Psalms 17

¹Ĩ JEHOVA, ta igua ũhoro ũrĩa wa kĩhooto, ikaya rĩrĩ rĩakwa kĩrĩthikĩrĩrie; tega gũtũ ũigue ngĩkũhoya na mĩromo ĩtarĩ ya ũhinga.

²Ituĩro rĩakwa ta nĩriumĩrio, riumane na harĩ wee; reke maitho maku marore ũhoro ũrĩa mwerekereru.

³Ngoro yakwa nĩũmĩgeretie; wanoka kũng’ethera ũtukũ; kũndoria niũndoranĩtie, ũkona ndirĩ kaũndũ; kanua gakwa ndĩĩtuĩrĩire atĩ gatikahĩtia.

⁴Ha ũhoro wa maũndũ ma andũ, niĩ-rĩ, tondũ wa uuge wa mĩromo yaku, nĩndũire ndĩĩgiragia ikĩro cia arĩa atoi.

⁵Makinya makwa matũire makinyĩrĩirie o ing’aratua ciaku, magũrũ makwa matikĩrĩ maatindirũka.

⁶Niĩ o niĩ ndĩragũkaĩra, nĩ tondũ wee, Mũrungu, nĩũgũkĩnyamũkĩria: nyinamĩrĩria gũtũ, ũigue ndeto ciakwa.

⁷Tũma ũtugi waku wonekane ũrĩ wa kũgegania, o wee ũhonokagia arĩa megiritagia harĩ wee, ũgakĩmahonokia na guoko gwaku kwa ũrĩo kũrĩ arĩa mamokagĩrĩra.

⁸Kĩ’menyagĩrĩre o ta kĩũma kĩa riitho; ’hitha kĩĩgunyĩ-inĩ kĩa mathagu maku,

⁹Ndigakorũo nĩ andũ aaganu arĩa mang’ũmagia, nĩo thũ cia muoyo wakwa, icio indigicĩirie.

¹⁰Ngoro ciao nĩmakibibanĩtie; tũnua twao twaragia o ndeto cia ngũrũ.

¹¹Rĩu nĩmatũũmbagĩrĩra o makinya-inĩ maitũ; matũkarangagĩra maitho nĩguo mone hingo ya gũtũrũnda.

¹²Mwene ũhoro ũcio ahaana ta mũrũthi hĩndĩ ĩrĩa ũcemekeire ndĩa yaguo, ningĩ ta ngatia nyanake ĩrĩa ĩĩgitĩtie harĩa hagitaru.

¹³Arahũka, Jehova, mũtũnge, na kũmũirũra ũkĩmũirũre: hatũra muoyo wakwa na njomo yaku harĩ acio aaganu;

¹⁴’Honokia na guoko gwaku, Jehova, harĩ andũ, harĩ andũ o aya a gũkũ thĩ, arĩa rũgai rũao no rũa muoyo ũyũ tũrĩ, o arĩa wee ũhũnagia nda ciao hũni cia mũthithũ waku: magĩaga ciana makaigania, naguo ũmathi ũrĩa matigaga magagĩtigĩra tũkenge twao.

¹⁵No niĩ-rĩ, nĩndekwo ndĩĩonagĩre ũthiũ waku ndĩ o na ũthingu; ndahindũka-rĩ, njiganagwo nĩ gũkuona o ũrĩa ũtariĩ.