Psalms 37

¹TIGAGA gwakanwo nĩ ngoro nĩ ũndũ wa arĩa eki ũũru; arĩa eki maũndũ ma wogogi-rĩ, tigaga kũigua ũiru nĩ ũndũ wao.

²Tondũ ica-ikuhĩ nĩ gũtemwo marĩtemwo ta mahuti, marĩhoha ta ria rĩrĩa iruru, ũrĩa rĩcokaga kũhoha.

³Wĩhokage o Jehova, na wĩkage wega; wĩtũũrĩre o bũrũri-inĩ, na ũthingatage o wĩhokeku.

⁴Nĩrĩo ũngĩtũũra wĩkenagĩra nĩ ũndũ wa Jehova, nake nĩarĩkũheaga maũndũ marĩa ngoro yaku ĩhoyaga.

⁵Ũhoro wa njĩra yaku, rekagĩrĩria Jehova; mwĩhokage o we, nake nĩwe ũrĩgũthondekagĩra.

⁶Ũthingu waku nĩakauumĩria ware ta ũtheri, kĩhooto gĩa cira waku gĩkĩare o ta mũthenya barigici.

⁷Kindagĩria harĩ Jehova, ũkamweterera ũtegũthethũka; tigaga gwakanwo nĩ ngoro nĩ ũndũ wa mũndũ ũrĩa ũgaacĩire njĩra-inĩ yake, atĩ ũhĩahĩe nĩ ũndũ wa mũndũ wĩkithagia maũndũ ma uungumania.

⁸Eheragia marakara, tigana na matũkũya; tigaga gwakanwo nĩ ngoro, amu no gũtũma wĩke ũũru.

⁹Tondũ arĩa mekaga ũũru nĩ kũng’ũrio makang’ũrio, no andũ arĩa metagĩrĩra Jehova, nĩo makagaya thĩ.

¹⁰Amu-rĩ, no ihinda inyinyi, ũrĩa mwaganu acoke aagwo; ũkabara wega gĩikaro kĩu gĩake, na ndangĩkorũo ho.

¹¹No rĩrĩ, andũ arĩa ahoreri nĩo makagaya thĩ, na matũũre mekenagĩra tondũ wa kũingĩhĩrũo nĩ thayũ.

¹²Ũrĩa mwaganu nĩoingumanagĩria ũrĩa mũthingu maũndũ, akĩmũhagaranagĩria magego.

¹³Ũcio-rĩ, Mwathani no gũtheka amũthekagĩrĩra, nĩ gũkorũo nĩoine atĩ mũthenya wake no ũrakinya.

¹⁴Acio aaganu nĩmacomorete rũhiũ, na makageta ũta wao, nĩguo mairũre mũndũ ũrĩa mũthĩnĩki, o ũrĩa mwagi, kũũraga makĩũrage arĩa a mĩthiĩre mĩerekereru.

¹⁵Rũhiũ rũu rũao nĩ ngoro ciao ene rũrĩtheca, namo mota mao no mathuthĩke.

¹⁶Kĩndũ kĩnyinyi kĩĩ na mũndũ mũthingu gĩĩ kĩguni kũrĩ ũingĩ wa ũtonga wĩ na andũ aingĩ aaganu.

¹⁷Tondũ-rĩ, moko ma arĩa aaganu nĩ kũbeberũo makabeberũo, no andũ arĩa athingu, Jehova nĩamatiiragĩrĩra.

¹⁸Andũ arĩa akinyanĩru-rĩ, Jehova nĩarũmbũyagia matinda mao: igai rĩao nĩ rĩa gũgĩtũũra tene na tene.

¹⁹Hingo ya mũtino, o matingĩconorithio; gwata matukũ ma ng’aragu no kũhũna makahũnaga.

