Psalms 119

¹GŨKENA-RĨ, nĩ arĩa matũũraga na mĩthiĩre mĩkinyanĩru, nĩo arĩa ageri njĩra ya kĩrĩra kĩa Jehova.

²Andũ gũkena no arĩa marũmagia maũira macio make, o arĩa mamũrongoragia na ngoro yothe.

³Nĩo arĩa matekaga waganu o na ũrĩkũ, tiga kũgera mageraga o njĩra ciake.

⁴Wee mwene nĩwatwathire tũiguage mataaro maku, tũkĩmamenyagĩrĩre o na kĩyo.

⁵Na arĩ korũo mĩthiĩre yakwa ĩkĩrĩ mĩkindĩru, ngakĩrũmagĩrĩra mĩtugo o ĩo waathanire!

⁶Hĩndĩ ĩo-rĩ, ndingĩgaconoka, nduĩkĩte atĩ maathani maku mothe nĩmo mbaragĩrĩra.

⁷Nĩ ngatho ndĩrĩgũcokagĩria ndĩ o na ngoro nũngĩrĩru, ngĩĩruta ngĩmenyaga matua maku o ũguo me ma kĩhooto.

⁸Mĩtugo ĩo mĩathane nĩwe, nĩndĩrĩmĩrũmagĩrĩra: nawe-rĩ, ndũgakĩndiganĩrie o biũ!

⁹Mũndũ mwanake-rĩ, nĩ atĩa angĩtũma mĩthiĩre yake ĩtuĩke mĩtheru? nĩ atĩrĩ, nĩ kũmĩmenyagĩrĩra kũringana na ũrĩa uugĩte.

¹⁰Niĩ nĩngũrongoretie na ngoro yakwa yothe: ndũkanakĩreke njange ndigane na maathani maku.

¹¹Uuge waku nĩndĩwĩigĩire thĩinĩ wa ngoro yakwa, ndikanae gũkwĩhia.

¹²Wee Jehova, ũrokĩgathwo! kĩndutage mĩtugo ĩo wathanĩte.

¹³Niĩ-rĩ, nĩ kwĩrana njokaga kwĩrana na mĩromo yakwa matuĩro mothe ma kanua gaku.

¹⁴Njĩra ĩo ya maũira maku ndĩmĩiguagĩra wega gũkĩra ũtonga o ũrĩkũ kana ũrĩkũ.

¹⁵Mataaro maku nĩmo ndĩrĩtaranagia ũhoro wamo, ngĩbaragĩrĩre njĩra ciaku.

¹⁶Mĩtugo ĩo mĩathane nĩwe, noyo ndĩrĩĩkenagĩra nĩ ũndũ wayo; ndingĩriganĩrũo nĩ ũguo uugĩte.

¹⁷Niĩ, ndungata yaku, njĩka wega, ndũũre o muoyo, nĩguo ngĩmenyagĩrĩre ũhoro waku.

¹⁸’Humbũria maitho, ndĩĩonere maũndũ ma magegania ndutĩte kĩrĩra-inĩ gĩaku.

¹⁹Niĩ ndĩ mũgeni gũkũ thĩ: ndũgakĩ’hithe maathani maku.

²⁰Ngoro yakwa nĩ gũthuthĩka ĩthuthĩkĩte nĩ kwĩriragĩria matuĩro maku o mahinda mothe.

²¹Arĩa egereri-rĩ, nĩ gũkũma ũmakũmĩte, magatuĩka athahu, acio a gũcanga matiganĩte na maathani maku.

²²Njaũra kĩnyenyo, na kĩrario, amu ndũire nũmĩtie maũira marĩa maku.

²³Gwata anene maanaikara makĩnjiragĩra, ĩndĩ ndungata ĩno yaku no gũtarania mĩtugo ĩrĩa waathanire.

²⁴Ĩĩ-ni, maũira maku nĩmo mangenagia, magagĩtuĩka nĩmo a’hei kĩrĩra.

