Psalms 116

¹NĨNYENDA Jehova, tondũ nĩaiguĩte mũgambo wakwa, agakĩigua ngĩmũthaitha.

²Kuona nĩaanyinamĩrĩirie gũtũ-rĩ, tondũ ũcio, matukũ makwa mothe nĩwe ndĩrĩthathayagia.

³Nderigicĩirio nĩ mĩgeto ya gĩkuũ, nganyitwo nĩ mĩtandiũko ya kwa-ngoma: nĩndonire mĩnyamaro o na kĩeha.

⁴Ngĩkaĩra rĩĩtwa rĩa Jehova, ngiuga atĩrĩ, Ĩ Jehova, ndagũthaitha, hatũra muoyo wakwa.

⁵Jehova-rĩ, nĩ muuma-andũ, na nĩ mũthingu; ĩĩ-ni, Ngai witũ nĩ wa matha maingĩ.

⁶Jehova nĩamenyagĩrĩra arĩa matarĩ ogĩ: nĩ kũhinyio ndahinyĩtio, nake agĩkĩ’honokia.

⁷Wee, ngoro yakwa-rĩ, cokerera ũhurũko waku, nĩ gũkorũo Jehova nĩagwĩkĩte wega mũno.

⁸Amu wee, Jehova, nĩũtharĩte muoyo wakwa gwĩ gĩkuũ, ũgakiria maitho makwa maithori, na nĩũgirĩtie magũrũ makwa mahigũrũo.

⁹Nĩndĩĩgendaga ndĩ ũthiũ-inĩ wa Jehova o mabũrũri-inĩ ma arĩa me muoyo.

¹⁰No ndetĩkĩtie ũhoro wake, o na rĩrĩa ndaaririe ngiuga, Nĩ’thĩnĩkĩte mũno!

¹¹Na ngiuga atĩrĩ, nĩ ũrĩa ndatubunyĩkĩte, atĩ, Andũ othe no a maheni!

¹²Nĩ kĩ ngũthukĩra Jehova nakĩo nĩ ũndũ wa wega wake wothe ũrĩa anjĩkĩte?

¹³Nĩ kuoya nguoya gĩkombe kĩrĩa kĩa ũhonokio, ’thathaiye rĩĩtwa rĩa Jehova.

¹⁴Ngũkĩhingĩria Jehova mĩĩhĩtwa ĩrĩa ndehĩtire, kũhingia ndĩmĩhingie andũ ake othe marĩ ho.

¹⁵Arĩa marĩ ũiguano nake-rĩ, ikua rĩao nĩ ũndũ wĩ bata maitho-inĩ ma Jehova.

¹⁶Ĩ Jehova, ti-itherũ niĩ ndĩ ndungata yaku, ndĩ o ndungata yaku, mwana wa ngombo yaku ya mũndũ-wa-nja; wee-rĩ, nĩũnjohorete mĩhĩndo.

¹⁷No ngũrutĩre magongona ma gũcokia ngatho, ngĩthathaiye rĩĩtwa rĩa Jehova.

¹⁸Ngũkĩhingĩria Jehova mĩĩhĩtwa ĩrĩa ndehĩtire, kũhingia ndĩmĩhingie andũ ake othe marĩ ho,

¹⁹Nja-inĩ cia nyũmba ya Jehova, o thĩinĩ waku, wee Jerusalemu. Goocai Jehova!