Psalms 144

¹JEHOVA arogathwo, o we ndũmba yakwa ya ihiga, o we ũrĩa ũmenyithagia moko makwa mũrũĩre wa mbaara, ciara ciakwa agakĩiruta ndathano;

²O we mũnjĩki maũndũ ma ũtugi, na nowe kĩhingo gĩakwa kĩa hinya, ningĩ rĩangĩro rĩakwa rĩakĩtwo iraya na igũrũ, ningĩ mũ’hatũri: nĩwe ngo yakwa, nowe ndahagĩra harĩ we; nĩwe ũtũmaga andũ ma’horerere, arĩa me watho-inĩ wakwa.

³Ĩ Jehova, mũndũ akĩrĩ kĩo kĩ, tondũ ũrũmbũyanagia nake? mwana wa mũndũ nĩ kĩ, na tondũ wonaga ta e bata?

⁴Mũndũ-rĩ, atariĩ ta kĩndũ kĩa mana; matukũ make no ta kĩĩruru, ũrĩa kĩhĩtũkaga gĩgathira.

⁵Ĩ Jehova, cuhĩrĩria matu maku, ũikũrũke! hutia irĩma, ciume ndogo.

⁶Henũkia rũheni, ũharaganie thũ, gĩikie mĩguĩ yaku, ũtũme ciomoke.

⁷Tambũrũkia guoko wĩ igũrũ; ’nyitũkia, ũndeithũre ũndute thĩinĩ wa maĩ maya maingĩ, ngiume moko-inĩ ma andũ aya a kũngĩ,

⁸Tũnua twao twaragia ũhoro ũrĩa ũtarĩ guo, nakuo guoko kwao kwa ũrĩo no kũrĩa kwa ũrongo.

⁹Ĩ Ngai, nĩ rũĩmbo rũerũ ngagĩkũinĩra, ngũinĩre ngũgooce na kĩnanda kĩrĩa kĩgetetwo na nga ikũmi.

¹⁰Nĩ Ngai ũheaga athamaki ũhonokio; nĩwe ũnyitũkagia Daudi ndungata yake akamũruta harĩ ũũru wa njomo.

¹¹Kĩ’nyitũkie, ũndeithũre nyume moko-inĩ ma andũ aya a kũngĩ, tũnua twao twaragia ũhoro ũrĩa ũtarĩ guo, nakuo guoko kwao kwa ũrĩo no kũrĩa kwa ũrongo.

¹²Ciana ciitũ cia ihĩĩ, hĩndĩ ya ũnyinyi wacio, nĩituĩke ta mĩtĩ ya mũhandano, ĩrĩa ĩrekũrĩra o wega, nao airĩtu aitũ matuĩke ta itugĩ cia koine iramĩtwo ta iria cia nyũmba ya mũnene;

¹³Makũmbĩ maitũ nĩmaiyũrage, makiumage mĩthithũ mũthemba o mũthemba; nacio mbũri ciitũ iciarage ngiri o na makũmi ma ngiri morĩithio-inĩ maitũ;

¹⁴Ndegwa ciitũ nacio nĩikuuage mĩrigo mĩingĩ; na gũtũũre kwagĩte mũtharĩko, o na kana ndahano, o na mathome-inĩ maitũ kwagage kĩrĩro.

¹⁵Kĩrĩndĩ kĩrĩa gĩtariĩ ũguo-rĩ, kaĩ nĩkĩo gĩa gũkena-ĩ! ĩĩ-ni, gũkena no kĩrĩndĩ kĩrĩa Jehova arĩ we Ngai wakĩo.