²⁵Ngoro yakwa ĩgwataine o na tĩri: kĩrurumũkie muoyo wakwa kũringana na ũrĩa wanoiga.

²⁶Nĩndakuonirie ikĩro ciakwa, nawe ũkĩnjokeria ũhoro: no kĩndutage mĩtugo ĩrĩa waathanire.

²⁷Njiguithia ũrĩa njĩra ĩthiĩte ya mataaro macio maku, ngĩtaranagie maũndũ maku ũrĩa me magegania.

²⁸Ngoro yakwa nĩ gũtwekũka ĩratwekũka nĩ ũndũ wa kĩeha: njĩkĩra hinya kũringana na ũrĩa wanoiga.

²⁹’Thengeria njĩra ya ũrongo-rĩ, na tondũ wa wega waku ĩtĩkĩra kũ’heaga kĩrĩra gĩaku.

³⁰Njĩra ya wĩhokeku nĩyo ’thurĩte; matua maku-rĩ, ndĩmaigĩte o mbere yakwa.

³¹Maũira macio maku ndũire ngwatanĩte o namo: Jehova, ndũkanakĩreke njonoke.

³²Ndĩĩhanyũkaga o na njĩra ya maathani maku, wakorũo nĩwoneire ngoro yakwa mĩaramano.

³³Jehova, nyonereria njĩra ya mĩtugo ĩrĩa mĩathane nĩwe, na niĩ no nũmanĩrĩre nayo o nginya gĩturi.

³⁴Njĩkĩra mbuguĩro, na kĩrĩra gĩaku nĩndĩrĩkĩrũmagia, ĩĩ-ni, ndĩkĩmenyagĩrĩre na ngoro yakwa yothe.

³⁵Tũma ’thiage na njĩra o ĩo ya maathani maku, amu nĩ gũkena ndĩĩkenagĩra nĩ ũndũ wamo.

³⁶Erekeria ngoro yakwa na kũrĩ maũira macio maku, ĩtige kwerekera na harĩ ũhahami.

³⁷Hũgũra maitho makwa matige kwĩrorera maũndũ matarĩ ma ma; rurumũkia muoyo wakwa ngĩthiaga o na njĩra ciaku.

³⁸Ndungata ĩno yaku, mĩrũmĩrie uuge waku, ũrĩa ũkoniĩ ũhoro wa gũgwĩtigĩra.

³⁹Njehereria kĩnyenyo kĩrĩa ndĩĩtigagĩra, nĩ amu matuĩro maku no mega.

⁴⁰Atĩrĩrĩ, mataaro maku nĩmo ndũire ndĩĩriragĩria: kĩrurumũkie muoyo wakwa nĩ ũndũ wa ũthingu waku.

⁴¹Reke mĩtuganĩre yaku, wee Jehova, ĩkĩnginyĩrĩre, nginyĩrĩrũo nĩ ũhonokio waku kũringana o na uuge ũrĩa waku.

⁴²Nĩguo ngagĩkoragwo ndĩ na ũndũ wa gũcokeria ũrĩa ũngĩnjuka, nĩ amu ũhoro ũcio waku noguo ndĩĩhokete.

⁴³Ndũgagĩtunye kanua gakwa kiugo kĩrĩa kĩa ma o gũtunya, amu matua maku nĩmo ndũire ndĩĩrĩgĩrĩire.

⁴⁴Na niĩ nĩngũtũũra ’menyereire kĩrĩra gĩaku o ro hĩndĩ ciothe nginya tene o na tene;

⁴⁵Na ng’endage itarĩ na ũndũ ũkũ’hatĩka, nĩ gũkorũo nongoretie o ũmenyi wa mataaro macio maku.

⁴⁶O na maũira macio maku-rĩ, ndĩrĩheanaga ũhoro wamo mbere-inĩ ya athamaki, na ndiconoke.

⁴⁷Ngũtũũra ndĩĩkenagĩra nĩ ũndũ wa maathani maku, arĩ mo ngĩendete.

