Psalms 36

¹ŨREMI wa mũndũ ũrĩa mwaganu nĩ wa kũndĩkĩria ngoro-inĩ yakwa atĩrĩ, atĩ maitho-inĩ make hatirĩ na ũhoro wa gwĩtigĩra Ngai.

²Amu maitho-inĩ make mwene ecaaraga akĩĩĩraga atĩ waganu wake ndũkamenyeka nĩguo ũgĩthũũrũo.

³Ndeto cia kanua gake no ũmaramari na ũrĩa-ma; nĩatigĩte gũtuĩka mũndũ mũũgĩ wa gwĩkaga wega.

⁴Arĩ ũrĩrĩ no maũndũ ma waganu arathugunda; eigĩte njĩra-inĩ ĩrĩa ĩtarĩ njega; ũũru-rĩ, ndaũthũũraga.

⁵Ũtugi waku, Jehova, ũkinyĩte o igũrũ igũrũ, wĩhokeki waku ũgagĩkinya o kũrĩa matu-inĩ.

⁶Ũthingu waku no ta irĩma cia Mũrungu; matuĩro maku marikĩte ta kũrĩa kũriku iria-inĩ: wee Jehova-rĩ, nĩwe ũhonokagia andũ o gwata nyamũ.

⁷Ĩ na kaĩ ũtugi waku, Ngai, nĩ kĩndũ kĩrĩ bata-ĩ! ciana cia kĩrĩndĩ igakĩĩgiritagia kĩĩgunyĩ-inĩ kĩa mathagu maku.

⁸Irĩhũnagio ũnoru wa nyũmba yaku, ihũnage o wega; na rũũĩ rũaku rũa ikeno nĩruo ũrĩtũmaga inyuĩre.

⁹Nĩ gũkorũo itherũkĩro rĩa muoyo nĩ harĩ wee rĩrĩ; tũrĩ ũtheri-inĩ waku nĩho tũrĩĩonagĩra ũtheri.

¹⁰Andũ acio makũũĩ-rĩ, no gĩtũme ũtugi waku ũrũmanagĩrie harĩ o; ũthingu waku naguo reke ũtũũre harĩ acio erekereru ngoro.

¹¹Ndũkanareke ’hatĩkwo nĩ kũgũrũ kũrĩa kwa mwĩono; tiga gũkareka nindũrũo nĩ guoko kwa arĩa amaramari.

¹²Acio eki maũndũ ma waganu, rĩu nĩ agũu o hau; gũikanio nĩ aikanie, na matikahota gũũkĩra.