Psalms 115

¹TI ITHUĨ, Jehova, ti ithuĩ wagĩrĩirũu nĩ kũgoocithia, no rĩrĩ, kĩgoocithie rĩĩtwa rĩaku o rĩo, ũkĩmenyeke ũtugi waku, o na wĩhokeku ũrĩa wĩ naguo.

²Nĩ kĩ kĩngĩgĩtũma andũ a ndũrĩrĩ moragie, Ngai wao-rĩ, akĩrĩ ha?

³Na rĩrĩ, Ngai witũ arĩ o igũrũ; o ũrĩa endaga gwĩka noguo ekaga.

⁴Mĩhianano ĩo yao no betha na thahabu, o wĩra wa moko ma andũ.

⁵Tũnua ĩĩ natuo, na ndĩaragia; maitho ĩĩ naano, na ndĩonaga;

⁶Ĩĩ na matũ, na ndĩiguaga; ĩĩ na maniũrũ, na ndĩngĩigua mũnungo;

⁷Ĩrĩ o na moko, na ndĩngĩnyita kĩndũ; ĩĩ na magũrũ, na ndĩngĩĩtwara; o na kũnyuria ndĩngĩnyuria na mĩmero yayo.

⁸Arĩa mamĩthondekaga nĩ kũhaana makahaana o tayo; ĩĩ-ni, mũndũ o wothe ũmĩĩhokaga.

⁹Wee Isiraeli-rĩ, ĩhokage o Jehova! nĩwe ũteithio wao, o na nowe ngo yao.

¹⁰Inyuĩ nyũmba ya Haruni-rĩ, wĩhokagei o Jehova! nĩwe ũteithio wao, o na nowe ngo yao.

¹¹Inyuĩ etigĩri Jehova-rĩ, wĩhokagei o Jehova! nĩwe ũteithio wao, o na nowe ngo yao.

¹²Jehova nĩatũririkanĩte; nĩarĩtũrathimaga: nyũmba ya Isiraeli-rĩ, nĩarĩmĩrathimaga; nyũmba ya Haruni-rĩ, nĩarĩmĩrathimaga.

¹³O acio etigĩri Jehova-rĩ, no arĩmarathimaga, arĩa matarĩ igweta o gwata arĩa marĩ.

¹⁴Jehova aromuongerera, inyuĩ o na ciana cianyu!

¹⁵Inyuĩ mũrĩ arathime nĩ Jehova, ũrĩa wombire igũrũ na thĩ.

¹⁶Igũrũ-rĩ, rĩo rĩene nĩ rĩa Jehova, nayo thĩ nĩ kũhe aheete ciana cia kĩrĩndĩ.

¹⁷Arĩa akuũ matigoocaga Jehova, gwata arĩa othe maikũrũkaga kũu ũkiri-inĩ;

¹⁸No ithuĩ-rĩ, nĩ ithuĩ tũrĩgathaga Jehova kuuma rĩu kinya o tene na tene. Goocai Jehova!