Psalms 135

¹GOOCAI Jehova! Goocai rĩĩtwa rĩa Jehova; mũgoocei, inyuĩ ndungata ici cia Jehova,

²Inyuĩ mũrũgamaga thĩinĩ wa nyũmba ya Jehova, o inyuĩ mũrũgamaga nja-inĩ cia nyũmba ĩo ya Ngai witũ.

³Goocai Jehova, amu Jehova nĩ mwega; inĩrai rĩĩtwa rĩake mũkĩrĩkumie, amu rĩĩ gĩkeno.

⁴Nĩ gũkorũo Jehova nĩethurĩire Jakubu atuĩke wake, nĩ Isiraeli aathurire atuĩke inagĩ rĩake kĩũmbe.

⁵Amu niĩ nĩnjũĩ atĩ Jehova nĩ mũnene; atĩ Mwathani witũ atũũgĩrĩte agakĩra ngai ciothe.

⁶Jehova-rĩ, o ũrĩa endaga gwĩka noguo agĩĩkaga, igũrũ, o na gũkũ thĩ, na maria-inĩ marĩa manene, o gwata kũrĩa guothe kũriku mũno.

⁷Nĩwe ũtũmaga matu maambatage makiumaga o ituri-inĩ cia thĩ; nĩwe ũthondekete heni irehanage na mbura; nĩwe ũrutaga rũhuho kũrĩa arũigĩte mũthithũ.

⁸Nowe waringire marigithathi ma Misiri akĩmoraga, ma andũ o na ma nyamũ.

⁹Wee Misiri-rĩ, agĩtũma thĩinĩ waku kũringwo ciama na kuonwo morirũ, kinya o harĩ Firauni, o na harĩ ndungata ciake ciothe.

¹⁰Nowe wahũrire ndũrĩrĩ nyingĩ, na akĩũraga athamaki makarau,

¹¹Sihoni, mũthamaki wa Aamori, na Ogu, mũthamaki wa Bashani, o na mothamaki mothe ma Kanaani;

¹²Akĩheana bũrũri wao ũtuĩke igai, ũgayũo nĩ Isiraeli, kĩrĩndĩ gĩake.

¹³Rĩĩtwa rĩaku, Jehova, nĩ rĩa tene na tene; kũririkanwo gwaku gũkinyagĩrĩra njiaro na njiaro.

¹⁴Amu Jehova nĩagacirĩra kĩrĩndĩ gĩake, nĩakaiguĩra ndungata ciake tha.

¹⁵Mĩhianano ĩrĩa ya ndũrĩrĩ no betha na thahabu, o wĩra wa moko ma andũ.

¹⁶Tũnua ĩĩ natuo, na ndĩaragia; maitho ĩĩ namo, na ndĩonaga;

¹⁷Ĩĩ na matũ, na ndĩiguaga, o na tũnua twayo tũtirĩ na mĩheehũ.

¹⁸Arĩa mamĩthondekaga nĩ kũhaana makahaana o tayo; ĩĩ-ni, o mũndũ o wothe ũmĩĩhokaga.

¹⁹Inyuĩ nyũmba ya Isiraeli-rĩ, mũtikĩgathe Jehova! inyuĩ nyũmba ya Haruni-rĩ, mũtikĩgathe Jehova!

²⁰Inyuĩ nyũmba ya Lawii-rĩ, mũtikĩgathe Jehova! inyuĩ etigĩri Jehova-rĩ, mũtikĩgathe Jehova!

²¹Jehova arogathwo na ngatho ikuuma Zayuni, o we ũtũũraga kũu Jerusalemu. Goocai Jehova!