Psalms 39

¹NDOIGIRE atĩrĩ, Nĩngwĩrĩithia mĩthiĩre-inĩ yakwa, nĩ getha ndikae kwĩhia na rũrĩmĩ; kanua gakwa nĩngũkoha na mũkwa, hĩndĩ ĩrĩa ũrĩa mwaganu e harĩa ndĩ.

²Ngĩgĩikara ta mũndũ ũtangĩhota kwaria, ngekirĩra ki, ngarega kuuga ũndũ, o gwata ũrĩa mwega: naruo ruo rũakwa rũkĩya kwambaamba.

³Ngoro yakwa ĩgĩkĩhĩahĩĩra thĩinĩ wakwa; o hĩndĩ ĩo ndecũranagia, mwaki ũgĩgĩakana, ngĩkĩaria, ngiuga atĩrĩ, na rũrĩmĩ rũakwa:

⁴Ĩ Jehova, ’menyithia ithirĩro rĩakwa, ’menyithia mũigana wa matukũ makwa ũrĩa ũtariĩ; ngĩmenye atĩ ndĩ o wa muoyo mũcacu.

⁵Matukũ makwa anga ndũmaigananĩtie na marata marĩa maratagwo? ũkũrũ wakwa-rĩ, ti ta kĩndũ harĩ wee: mũndũ o wothe, o na rĩrĩa ekinyĩire, no kĩndũ kĩa mana.

⁶Nĩma, mũndũ o na ũrĩkũ, o na tondũ atũũraga acangacangaga, no ta kĩĩruru: mĩhang’o ĩrĩa matũũraga nayo no ya tũhũ; mũndũ etombothagĩrĩra indo, na ndamenyaga nũ ũgaciĩũnganĩria.

⁷Na rĩu, Mwathani-rĩ, ũndũ ũrĩa ngĩetereire ũkĩrĩ ũrĩkũ? kĩĩrĩgĩrĩro gĩakwa-ĩ, kĩrĩ o harĩ wee.

⁸Mehia makwa mothe, kĩndeithũre harĩ mo; ndũkanduithie kĩmene kĩa mũndũ ũrĩa ũtarĩ mbuguĩro.

⁹Ndaikaire itekwaria, ngarega gũtumũra kanua, nĩ ũndũ wee nĩwe wekĩte maũndũ macio.

¹⁰Njehereria itũhũhũ rĩrĩ rĩaku rĩnyume; mbaara ya guoko gwaku-rĩ, nĩndĩraninwo nĩyo.

¹¹Wee waitĩka gũtaara mũndũ, ũkĩmũrũithagia nĩ ũndũ wa waganu wake-rĩ, ũninũkagĩrĩria ũthaka wake ta arĩ kũrĩĩka ũrĩĩkĩte nĩ memenyi: nĩ ma, mũndũ o wothe no kĩndũ kĩa mana.

¹²Igua ihoya rĩakwa, Jehova; ndegera gũtũ ngĩkũrĩrĩra; maithori makwa, tiga kũmakirĩra, amu niĩ gwaku ndĩ mũgeni, ndĩ o mũthamĩri kuo, o ta ũrĩa maithe makwa mothe maatariĩ.

¹³Hũgũka, ũtige kũmbara, nĩguo ngenyakenyũke itanethiĩra njage gũkorũo ho rĩngĩ.