⁴⁸O na kwarĩra nĩndĩrĩaragĩra maathani macio maku hĩ, akĩrĩ mo nyenda, na gũikara njikarage ngĩtarania maũndũ ma mĩtugo ĩo wathanĩte.

⁴⁹Ririkanaga ũhoro ũrĩa werire ndungata ĩno yaku, nĩ gũtuĩka wee nĩũtũmĩte ngĩe na wĩrĩgĩrĩro.

⁵⁰Ũndũ ũcio nĩũ’horeragia ndĩ mĩtandiũko-inĩ, nĩ amu uuge waku nĩguo ũrurumũkagia muoyo wakwa.

⁵¹Andũ arĩa egereri, kũndenda mandendete mũno, na ndirĩ ndakĩehũka ngatigana na kĩrĩra gĩaku.

⁵²Ndirikanaga matuĩro maku, Jehova, marĩa ma tene-inĩ, ngenina ihooru.

⁵³Nĩ’nyitagwo nĩ marakara marĩa maakanu nĩ ũndũ wa arĩa aaganu, nĩo arĩa matiganĩte na kĩrĩra gĩaku.

⁵⁴Mĩtugo ĩrĩa mĩathane nĩwe nĩyo ndũire nyinaga ndĩ mũciĩ ũyũ njikaire ndĩ mũgeni.

⁵⁵Nĩndirikanaga rĩĩtwa rĩaku, Jehova, ũtukũ, ngakĩmenyagĩrĩra kĩrĩra gĩaku.

⁵⁶Ũguo-rĩ, nĩguo nyonete, nĩ ũndũ ndũire nũmĩtie mataaro macio maku.

⁵⁷Jehova, nĩwe rũgai rũakwa; wee nĩndĩkĩtie gwĩtuĩra atĩ mohoro marĩa uugĩte nĩmo ngũtũũra nũmĩtie.

⁵⁸Ngũthaithĩte na ngoro yakwa yothe atĩ ũndugage: tũma wega waku ũnginyagĩre kũringana o na uuge ũrĩa waku.

⁵⁹Ndĩĩciragia ũhoro wa mĩthiĩre yakwa, ngagĩcokia makinya makwa na kũrĩ maũira maku arĩ mo.

⁶⁰Nĩ kũhiũha ’hiũhaga, itekũgonderera, ngakĩhiũha o kũmenyerera maathani macio maku.

⁶¹Ndanarigicĩrio nĩ mĩũgũ ya andũ arĩa aaganu, no kĩrĩra gĩaku ndirĩ ndariganĩrũo nĩkĩo.

⁶²Ndĩrĩũkagĩra o ũtukũ gatagatĩ nĩ getha ngũcokerie ngatho nĩ ũndũ wa ũrĩa matua maku me ma kĩhooto.

⁶³Thiritũ yakwa no ya arĩa othe agwĩtigĩri, o acio mamenyagĩrĩra mataaro maku.

⁶⁴Ũtugi waku, Jehova, ũiyũire gũkũ thĩ o kũiyũra: kĩndutage mĩtugo ĩrĩa waathanire.

⁶⁵Ndungata ĩno yaku nĩũmĩĩkĩte o wega, wee Jehova, kũringana o na ũrĩa wanoiga.

⁶⁶Kĩndutage gũkũũrana maũndũ wega o na kũmamenya, nĩ gũkorũo maathani maku niĩ nĩndĩmetĩkĩtie.

⁶⁷Mbere itaanona thĩna nĩndahĩtagia, no rĩu uugo waku nĩndĩũmenyagĩrĩra.

⁶⁸Wee wĩ mwega, na no wega wĩkaga: kĩndutage mĩtugo ĩrĩa waathanire.

⁶⁹Andũ arĩa egereri nĩ gũ’thondekera ma’thondekeire maheni, no niĩ-rĩ, ngũtũũra nũmĩtie mataaro maku na ngoro yakwa yothe.

