Psalms 141

¹JEHOVA, nĩwe ndĩrakaĩra; hiũha kũngora; tegera mũgambo wakwa gũtũ ngĩgũkaĩra.

²Reke ihoya rĩakwa rĩambate mbere yaku ta mũtararĩko wa ũbumba, ngĩara hĩ nĩgũgĩtuĩke no ta gũkĩrutwo igongona rĩrĩa rĩa hwaĩ-inĩ.

³Iga mũrangĩri kanua-inĩ gakwa, Jehova, ũkĩnjikaragĩrie mũrango ũyũ wa mĩromo yakwa.

⁴Ndũkanareke ngoro yakwa yerekere na kũrĩ ũndũ mũũru o na ũrĩkũ, ndigagĩtuĩke mwĩki wa maũndũ ma ũmaramari hamwe na andũ arĩa mekaga waganu; rũkũri rũu rũao-rĩ, niĩ ndĩkanagĩtuĩke mũrĩi waruo.

⁵Mũndũ mũthingu o na nĩaninge, kũu nĩ kũnduga aanduga; kũndũithia nĩandũithie, naguo no ta maguta ngũhakwo mũtwe; mũtwe wakwa nĩũtige kũmarega: na niĩ kũhoya no ’hoyage nĩ ũndũ wa ũũru wao.

⁶Rĩrĩa athamaki ao magakorũo matengemanĩtio na mĩena ya rũaro-rĩ, nĩrĩo makaigua ndeto ciakwa, mamenye nĩ njega.

⁷O ta ũrĩa mũndũ aatũraga ngũ agĩcithendũrangagĩra thĩ, no taguo mahĩndĩ maitũ maharaganĩtio mũromo-inĩ wa kwa-ngoma.

⁸Wee Jehova Mwathani-rĩ, nowe maitho makwa marorereirie: nĩwe ndĩĩgiritĩtie harĩ we; tiga gũitũrũra muoyo wakwa thĩ.

⁹Ndiganĩrĩria na mũtego ũrĩa ndegetwo naguo, giria ngagwatwo nĩ mĩũgũ ya acio eki maũndũ ma waganu.

¹⁰Andũ arĩa amaramari nĩmagũage wabu-inĩ ciao ene, niĩ ngĩhĩtũkaga o wega.