cia ngoriai, na mũtumia wake atuĩke wa ndigwa!

¹⁰Ningĩ ciana ciake irotuĩka ndũgũgi, igĩtuĩke o njara-rũhĩ; ihaarage irio iraihanĩrĩirie na maganjo mao!

¹¹Indo ciake iroetahĩrũo nĩ mũndũ ũrĩa me thirĩ nake, ainine; kĩrĩa anogeire gĩĩtharĩrũo nĩ andũ ageni!

¹²Arohĩtanagia na mũndũ ũngĩmũtuga, na kũroaga ũngĩiguĩra ciana ciake cia ngoriai tha!

¹³Njiarũa ciake irong’ũrio; hingo ya rũciaro rũa kerĩ rĩĩtwa rĩao nĩrĩthario o gũthario!

¹⁴Waganu wa maithe make ũrotũũra ũririkainwo nĩ Jehova; gwata mehia ma nyina o namo nĩmamenye gũkanathario!

¹⁵Marogĩtũũra hau mbere-inĩ ya Jehova o hingo ciothe, nĩ getha akanina kũririkanwo kwao gũthire gũkũ thĩ!

¹⁶Nĩ ũndũ we ndaaririkanaga gũtugana, no rĩrĩ, mũndũ ũrĩa mũthĩni, o ũrĩa mwagi, agathingatanaga nake, gwata o ũrĩa ũthuthĩkĩte ngoro, o kinya akoraga.

¹⁷Kwenda endaga o kũgekana, nakuo gũgĩũka kũrĩ we; ndaakenagio nĩ kũrathimana, nakĩo kĩrathimo gĩgĩikara o kĩmũraihĩrĩirie.

¹⁸Ũgekani-rĩ, aawĩguĩkaga o ta arĩ guo kanjũ yake, naguo ũkamũtonya nda o ta maĩ, ũgakĩmũtonya mahĩndĩ ta maguta.

¹⁹Ũrotuĩka ta nguo harĩ we, o ĩrĩa ehumbaga, ningĩ ta mwĩnyitio ũrĩa atatĩraga kwĩoha!

²⁰Ũcio nĩguo mũcara wa acio mandumĩte muku, ũrĩa wa kũheanwo nĩ Jehova, o mũcara wa acio maaragĩrĩra ngoro yakwa.

²¹No rĩrĩ, Jehova Mwathani, niĩ-rĩ, ’thondekera ũhoro nĩ ũndũ wa rĩĩtwa rĩaku; tondũ wa ũrĩa ũtugi waku wĩ mwega mũno, kĩndeithũre.

²²Nĩ gũkorũo niĩ ndĩ mũthĩnĩki, ndĩ o mwagi, na ngoro yakwa nĩĩgurarĩirio thĩinĩ wakwa.

²³Ndĩ mũthiu o ta kĩĩruru rĩrĩa kĩgwete gũtambũrũka kĩbuĩrie; ’huhũragwo ta ngigĩ.

²⁴Maru makwa nĩ kũregera maregerete nĩ ũrĩa ndĩĩimĩte irio; mwĩrĩ wakwa ũgagĩtharara nĩ kwaga maguta.

²⁵Niĩ-rĩ, harĩ o nĩngĩtuĩkĩte kĩmene; rĩrĩa maanyona, maitĩkaga o kũinia mĩtwe yao.

²⁶Ĩ Jehova, Ngai wakwa, ndeithia; ’honokia kũringana o na ũtugi waku.

²⁷Nĩguo mamenye nĩ guoko gwaku kwĩ ho, makĩmenye atĩ wee, Jehova, nĩwe wĩkĩte ũguo.

²⁸O, nĩmagekanage, nawe ũrathimanage: rĩrĩa mokĩra-rĩ, nĩ gũconorũo marĩconoragwo, ĩndĩ ndungata yaku no ĩkenage.

²⁹Acio ang’enderi marohumbwo ũnyararĩku, makĩĩguĩke njono ciao ta arĩ nguo ya igũrũ.

³⁰Nĩngũcokeria Jehova ngatho na kanua gakwa mũno mũno; ĩĩ-ni, ngũmũkumĩria harĩa mũingĩ ũũnganĩire.

³¹Amu mwena wa ũrĩo wa mũndũ ũrĩa mwagi, nĩwe ũrĩrũgamaga, amũhonokagie kwĩ arĩa mangĩtuĩra ngoro yake ũũru.