Psalms 147

¹GOOCAI Jehova; amu kũgooca Ngai witũ na rũĩmbo nĩ ũndũ mwega; kũmũkumia-rĩ, nĩ ũndũ ũrĩ gĩkeno, ningĩ noguo wagĩrĩire.

²Jehova nĩwe wakaga Jerusalemu; a Isiraeli arĩa aingate, nĩwe ũmacokagĩrĩria.

³Andũ arĩa athuthĩku ngoro, nĩ kũhonia amahonagia, akamoha nguraro ciao.

⁴Ataraga njata o ũrĩa ciigana; ciothe akaitua marĩĩtwa.

⁵Mwathani witũ nĩ mũnene, akagĩa ũhoti mũno; ũmenyi wake ndũrĩ gĩturi.

⁶Andũ arĩa ahoreri, Jehova nĩamanyitagĩrĩra, no andũ arĩa aaganu nĩ kũharũrũkia amaharũrũkagia o nginya tĩri-inĩ.

⁷Kĩinĩrei Jehova mũmũcokerie ngatho, mũinĩre Ngai witũ mũmũgooce na kĩnanda kĩa mũgeto,

⁸O we ũrĩa ũhumbagĩra igũrũ na matu, akĩrĩ o we ũthagathagagĩra thĩ mbura, na nĩwe ũtũmaga nyeki ĩmere irĩma-inĩ.

⁹Nĩwe ũheaga nyamũ irio ciacio, gwata ciana cia mahuru iria ikayaga.

¹⁰We ti atĩ akenagĩra hinya ta wa mbarathi; magũrũ ma mũndũ, ti atĩ nĩangĩigua wega nĩmo.

¹¹Jehova-rĩ, aiguaga wega no ũndũ wa arĩa amwĩtigĩri, o arĩa maikaraga metereire ũtugi wake.

¹²Gooca Jehova, wee Jerusalemu; kĩrahe Ngai waku, wee Zayuni!

¹³Amu mĩgĩĩko ya ihingo ciaku nĩamĩĩkĩrĩte hinya; kũu gwaku thĩinĩ-rĩ, nĩarathimĩte ciana ciaku.

¹⁴Atũmĩte gwaku gũtũũre thayũ o nginya ndere, na nĩakũhũnagia ngano, o ĩrĩa ĩrĩ ũnoru.

¹⁵Arekagia uuge wake ũgakinya gũkũ thĩ; ũhoro wake nĩũhanyũkaga narua mũno.

¹⁶Nĩwe ũtũmaga kuure tharunji, ĩhaana ta guoya mwerũ; nayo mbaa akamĩhura ta mũhu.

¹⁷Mbura yake ya mbembe amĩitaga ta twenyũ twa mũgate: heho ĩo yake-rĩ, nũ ũngĩhota kũmĩĩtiirĩrĩria?

¹⁸Agacokaga kũrekia ũhoro wake agatũma itwekũke; ahurutithagia rũhuho rũake, maĩ magakĩnyũrũrũka.

¹⁹Ũhoro wake nĩ Jakubu oimagĩrĩria, nĩ Isiraeli amenyithagia mĩtugo ĩrĩa aathanĩte, o na matua marĩa atuĩte.

²⁰Ndarĩ eka rũrĩrĩ rũngĩ ta ũguo; matua macio make-rĩ, ndũrĩrĩ itirĩ ciamamenya. Goocai Jehova!