Psalms 16

¹Ĩ MŨRUNGU, ngitagĩra amu nĩ harĩ we ndĩĩgiritĩtie.

²Nĩndĩkĩtie kwĩra Jehova atĩrĩ, Wee nĩwe Mwathani wakwa; ndirĩ na ũndũ mwega tiga ũrĩa uumĩte harĩ wee.

³Nao andũ arĩa atheru a bũrũri, kaĩ nĩo a gwĩkĩrĩrũo-ĩ; nĩo niĩ ngenagĩra o kũmakenera.

⁴Cieha cia andũ arĩa mekũũranĩirie Jehova na ngai ĩngĩ-rĩ, no kũingĩha irĩingĩhaga: magongona mao ma gũitwo thakame, niĩ ndingĩmaruta, o na ndingĩĩkĩra marĩĩtwa mao mĩromo-inĩ yakwa.

⁵Jehova nĩwe rũgai rũrĩa ngaĩte, o na nowe riita rĩa gĩkombe gĩakwa: wee-rĩ, iringa rĩrĩa ningithĩtio, nĩwe ũnyitĩrĩire.

⁶Thanju ciakwa njatũrĩirũo kũndũ kũrĩa gũthaka; ĩĩ-ni, ndũire na igai rĩega mũno.

⁷Nĩ kũgatha ngũgatha Jehova, o we mũ’hei kĩrĩra; o nacio higo ciakwa igakĩndaaraga ũtukũ.

⁸Jehova nĩndĩmwĩigĩire mbere yakwa hingo ciothe, na tondũ e guoko-inĩ gwakwa kwa ũrĩo, ndirĩ hĩndĩ ngenyenyeka.

⁹Hakĩrĩ ũguo-rĩ, ngoro yakwa nĩ gũkena ĩkenaga, ũrĩa guo riri wakwa ũgagĩcanjamũka, mwĩrĩ wakwa naguo no ũtũũre o na mwĩgangaro.

¹⁰Amu wee ndũkarekereria roho wakwa ũũrĩre kwa ngoma; ndũgetĩkĩra ũrĩa waku mũigua-Ngai akĩonane na kuora.

¹¹Ũrĩnyonagia njĩra o ĩrĩa ya muoyo: harĩa wee ũrĩ he na hũni cia gĩkeno; guoko gwaku kwa ũrĩo, nginya tene o na tene, kuumaga maũndũ me mũrĩo.