²⁰No atĩrĩ, andũ arĩa aaganu nĩ gũtoma magatoma, thũ cia Jehova igatuĩka ta ũgemu wa mawerũ; nĩ kũmicĩrĩra igakĩmicĩrĩra, ithirĩrĩkĩre o ta ndogo.

²¹Ũrĩa mwaganu ohoraga, akaaga gũcoka kũrĩha, ĩndĩ ũrĩa mũthingu ekanaga uuma-andũ, na kũheana akaheana.

²²Nĩ amu arĩa arathime nĩ Jehova nĩo makagaya thĩ, na arĩa arume nĩwe nĩ kũng’ũrio makang’ũrio.

²³Makinya ma mũndũ nĩ Jehova ũmũrũmagĩria, na gũkenera nĩakenagĩra njĩra ĩo yake.

²⁴O na aagũa, ndangĩtengemana o gũtengemana, tondũ Jehova akoragwo amũnyitĩrĩire guoko.

²⁵Ndarĩ mũnyinyi, na rĩu ndĩ mũkũrũ, na ndirĩ ndona mũndũ mũthingu atiganĩirio, kana mbeũ yake ĩkĩhoyanga irio.

²⁶Atindaga agĩĩkana uuma-andũ, o gwata kuohoranĩra, na mbeũ yake nayo no ndathime.

²⁷Wĩthemagie ũũru-inĩ, wĩkage o wega, nĩguo wĩtũũrĩre tene na tene.

²⁸Amu Jehova enda o maũndũ ma kĩhooto, na arĩa marĩ ũiguano nake ndangĩmatiganĩria; o nĩmamenyagĩrĩrũo nginya tene na tene: nayo mbeũ ya arĩa aaganu nĩ kũng’ũrio ĩkang’ũrio.

²⁹Arĩa athingu nĩo makagaya thĩ, na gũtũũra mamĩtũũre o nginya tene.

³⁰Ũrĩa mũthingu-rĩ, kanua gake nĩ ndeto cia ũũgĩ kang’ung’uaga, rũrĩmĩ rũake rũgakĩaragia kĩhooto.

³¹Kĩrĩra kĩa Ngai wake kĩrĩ o ngoro-inĩ yake; makinya make gũtirĩ o na rĩmwe rĩngĩgĩtenderũka.

³²Ũrĩa mwaganu aikaraga agĩcũthagĩrĩria ũrĩa mũthingu, agacaragia ũrĩa angĩmũũragithia.

³³Jehova nake ndangĩmũtiga moko-inĩ make, kana amũtue mwĩhia aagwata gũcirithio.

³⁴Etagĩrĩra Jehova, ũrũmagĩrĩre njĩra yake, nake nĩagagũtũtũgĩria ũgae thĩ: arĩa aaganu makĩng’ũrio-rĩ, wee nĩũkerorera.

³⁵Ndanona mũndũ mwaganu arĩ na itua-nda inene, earamĩtie ta mũtĩ mũruru ũkũrĩire o imerero rĩaguo.

³⁶Ngĩcoka kũhĩtũka-rĩ, Hĩ, githĩ ndakĩrĩ ho! ngĩmũcaria na ndaigana kuoneka.

³⁷Bara wega mũndũ ũrĩa mũkinyanĩru ũrĩa mũrũngĩrĩru-r��, ũkĩmuone: nĩ amu ũcio, ũhoro wake wa thutha nĩ thayũ.

³⁸Ha ũhoro wa arĩa aremi, nĩ kũninwo makaninanĩrio hamwe; arĩa aaganu-rĩ, thutha wao nĩ kwagio ũkaagithio.

³⁹Arĩa athingu, ũhonokio wao uumaga kwĩ Jehova; nĩwe kĩirigo kĩao kĩa hinya hĩndĩ ya mĩnyamaro.

⁴⁰Jehova nĩ kũmateithia amateithagia, akamahatũra; amateithũraga harĩ arĩa aaganu, agakĩmahonokia, nĩ ũndũ we nĩwe marahĩire.