Psalms 18

¹NĨNGWENDETE mũno, wee Jehova, o wee hinya wakwa.

²Jehova-rĩ, nĩwe rũaro rũakwa rũa ihiga, nĩ kĩhingo gĩakwa kĩa hinya, ona nowe mũ’hatũri; nĩwe Mũrungu wakwa, nĩ ndũmba yakwa ya ihiga, ĩrĩa ndahagĩra, ningĩ ngo yakwa, o naruo rũhĩa rũrĩa rũ’honokagia, o na nowe rĩangĩro rĩakwa rĩakĩtwo handũ haraya na igũrũ.

³Ngayagĩra Jehova, o ũcio wagĩrĩirũo nĩ kũgoocagwo, ngakĩhonokio harĩ thũ ciakwa.

⁴Nderigicĩirio nĩ mĩgeto ya gĩkuũ, nayo mĩiyũro ya wanangi ĩkandua nda.

⁵Mĩgeto ya kwa-ngoma nĩyo yeĩ’thiorereire; ngagwatwo nĩ mĩtego ya gĩkuũ.

⁶Ndĩ na mĩnyamaro ĩo, ngĩitĩka gũkaĩra Jehova, o we Ngai wakwa-rĩ, ngamũrĩrĩra: mũgambo wakwa we nĩaakĩũiguire e thĩinĩ wa hekarũ yake, kũrĩra gwakwa kũu ndarĩrĩire mbere yake gũgĩkinya matũ-inĩ make.

⁷Hĩndĩ ĩo thĩ ĩgĩkĩrika kwerera o ĩgĩtetemaga, gwata itina cia irĩma ikĩenyenya o ikĩereraga, nĩ tondũ we nĩaakanirũo nĩ marakara.

⁸Hagĩkĩambata ndogo yumĩte maniũrũ make, mwaki naguo ũgĩkĩninana o ũkiumaga kanua gake, o nginya guo ũkarĩrĩmbũkia makara.

⁹Agĩcuhĩrĩria matu, agĩikũrũka thĩ, na thĩ ya makinya make no nduma ndumanu haarĩ.

¹⁰Agĩgĩthiĩ akuuĩtwo nĩ kerubi, agakĩrera; ĩĩ-ni, agĩgĩcuhũka na mathagu ma rũhuho.

¹¹Nduma nĩyo aatuĩte wĩhitho wake, hema ya kũmũthiũrũrũkĩria, nduma ya mbura nene, o mo matu marĩa mathimbu ma igũrũ.

¹²Kuuma ũkengi-inĩ ũrĩa warĩ harĩ we, matu-inĩ macio make mathimbu kwahunguraga mbura ya mbembe o na makara me mwaki.

¹³Ningĩ we Jehova akĩrurumia marurumĩ e kũu matu-inĩ, Ũcio-wĩ-Igũrũ-Mũno agĩgĩtumũra mũgambo wake; gũkĩgĩa mbura ya mbembe o na makara me mwaki.

¹⁴Agĩikia mĩguĩ yake, akĩhurunja thũ; nĩ heni nyingĩ aaciikĩirie, agĩciomora.

¹⁵Hĩndĩ ĩo ndĩra cia maria ikĩonekana, gĩtina-inĩ gĩa thĩ gũgĩkĩhumbũrio, nĩ ũndũ wa kũrũithania kũu gwaku, wee Jehova, o ũndũ wa itiiha rĩa mĩrukĩ ya maniũrũ maku.

¹⁶Agĩtambũrũkia guoko arĩ igũrũ, akĩ’nyita, akĩngucia akĩnduta thĩinĩ wa maĩ macio mang’etu.

¹⁷Kũndeithũra nĩaandeithũrire kũrĩ thũ yakwa ĩo ya hinya, akĩnduta kũrĩ acio a’thũũri, nĩ gũkorũo maarĩ nding’ũri kũngĩra.

¹⁸Maa’harũkĩire mũthenya ũrĩa ndonete mũtino, no nĩ Jehova watuĩkire mũndiirĩrĩri.

¹⁹O na nĩaanyumĩririe kũndũ kwariĩ; nĩaagĩ’tharire akĩnduta ũgwati-inĩ, nĩ gũtuĩka nĩekenagĩra nĩ niĩ.

²⁰Jehova-rĩ, aa’thukĩire kũringana na ũthingu wakwa; ta ũguo moko makwa matũire matherete, noguo akĩnjokeirie.

²¹Nĩ amu ndũire nũmĩrĩire o njĩra cia Jehova, ndirĩ ndaaganĩra Ngai wakwa, ngĩĩnyegenyũra harĩ we.

²²Nĩ gũkorũo matuĩro make mothe maaikaraga o mbere yakwa, na ndirĩ hingo ndethengeirie mĩtugo ĩrĩa aathanire.

²³O na harĩ we ndiarĩ ũcuke, ngerĩithagia, ngakĩĩeherera waganu wakwa.

²⁴Tondũ ũcio Jehova nĩa’thukĩire kũringana na ũthingu wakwa, tondũ wa ũguo moko makwa matherete maitho-inĩ make.

