Psalms 145

¹NĨNGŨKŨGOOCA ngũtũũgĩrie, Ngai wakwa, wee Mũthamaki, rĩĩtwa rĩaku-rĩ, ndĩrĩgathage nginya mĩndĩ na mĩndĩ.

²Gũtirĩ mũthenya itarĩkũgathaga, ngĩkumagie rĩĩtwa rĩaku nginya tene na tene.

³Kũneneha nĩ Jehova, nĩ wa kũgoocwo mũno; ũnene wake ndũngĩthuuthuurĩka.

⁴Wee maũndũ marĩa waneka-rĩ, rũciaro o rũciaro no rũrahagĩre rũrĩa rũngĩ, rũruumbũrĩre mawĩko macio maku ma ũhoti.

⁵Nĩ gũtarania ndĩĩtaranagia ũtĩĩku waku, ũrĩa ũkaru waguo wĩ riri, o gwata mawĩko maku, ũrĩa me ma magegania.

⁶Maũndũ ma itua-nda marĩa wĩkaga-rĩ, andũ mariugaga ũrĩa me ma hinya; o na niĩ, maũndũ maku no ng’anage ũnene wamo.

⁷Marĩririkanaga ũrĩa wega waku ũingĩhĩte, maheanage ũhoro waguo, ũthingu waku naguo, gũkũngũiya maũkũngũyagie.

⁸Jehova nĩ muuma-andũ, ningĩ nĩ wa matha maingĩ; ndahiũhaga kũrakara, na e na ũtugi mũnene.

⁹Jehova-rĩ, nĩekaga andũ othe wega; indo ciothe iria aathondekire gũtirĩ atarĩ tha nakĩo.

¹⁰Mawĩra macio maku mothe, Jehova, megũtũũra o magũcokagĩria ngatho; nao andũ arĩa maiguaine nawe, kũgatha no matũũre makũgathaga.

¹¹Megũtũũra moigaga ũrĩa ũthamaki waku wĩ riri, o magĩteretaga ũhoro wa ũrĩa wee wĩ na ũhoti;

¹²Maũndũ macio maku ma ũhoti mamamenyithie ciana cia kĩrĩndĩ, o gwata ũthamaki waku, mamere ũrĩa ũkaru waguo wĩ riri.

¹³Ũthamaki waku nĩ ũrĩa wa tene na tene, wathani waku-rĩ, ũtũũraga nginya njiarũa na njiarũa.

¹⁴Jehova atiiragĩrĩra arĩa othe mekwenda kũgũa, na akainamũra arĩa othe mekonotete.

¹⁵Andũ othe nowe maroragĩrĩria, nawe ũkamaheaga irio ciao ihinda rĩacio rĩakinya.

¹⁶Ũkumbatũragia guoko gwaku, kĩrĩa gĩothe kĩĩ muoyo ũgakĩhũnia kĩrĩa gĩkwenda.

¹⁷Jehova ikĩro-inĩ ciake ciothe no mũthingu, maũndũ make mothe amekaga o na ũtugi.

¹⁸Jehova-rĩ, arĩa othe mamũkayagĩra, akoragwo hakuhĩ nao, o arĩa othe mamũkayagĩra nĩ kũmwĩhoka na ma.

¹⁹Andũ arĩa amwĩtigĩri nĩamekagĩra ũrĩa mekwenda; o na nĩaiguaga kĩrĩro kĩao, akamahonokia.

²⁰Jehova nĩamenyagĩrĩra arĩa othe mamwenda, nao arĩa othe aaganu, nĩ kũnina akamanina.

²¹Kanua gakwa gegũtũũra o gakumagia Jehova; nao arĩa othe me mwĩrĩ marogathaga rĩĩtwa rĩake rĩamũre nginya mĩndĩ na mĩndĩ!