Psalms 143

¹NJIGUĨRA ihoya rĩakwa, Jehova; tega gũtũ ngĩgũthaitha; tondũ wa wĩhokeku waku, o na tondũ wa ũthingu waku-rĩ, ũnyamũkĩrie.

²Ndungata ĩno yaku ndũgakĩgwate kũmĩtonyia cira-inĩ, nĩ gũkorũo maitho-inĩ maku gũtirĩ mũndũ wĩ muoyo ũngĩtuĩka mũthingu.

³Nĩ amu-rĩ, thũ nĩ ngoro yakwa ĩthingatanĩte nayo, nĩĩkurumanĩtie muoyo wakwa o tĩri-inĩ; ĩndũũrĩtie kũndũ kũrĩa kwĩ nduma, ta arĩa maakuire o tene.

⁴Na tondũ ũcio roho wakwa nĩ mũhooteku thĩinĩ wakwa, thĩinĩ wakwa ngoro ĩgagĩthethereka.

⁵Njikaraga ngĩririkana matukũ marĩa ma tene, mawĩko maku mothe ngerurumia ũhoro wamo, ngagĩtarania maũndũ marĩa moko maku maaneka.

⁶Nĩndakwarĩra hĩ; ngoro yakwa ĩkũnyoteire o ta bũrũri ũrĩa mũũmũ.

⁷Jehova, hiũha kũnyamũkĩria! roho wakwa nĩũrahoerera: tiga kwĩĩ’hithĩra ũthiũ, ndikae kũhaana ta arĩa a gũtonya irima.

⁸Rũcinĩ roka kũnjiguithia mũgambo waku wa kũnduga, amu nowe ndĩĩhokete; ’menyithia njĩra ĩrĩa njagĩrĩirũo nĩ kũgera, nĩ amu ngoro yakwa ndĩmĩroretie na kũu igũrũ kũrĩ we.

⁹Ndeithũra harĩ thũ ciakwa, Jehova: nĩ kũũra njũrĩire harĩ we ũ’hithe.

¹⁰Ndutaga gwĩka o ta ũrĩa ũkwenda, amu wee nowe Ngai wakwa; reke roho waku mwega ũndongoragie, ngagera bũrũri mwaraganu.

¹¹Jehova, tondũ wa rĩĩtwa rĩaku, kĩrurumũkie muoyo wakwa; tondũ wa ũthingu waku-rĩ, umia ngoro yakwa mĩnyamaro-inĩ.

¹²Ningĩ tondũ wa ũtugi waku ũng’ũrie thũ ciakwa, acio othe manyamaragia ngoro yakwa ũmanine o kũmanina, amu niĩ ndĩ ndungata yaku.