Psalms 149

¹GOOCAI Jehova! Ĩ itĩkai kũinĩra Jehova rũĩmbo rũerũ, mũkĩmũkumĩrie kĩũngano-inĩ kĩa arĩa me ũiguano nake.

²Isiraeli ta nĩakenere ũcio wamũũmbire, ciana cia Zayuni-rĩ, nĩicanjamũkĩre Mũthamaki wacio.

³Nĩmakumie rĩĩtwa rĩake rũĩmbo-inĩ; nĩmaine mamũgooce makĩhũraga tũhembe, na inanda cia mũgeto.

⁴Tondũ Jehova nĩaiguaga wega nĩ kĩrĩndĩ gĩake, andũ arĩa ahoreri-rĩ, nĩamagemagia na igema rĩa ũhonokio.

⁵Acio maiguaine nake, ta nĩmakenage mũno nĩ ũndũ wa riri ũcio, nĩmakũngũyagie o na me morĩrĩ-inĩ mao.

⁶Mĩmero yao nĩyumage ũgooci wa gũtũũgĩria Mũrungu, ningĩ moko mao, o mũndũ o mũndũ, makoragwo me na rũhiũ rũnore mbarĩ cierĩ,

⁷Nĩ ũndũ wa gũkinyĩria ndũrĩrĩ mũrĩhanĩrio, irĩndĩ cia thĩ igĩkinyirio maherithia;

⁸Mohe athamaki a cio na nyororo, na itonga ciacio maciohe na bĩngũ cia kĩgera;

⁹Magĩcikinyĩrie ituĩro rĩrĩa rĩandĩkĩtwo: hau nĩ gĩtĩo kĩheetwo arĩa othe me ũiguano nake. Goocai Jehova!