Psalms 2

¹NDŨRĨRĨ nĩ kĩ gĩtũmĩte ithogonjeke? nĩ ũndũ kĩ irĩndĩ iranogona na ũhoro wa tũhũ?

²Athamaki a thĩ megwĩkinyĩra, anene-rĩ, nĩ kũrĩkanĩra mararĩkanĩra, atĩ mareme Jehova, na mareme ũrĩa wake mũitĩrĩrie-maguta,

³Makoiga, Nĩtũgĩtuei mĩkwa yao, mĩhĩndo yao tũmĩte, tuumwo nĩyo!

⁴Ũrĩa ũikarĩire gĩtĩ matu-inĩ no gũtheka aratheka, we Mwathani-rĩ, nĩ kũmakenerera aramakenerera.

⁵Rĩrĩ rĩngĩ no amaarĩrie na marakara make, amatebebie nĩ ũrĩa arũrĩte:

⁶Niĩ nĩ niĩ ngĩigĩte mũthamaki wakwa kĩrĩma gĩa Zayuni igũrũ, o kĩu gĩakwa kĩamũre.

⁷Nĩngũkiumbũra itua ũrĩa rĩatuirũo: Jehova aanjĩrire atĩrĩ, Wee nĩwe mũriũ wakwa; niĩ ũmũthĩ nĩndagũciara.

⁸’Hoya, na nĩngũkũhe ndũrĩrĩ ituĩke igai rĩaku, nginya o ituri cia thĩ gũtuĩke gwaku kĩũmbe.

⁹Wee no ũciunange na njũgũma ya kĩgera; kũmemenda ũcimemende ta nyũngũ ya mũmĩũmbi.

¹⁰Tondũ ũcio, no kĩũhĩgei, athamaki aya; inyuĩ atua-cira gũkũ thĩ, taarĩkani.

¹¹Tungatĩrai Jehova mũkĩmwĩtigagĩra, na mũcanjamũke o mũkĩinainaga.

¹²Mumunyani mũriũ, ndagakĩrakare mũthirĩre njĩra, thima marakara make maahota gwakana o narua. Gũkena-rĩ, nĩ arĩa othe megiritagia harĩ we.