Psalms 38

¹Ĩ JEHOVA, tiga kũndũithia wĩ na mathũgũta, o na kana ũ’herithie ũrĩ o na marũrũ.

²Amu-rĩ, mĩguĩ yaku nĩĩndathĩte o thĩinĩ; guoko gwaku nĩkũra’hũra mũno.

³Nyama cia mwĩrĩ wakwa itirĩ na handũ o na hamwe hega nĩ ũndũ wa mang’ũrĩka maku; na tondũ wa wĩhia wakwa mahĩndĩ makwa matingĩkirĩĩrĩria.

⁴Amu mawaganu makwa nĩ kũ’huba ma’hubĩte nginya o kĩongo; kũnditũhĩra nĩmandĩtũhĩire gũkĩra, o ta mũrigo ũrĩa mũritũ.

⁵Nguraro iria ndĩ nacio inungĩte kũnunga, ikagwata kuora, nĩ ũndũ wa ũũra-matũ wakwa.

⁶Njikaraga o ’hacĩkĩte, ngakunguĩrĩra mũno; mũthenya wothe ’thiaga o ’thitĩte nĩ kĩeha.

⁷Nĩ gũkorũo hũnĩro ciakwa ciiyũire ruo ta rũa mwaki; mwĩrĩ wakwa ndũrĩ na handũ o na hamwe hega.

⁸Nĩ kũrigoya ndigoete, o na gwĩkĩrũo njĩkĩrĩtwo mĩtunda; no kũrarama ndaramaga nĩ ũrĩa ngoro yakwa ĩtangĩkĩte.

⁹Mwathani, wendi wakwa wothe ũrĩ o mbere yaku; gũcaya gwakwa ti kũhitharu harĩ we.

¹⁰Ngoro yakwa gũtuuma nĩĩratuuma mũno, hinya wakwa no gũ’thira ũra’thira: gwata ũtheri wa maitho makwa o naguo nĩũnyumĩte.

¹¹Andũ arĩa anyendi, na arata akwa, marũgamaga methengetie itũhũhũ-inĩ rĩakwa; kinya o andũ aitũ, makerũgamĩra o hanene.

¹²Arĩa nao macaragia muoyo wakwa nĩ mĩtego mandegagĩra; acio mendaga kũnjĩka ũũru magakĩaragia ũhoro o wa kĩũnũhu, mũthenya wothe magatinda o magĩĩciria maũndũ ma ũrĩa-ma.

¹³No niĩ-rĩ, ta ndĩ gĩtaigua gĩtarĩ matũ, ndiiguaga; njikaraga ta kĩrimũ gĩtatumũraga kanua.

¹⁴Ĩĩ-ni, nduĩkĩte ta mũndũ ũtaiguaga, na kanua gake gatangĩona ũndũ wa gũcokia.

¹⁵Nĩ gũkorũo wee, Jehova, nowe ndĩĩrĩgĩrĩire: gũcokia nĩwe ũrĩcokia, o wee Mwathani Ngai wakwa.

¹⁶Nĩ tondũ njugĩte atĩrĩ, Njiguĩra, mamenye gũkangenerera: kũgũrũ gwakwa kwahigũka-rĩ, nĩmeĩ’nenehagĩria.

¹⁷Na tondũ nĩngiriĩ gũtuĩka kĩgitũ, na matuurũo makwa maikaraga harĩ niĩ o hingo ciothe.

¹⁸Tondũ ningĩ, waganu wakwa nĩngũumbũra; mehia makwa ngũgĩcokia mwĩrirũa nĩ ũndũ wamo.

¹⁹No rĩ’, thũ ciakwa ii na kĩyo, o na gũkandĩra nĩ ngandĩru; ningĩ acio ma’thũũrĩte tũhũ, kũingĩha nĩmaingĩhĩte.

²⁰Acio nao arĩhi wega na ũũru nĩ muku mandumĩte, nĩ ũndũ nĩ maũndũ marĩa mega nũmagĩrĩra.

²¹Ĩ Jehova, ndũkandiganĩrie; ĩ Ngai wakwa, tiga kũnjikara haraya.

²²Hiũha kũndeithia, wee Mwathani, o wee ũhonokio wakwa.