⁷⁰Ngoro ciao-rĩ, inorete ta ngurunyu; niĩ, nĩ kĩrĩra gĩaku ndĩĩkenagĩra nĩkĩo.

⁷¹Kuonio thĩna kũu nyonetio nĩkũnjagĩrĩire, nĩ getha ndĩkĩĩrute mĩtugo ĩo waathanire.

⁷²Kĩrĩra gĩa kanua gaku nĩ kĩega harĩ niĩ gũkĩra ngiri cia thahabu na betha.

⁷³Moko maku nĩmo maanyũmbire na magĩ’thondeka ũguo ndariĩ: kĩnjĩtĩire mbuguĩro, ndĩkĩĩrute maathani maku.

⁷⁴Arĩa agwĩtigĩri marĩnyonaga magakena, nĩ ũndũ ũhoro waku noguo ndĩĩrĩgĩrĩire.

⁷⁵Jehova, nĩnjũĩ atĩ matuĩro maku nĩ ma kĩhooto, na kũnyonia ũnyonetie thĩna no tondũ wĩ mwĩhokeku.

⁷⁶Ta kĩreke ũtugi waku ũtuĩke nĩguo ũkũ’nyamarũra, kũringana na uuge waku ũrĩa werire ndungata ĩno yaku.

⁷⁷Matha maku ta nĩmanginyĩrĩre, nĩ getha ngĩtũũre, nĩ tondũ kĩrĩra gĩaku nĩkĩo kĩngenagia.

⁷⁸Arĩa egereri-rĩ, maroconoka, amu nĩ ũrongo mainamanĩtie ũhoro wakwa naguo, no niĩ-rĩ, nĩ mataaro maku ndĩrĩtaranagia.

⁷⁹Andũ arĩa agwĩtigĩri nĩmanjerekere, na nĩmegũkĩmenya ũguni wa maũira macio maku.

⁸⁰Tũma ngoro yakwa ĩtuĩke nginyanĩru ũhoro-inĩ wa mĩtugo ĩrĩa mĩathane nĩwe, nĩ getha niĩ ndikanaconoke.

⁸¹Ngoro yakwa nĩ kũũrũo yũrĩtwo nĩ hinya nĩ kwĩrirĩria ũhonokio waku, no niĩ-rĩ’, ũhoro waku noguo ndĩĩrĩgĩrĩire.

⁸²Maitho makwa nĩ kũira mairĩte nĩ ũrĩa ndũire ndoragĩrĩria uuge ũcio waku, o ngĩũragia atĩrĩ, Nĩ rĩ ũgakĩ’nyamarũra?

⁸³Amu ’haanĩte ta mondo ya rũũa ĩrĩa itũire ndogo-inĩ, ĩndĩ ndingĩriganĩrũo nĩ mĩtugo ĩrĩa waathanire.

⁸⁴Matukũ ma ndungata ĩno yaku makĩrĩ maigana? arĩa mathingatanĩte na niĩ, nĩ rĩ ũrĩmakinyĩria ituĩro?

⁸⁵Andũ arĩa egereri nĩmanyenjeire marima ma kũndekia, nĩo arĩa mateerekanagĩrĩria na kĩrĩra gĩaku.

⁸⁶Maathani maku mothe nĩ mehokeku: o no ũrongo ma’thingatagia; wee, ndeithia!

⁸⁷Maratigarĩtie hanini ma’nine njehere gũkũ thĩ, no mataaro maku ndinagĩtigana namo.

⁸⁸Kĩrurumũkie muoyo wakwa kũringana o na ũtugi waku, na niĩ, ũira wa kanua gaku, nĩndĩĩkĩũmenyagĩrĩra.

⁸⁹Gwata o tene na tene, Jehova, ũhoro waku ũtũũraga wĩ mũhandĩku kũu igũrũ.

⁹⁰Wĩhokeku waku nĩ wa njiarũa na njiarũa: thĩ nĩwe ũmĩrũmĩtie, nayo ĩgagĩikara o ho.

