Psalms 118

¹Ĩ GĨCOKERIEI Jehova ngatho, tondũ nĩ mwega; tondũ ũtugi wake nĩ wa tene na tene.

²A Isiraeli ta nĩmoige ũguo, atĩ ũtugi wake nĩ wa tene na tene.

³Nyũmba ya Haruni, ta nĩmoige ũguo, atĩ ũtugi wake nĩ wa tene na tene.

⁴Andũ arĩa etigĩri Jehova-rĩ, nĩmakiuge ũguo, atĩ ũtugi wake nĩ wa tene na tene.

⁵Ndakaĩire Jehova ndĩ hatĩka-inĩ: we Jehova-rĩ, akĩnjĩtĩka agĩkĩnjiga kũndũ kwariĩ.

⁶Jehova e mwena wakwa; ndingĩĩtigĩra: mũndũ-rĩ, nĩ atĩa angĩkĩhota kũnjĩka?

⁷Jehova e mwena wakwa o harĩ ateithia akwa: tondũ ũcio nĩngona ũrĩa nyendete harĩ andũ arĩa ma’thũire.

⁸Nĩ wega kũrahĩra Jehova gũkĩra kwĩhoka andũ.

⁹Nĩ wega kũrahĩra Jehova gũkĩra kwĩhoka anene.

¹⁰Ndacigĩrĩirio nĩ ndũrĩrĩ ciothe, na tondũ wa kwĩhoka rĩĩtwa rĩa Jehova nĩ kũheeria ndaiheeririe.

¹¹Kũ’hĩtĩrĩra nĩcia’hĩtĩrĩire, ĩĩ-ni, o kũ’hĩtĩrĩra, na tondũ wa kwĩhoka rĩĩtwa rĩa Jehova nĩ kũheeria ndaiheeririe.

¹²Cianjigĩrĩirie o ta njũkĩ; rĩu ikĩrĩ horu ta mwaki wa mĩigua: tondũ wa kwĩhoka rĩĩtwa rĩa Jehova-rĩ, nĩ kũheeria ndaiheeririe.

¹³Wandurumire mũno nĩ getha ngũe, ĩndĩ Jehova nĩaakĩndeithirie.

¹⁴Jehova-rĩ, nĩwe hinya wakwa, na nowe gĩtũmi kĩa nyine, nake nĩ gũtuĩka atuĩkĩte ũhonokio wakwa.

¹⁵Hema-inĩ cia arĩa athingu nĩ mũgambo wa rũũhiũ kũrĩ, o wa gũkũngũĩra ũhonokio, atĩ, Guoko kwa ũrĩo kwa Jehova gwĩkaga maũndũ ma ũhoti!

¹⁶Guoko kwa ũrĩo kwa Jehova nĩgwĩtũũgĩrĩire; guoko kwa ũrĩo kwa Jehova-rĩ, gwĩkaga o maũndũ ma ũhoti!

¹⁷Niĩ gũkua-rĩ, ndigũkua, nĩ gũtũũra ngũtũũra muoyo, ng’anage mawĩko ma Jehova.

¹⁸Kũ’herithia, Jehova nĩa’herithĩtie o ma, no ndandekereirie ngue.

¹⁹’Hingũrĩrai ihingo cia ũthingu; ngũtonya thĩinĩ, ngacokerie Jehova ngatho!

²⁰Kĩhingo gĩkĩ-rĩ, nĩ kĩa Jehova; arĩa athingu no-o marĩgĩtonyaga.

²¹Nĩ ngatho ngũgũcokeria, tondũ nĩũnyamũkĩirie, ũgagĩtuĩka ũhonokio wakwa.

²²Ihiga rĩrĩa rĩaregirũo nĩ aaki nĩrĩo rĩtuĩkĩte o rĩrĩa inene rĩa koine.

²³Ũndũ ũcio uumĩte kwĩ Jehova, na nĩũgũtũgegia tũkĩwona.

²⁴Mũthenya ũyũ nĩ Jehova ũtũmĩte ũgĩe; nĩtũcanjamũkei tũkĩũkenagĩra.

²⁵Ĩ Jehova, twagũthaitha, tũhonokagie! Ĩ Jehova, twagũthaitha, tũma tũtũũre o tũgaacĩire!

²⁶Mũrathimwo-rĩ, nĩ ũrĩa wa gũũka na rĩĩtwa rĩa Jehova! twĩ gũkũ nyũmba ya Jehova, inyuĩ nĩtwamũrathima.

²⁷Jehova nowe Mũrungu, na nĩagĩtuonetie ũtheri: kĩohei kĩruti-igongona na mĩhĩndo, gĩkinyio hĩa-inĩ cia kĩgongona.

²⁸Wee ũrĩ Mũrungu wakwa, no ngũcokerie ngatho; wee ũrĩ Ngai wakwa, nĩngũgũtũũgĩria.

²⁹Ĩ gĩcokeriei Jehova ngatho, tondũ nĩ mwega; tondũ ũtugi wake nĩ wa tene na tene.