²⁵Wee-rĩ, kũrĩ ũrĩa mũigua tha ũrĩĩonanagia wĩ mũigua tha; kũrĩ mũndũ ũrĩa mũkinyanĩru, ũrĩĩonanagia wĩ mũkinyanĩru;

²⁶Kũrĩ ũrĩa mwĩtheria, ũrĩĩonanagia wĩ mũtheru, na kũrĩ ũrĩa mbũra-matũ, ũrĩĩonanagia nawe wĩ mũmũhutatĩri.

²⁷Amu andũ arĩa athĩnie, wee nĩwe ũmahonokagia, no rĩ’, maitho marĩ rũng’athio nĩ kwagia ũmaagithagia bata.

²⁸Amu tawa wakwa wee nĩwe mũnjakĩria; Jehova Ngai wakwa atũmaga nduma yakwa ĩtuĩke ũtheri.

²⁹Amu tondũ waku ndahota gũtharĩkĩra mbũtũ ng’ima; tondũ wa Ngai wakwa ndahota kũrũũga rũirigo.

³⁰Mũrungu-rĩ, njĩra yake nĩ nginyanĩru; uuge wa Jehova nĩ ũrĩa mũthuranĩre; nĩwe ngo ya arĩa othe megiritanagia nake.

³¹Thima-rĩ, nũ ũngĩ Mũrungu thengia Jehova? ningĩ nũ ũngĩ ndũmba ya ihiga thengia o Ngai witũ?

³²Nowe Mũrungu ũrĩa ũ’hotoraga ũhoti, nayo njĩra yakwa agatũma ĩtuĩke nginyanĩru.

³³Magũrũ makwa amekagĩra ihenya ta ma thwariga ya mũgoma, agakĩnginyia kũndũ gwakwa gũtũũgĩru.

³⁴Amenyithagia moko makwa mũrũĩre wa mbaara, icoka ciakwa igakĩhaca ũta wa gĩcango.

³⁵O na ningĩ-rĩ, wee nĩũ’heete ngo ĩrĩa ya ũhonokania waku: guoko gwaku kwa ũrĩo nĩkuo kũndiiragĩrĩra; kwĩnyihia kũu gwaku nĩkuo kũ’nenehetie.

³⁶Nĩ kwaramia ũnjaramĩirie ũthiĩro wa makinya makwa, magũrũ makwa magakĩaga gũtirũka.

³⁷Thũ ciakwa ndĩĩthingatanaga nacio, na ngacikinyĩrĩra, o na ndingĩhũndũka itarĩkĩtie kũninwo biũ.

³⁸Ndĩrĩcihehenjaga ikaremwo nĩ gũũkĩra: nĩ kũgũa irĩkĩgũaga thĩ makinya-inĩ makwa.

³⁹Nĩ gũkorũo wee nĩũ’hotorete ũhoti, ’hotage kũrũa, ũgagĩtũma arĩa maanjũkĩrĩire makurumane harĩ niĩ.

⁴⁰Watũmire thũ ciakwa inyonie ciande, nĩ getha acio a’thũũri ndĩmang’ũrie biũ.

⁴¹Moigire mbu, makĩaga wa kũmahonokia; nginya o magĩkaĩra Jehova, na ndametĩkire.

⁴²Hĩndĩ ĩo ngĩmathuthura o kũmathuthura makĩhaana ta rũkũngũ rũkĩũmbũrũo nĩ rũhuho; ngĩmahakũra ta ndaka ya njĩra-inĩ.

⁴³Wee-rĩ, nĩũ’honoketie harĩ mahiũrania ma kĩrĩndĩ; ũnduĩte mũtongoria wa ndũrĩrĩ: rũruka itaatũire ndĩrũũĩ nĩrũkandungatagĩra.

⁴⁴O rĩrĩa maaigua ngumo yakwa makagwata o kũnjathĩkĩra; andũ acio a kũngĩ nĩ kwĩnyihĩrĩria marĩĩnyihagĩrĩria harĩ niĩ.

⁴⁵Ageni acio no kũhinyara makahinyara, na moke makĩinainaga moimĩte na kũrĩa mehingĩire.

⁴⁶Jehova e muoyo we ndũmba yakwa ya ihiga arogathwo! we Ngai mwene ũhonokio wakwa arotũũra atũũgĩrĩte!

⁴⁷Nowe Mũrungu ũrĩa ũndĩhagĩria, agatoria irĩndĩ ciikare ruungu rũakwa.

⁴⁸Thũ ciakwa nowe ũ’hatũraga harĩ cio; ĩĩ-ni, wee nĩũ’haicagia na igũrũ rĩa arĩa manjũkagĩrĩra; mũndũ ũrĩa mũtoi-rĩ, ũgakĩndeithũraga kũrĩ we.

⁴⁹Tondũ wa ũguo, wee Jehova, no ngũcokagĩrie ngatho o nginya ndũrĩrĩ-inĩ, rĩĩtwa rĩaku ndĩrĩinagĩre nyĩmbo ngĩrĩkumagia.

⁵⁰Ũhonokio nĩ mũnene, ũcio aheaga mũthamaki wake; ũcio wake mũitĩrĩrie-maguta-rĩ, nĩ gũtuga amũtugaga, o we Daudi, gwata mbeũ yake, tene na tene.