⁹¹Gũikarĩte o ũguo kinya ũmũthĩ kũringana na matua marĩa watuire, nĩ tondũ indo ciothe no ndungata ciaku.

⁹²Guca ngenagio nĩ kĩrĩra gĩaku-rĩ, nĩ gũthira ingĩanathira nĩ gũtandiũka.

⁹³Niĩ ndirĩ hĩndĩ ngariganĩrũo nĩ mataaro macio maku, amu nĩmo ũrurumũkĩtie muoyo wakwa namo.

⁹⁴Ndĩ waku niĩ, ’honokia, nĩ gũkorũo nongoretie o mataaro macio maku.

⁹⁵Andũ arĩa aaganu nĩmanjohagĩria nĩguo ma’nine, no niĩ-rĩ, ndĩrĩĩcũranagia o ũhoro wa maũira maku.

⁹⁶Ũndũ o wothe, o na wĩ mũkinyanĩru, nĩnyonete atĩ wĩ na mũhaka, no rĩrĩ, watho waku waramĩte o kwarama.

⁹⁷Kĩrĩra gĩaku-rĩ, kaĩ nĩndĩkĩendete-ĩ! ndindaga ngĩtarania ũhoro wakĩo mũthenya wothe.

⁹⁸Maathani maku matũmaga njũhĩge gũkĩra thũ ciakwa, nĩ gũkorũo maikaraga harĩ niĩ o hingo ciothe.

⁹⁹Ndĩ na ũgerereri kũrĩ arĩa othe anduti ũhoro, amu nĩ maũira maku ndaranagia ũhoro wamo.

¹⁰⁰Ndĩ mũtaũku gũkĩra athuri arĩa akũrũ, nĩ ũndũ ndũire o nũmĩtie mataaro maku.

¹⁰¹Nĩndigagĩrĩria magũrũ makwa matikanakinye njĩra njũru o na ĩrĩkũ, nĩ getha ’menyagĩrĩre ũhoro ũrĩa uugĩte.

¹⁰²Matuĩro maku niĩ ndirĩ ndehũka ngĩtigana namo, nĩ gũkorũo wee mwene nĩwe ũtũire ũndutaga.

¹⁰³Ciugo ciaku, ii karakara yakwa-rĩ, ĩ itikĩrĩ mũcamo mwega! ii kanua gakwa nĩikĩrĩte ũũkĩ!

¹⁰⁴Tondũ wa mataaro maku nĩndĩĩgĩagĩra na mbuguĩro, na tondũ ũcio ngagĩthũũra njĩra o yothe ya ũrongo.

¹⁰⁵Ũhoro waku nĩ tawa ũmũrĩkagĩra makinya makwa, nĩ ũtheri ũrĩa ũnyonagia njĩra.

¹⁰⁶Kwĩhĩta nĩndĩĩhĩtĩte, na ũhoro ũcio ngaũgwatĩria, atĩ matua maku, o ũguo me ma kĩhooto, nĩndĩrĩmamenyagĩrĩra.

¹⁰⁷Gũthĩnio nĩ’thĩnagio mũno: Jehova, rurumũkia muoyo wakwa kũringana o na ũrĩa wanoiga.

¹⁰⁸Ta ĩtĩkĩra mahaki ma kanua gakwa, Jehova, maya ngũruta o na mwĩendero, nawe ũkĩ’menyithagie matua macio maku.

¹⁰⁹Muoyo wakwa ndũire ndĩũgwatĩrĩirie na hĩ, ĩndĩ kĩrĩra gĩaku ndingĩriganĩrũo nĩkĩo.

¹¹⁰Andũ arĩa aaganu nĩmaandegeire mũtego, na ndiigana kũhĩtia njĩra ya mataaro macio maku.

¹¹¹Maũira maku-rĩ, matuĩkĩte igai rĩakwa rĩa nginya tene, amu nĩmo matũmaga ngoro yakwa ĩkenage.

