Psalms 110

¹JEHOVA nĩerire mwathani wakwa atĩrĩ, Ikara thĩ guoko-inĩ gwakwa kwa ũrĩo, kinya ngatũma thũ ciaku ituĩke gaturũa ka makinya maku.

²Mũthĩgi wa hinya waku, Jehova nĩakaũtambũrũkia wĩ Zayuni: wee-rĩ, athanaga ũrĩ o gatagatĩ ga thũ ciaku.

³Mũthenya wa ita ciaku kĩrĩndĩ gĩaku gĩkerehage o na mwĩendero, kĩĩ na ũgemu ũrĩa wa ũtheru; aanake aku wĩ nao mahaana ta ireera, o ũrĩa rĩoima nda ya rũcinĩ ruoro rũatema.

⁴Jehova nĩehĩtĩte, na ndangĩĩricũkwo, akoiga, Wee wĩ mũthĩnjĩri-Ngai o nginya tene, o ta ũrĩa Melikisedeki aatariĩ.

⁵E guoko-inĩ gwaku kwa ũrĩo-rĩ, Mwathani nĩakamemenda athamaki mũthĩ ũrĩa wa marakara make.

⁶Nĩ gũcirithia agacirithia ndũrĩrĩ o agĩcituagĩra, nĩ gũtũma agagĩtũma kũiyũre o ciimba; akamemenda mĩtwe ya kũndũ kũingĩ.

⁷Akanyua maĩ ma gĩthima e njĩra, agĩcoke etiire kĩongo.