¹¹²Ngoro yakwa ndĩmĩerekeirie gwĩkaga mĩtugo o ĩo wathanĩte, njĩkage o yo nginya tene, ĩĩ-ni, o nginya ithirĩro.

¹¹³Andũ a ngoro igĩrĩ-rĩ, gũthũũra nĩndĩmathũire, no kĩrĩra gĩaku-rĩ, nĩkĩo niĩ nyendete.

¹¹⁴Wee nĩwe wĩhitho wakwa o na ngo yakwa; ũhoro ũrĩa uugĩte noguo ndĩĩrĩgĩrĩire.

¹¹⁵Njehererai, inyuĩ eki ũũru, nĩguo ngĩrũmagie maathani ma Ngai wakwa.

¹¹⁶Wee, ’nyitagĩrĩra, kũringana na uuge ũcio waku, nĩ getha ngĩtũũre; wĩrĩgĩrĩro ũyũ wakwa-rĩ, ndũkanareke ũnjonore.

¹¹⁷Ũndiiragĩrĩre, njikarage ndĩ mũhonoku, ndũũre o nũmbũĩtie mĩtugo ĩrĩa waathanire.

¹¹⁸Arĩa othe macangaga matiganĩte na mĩtugo ĩo yaku-rĩ, wee nĩ gũtemba ũmatembete, amu kwĩhenia kũu mehenagia nakuo nĩ kwa ũrongo.

¹¹⁹Nĩ kũhakũra ũhakũraga acio aaganu a thĩ othe ũkamate ta nganga cia ũturi: tondũ ũcio-rĩ, nĩkĩo ngĩendete maũira marĩa maku.

¹²⁰Mwĩrĩ wakwa nĩũringagwo nĩ thithi nĩ ũndũ wa guoya waku, o na matuĩro macio maku ngakĩmetigagĩra.

¹²¹Niĩ maũndũ marĩa ndũire njĩkaga no marĩa ma kĩhooto, o marĩa ma ũthingu: ndũgakĩndekererie arĩa ma’hinyagĩrĩria.

¹²²Ndungata ĩno yaku, mĩgwatie ithaga rĩa atĩ nĩũrĩmĩĩkaga wega; tiga kũreka nduĩke wa kũhinyagĩrĩrio nĩ andũ acio egereri.

¹²³Maitho makwa nĩ kũira mairĩte nĩ ũrĩa ndũire ndoragĩrĩria ũhonokio waku, o ngĩetagĩrĩra uuge ũrĩa waku wa ũthingu.

¹²⁴Ndungata yaku, mĩĩkage ta ũrĩa ũringaine na ũtugi waku, na ũndutage mĩtugo ĩrĩa mĩathane nĩwe.

¹²⁵Tondũ ndĩ o ndungata yaku-rĩ, njĩkĩra mbuguĩro, nĩ getha ’hotage kũmenya ũguni wa maũira marĩa maku.

¹²⁶Hingo nĩ nginyu Jehova eke ũndũ, nĩ gũkorũo andũ nĩmathahĩtie kĩrĩra gĩaku.

¹²⁷Tondũ ũcio nĩ kwenda niĩ ngĩendete maathani maku o na gũkĩra thahabu, gwata o ĩrĩa njega mũno.

¹²⁸Na nĩkĩo nyonaga atĩ mataaro maku mothe no marũngĩrĩru, na ngathũũra njĩra o yothe ya ũrongo.

¹²⁹Maũira maku-rĩ, me kĩgeganio mũno: nĩkĩo ngoro yakwa ĩmarũmagia.

¹³⁰Mohoro maku magĩtaũrũo nĩmarehage ũtheri; kũũhĩgia nĩmohĩgagia ũrĩa ũtarĩ mũũgĩ.

¹³¹Njathamĩtie kanua o na ngatuumatuuma ngoro, nĩ amu nĩ kwĩrirĩria ndĩĩrirĩirie maathani maku mũno.

¹³²Njerekera, ũnginyĩrie wega waku, ta ũrĩa endi rĩĩtwa rĩaku magĩrĩirũo nĩ gwĩkwo.

¹³³Rũngagĩrĩria makinya makwa na uuge waku, ndikanatuĩke wa gwathagwo nĩ waganu o na ũrĩkũ.

¹³⁴Ngũũra ũndute ũhinyanĩrĩria-inĩ wa andũ, na niĩ mataaro maku ngũtũũra o ndĩmamenyereire.

¹³⁵Tũma ũthiũ waku waragĩre ndungata ĩno yaku, ũkĩndutage mĩtugo ĩo wathanĩte.

¹³⁶Maitho makwa manyũrũrũkagia maĩ maigana ta rũũĩ, nĩ ũndũ andũ matimenyagĩrĩra kĩrĩra gĩaku.

¹³⁷Wee, Jehova, wĩ mũthingu, na matua maku no marũngĩrĩru.

¹³⁸Maũira marĩa maku ũmaathanĩte o na ũthingu na wĩhokeku o ũrĩa mũnene.

¹³⁹Kĩyo kĩrĩa ndĩ nakĩo no kũnjũraga, nĩ ũndũ a-muku akwa nĩmariganĩirũo nĩ mohoro maku.

¹⁴⁰Uuge waku-rĩ, nĩ ũrĩa mũthuranĩre o mũno, na niĩ ndungata yaku nĩ kwenda ndĩkĩwendete.

¹⁴¹Ndĩ wa gĩikaro kĩnyinyi, o na ngaagĩrũo bata, no rĩrĩ, mataaro maku ndingĩriganĩrũo nĩmo.

¹⁴²Ũthingu waku nĩ uthingu wa tene na tene, kĩrĩra gĩaku nakĩo no ũhoro ũrĩa wa ma.

¹⁴³Nĩnginyĩrĩirũo nĩ mĩnyamaro o na ruo rũa ngoro, no ningĩ maathani maku-rĩ, nĩmo mangenagia.

¹⁴⁴Maũira maku no ma ũthingu kinya tene na tene: kĩnjĩkĩre mbuguĩro, na nĩngũtũũra muoyo.

¹⁴⁵Njĩtanĩte na ngoro yakwa yothe; ĩ Jehova, nyamũkĩria: mĩtugo ĩrĩa mĩathane nĩwe, nĩyo ndĩrĩrũmagia.

¹⁴⁶Nĩ na kũrĩ we njĩtanĩte; kĩ’honokie, maũira macio maku ndĩkĩmamenyagĩrĩre.

¹⁴⁷Njũkagĩra tene mũno o gũtaanakĩa, ngakũrĩrĩra, ngaikara o njĩrĩgĩrĩire atĩ nĩũkũhingia ũhoro waku.

¹⁴⁸Maitho makwa makoragwo maramũkĩte ngahĩtaga matuanĩra ma macamu ma ũtukũ, nĩ getha uuge waku ndĩũtaranagie.

¹⁴⁹Ndũkĩigue mũgambo wakwa kũringana o na ũtugi waku; rurumũkia muoyo wakwa, Jehova, kũringana na ũguo matuĩro maku matariĩ.

¹⁵⁰Arĩa marũmagĩrĩra uungumania nĩmara’thengerera: acio-rĩ, kĩrĩra gĩaku nĩmatiganĩte nakĩo hanene.

¹⁵¹Wee, Jehova, nĩwe ũkĩnjikaraga hakuhĩ, namo maathani maku mothe no ma ma.

¹⁵²Kuuma o tene nĩ’menyete nĩ ũndũ wa maũira maku atĩ ũmahandĩte me ma gũtũũra nginya tene na tene.

¹⁵³Ta rora thĩna ũrĩa nyonete, ũgĩ’thare harĩ guo, nĩ amu kĩrĩra gĩaku niĩ ndiriganagĩrũo nĩkĩo.

¹⁵⁴Cira wakwa njirĩrĩra, ũngũũre; rurumũkia muoyo wakwa kũringana o na uuge ũrĩa waku.

¹⁵⁵Arĩa aaganu-rĩ, ũhonokio nĩũmaraihĩrĩirie, tondũ matirongoragia mĩtugo ĩrĩa waathanire.

¹⁵⁶Matha maku, Jehova, nĩ manene mũno: rurumũkia muoyo wakwa kũringana na ũguo matuĩro maku matariĩ.

¹⁵⁷Arĩa mathingatanaga na niĩ nĩ aingĩ, o acio a-muku akwa; na maũira maku-rĩ, ndirĩ ndakĩehũka harĩ mo.

¹⁵⁸Nĩnyonete andũ arĩa mĩgarũka, ngaira ngoro nĩo, nĩ ũndũ uuge waku matimenyagĩrĩra.

¹⁵⁹Mataaro maku ta kĩrore ũrĩa niĩ ndĩmendete; rurumũkia muoyo wakwa, Jehova, kũringana o na ũtugi waku.

¹⁶⁰Ũhoro wothe ũrĩa uugĩte-rĩ, mũigana waguo no ma; itua rĩaku o rĩrĩkũ, o ũguo rĩĩ rĩa kĩhooto, no rĩa tene na tene.

¹⁶¹’Thingatanĩtwo na niĩ nĩ anene hatarĩ na gĩtũmi, no rĩ’, ngoro yakwa ĩtũire ĩguoyoheire o mohoro maku.

¹⁶²Uuge waku-rĩ, ndĩũkenagĩra o ta mũndũ wĩgĩĩrĩire na mataha manene.

¹⁶³Ũrongo ndĩũthũire ngaũnyira; kĩrĩra gĩaku nĩkĩo nyendete.

¹⁶⁴Nĩngũgoocaga o mũthenya maita mũgwanja, nĩ ũndũ wa ũrĩa matuĩro maku me ma kĩhooto.

¹⁶⁵Arĩa menda kĩrĩra gĩaku matũũraga na thayũ mũnene, na gũtirĩ ũndũ monaga ũngĩmahĩnga.

¹⁶⁶Niĩ ndũire njĩrĩgĩrĩire ũhonokio waku, Jehova, na maathani maku nĩmo njĩkaga.

¹⁶⁷Maũira macio maku-rĩ, ngoro yakwa ĩtũire o ĩmamenyereire, na kũmenda ngamenda o mũno.

¹⁶⁸Niĩ mataaro maku, o gwata maũira, nĩmo ’menyagĩrĩra, amu-rĩ, mĩthiĩre yakwa yothe ĩrĩ o mbere yaku.

¹⁶⁹Kayũ gakwa ta reke gathengerere harĩ wee, Jehova; kĩnjĩkĩre mbuguĩro kũringana na ũrĩa woigire.

¹⁷⁰Ũgũthaithi ũyũ wakwa reke ũkinye o harĩ wee; ndeithũra kũringana o na uuge ũcio waku.

¹⁷¹Mĩromo yakwa nĩĩheanage ũhoro wa gĩkũgooca, nĩ ũndũ no ũtũire ũndutaga mĩtugo ĩrĩa waathanire.

¹⁷²Uuge waku, rũrĩmĩ rũakwa kũina nĩrũkĩũinagĩre, tondũ maathani maku mothe no ma ũthingu.

¹⁷³Reke guoko gwaku gũkoragwo kwĩhaarĩirie kũndeithia, amu mataaro maku nĩmo niĩ ndĩĩthurĩire.

¹⁷⁴Ndũire o ndĩĩriragĩria ũhonokio waku, Jehova, ningĩ kĩrĩra gĩaku nokĩo kĩngenagia.

¹⁷⁵Ngoro yakwa ĩrotũũra, nĩguo ĩkũgoocage, namo matuĩro maku nĩmatũũre o mandeithagia.

¹⁷⁶Ndururĩte ta mbũri yũrĩte; gĩcarie ndungata yaku, amu niĩ, ndirĩ hingo ndiganagĩrũo nĩ maathani maku.