Psalms 35

¹Ĩ JEHOVA, gariũrana na arĩa maragariũrana na niĩ; rũa na acio marandũithia.

²Oya ngo, o gwata gĩthuma, warahũke ũkĩndeithie.

³Ruta itimũ o narĩo, ũtĩmĩrie acio ma’thingatĩte: kĩĩre ngoro yakwa atĩrĩ, Nĩ niĩ ũhonokio waku!

⁴Acio macaragia muoyo wakwa-rĩ, nĩmaconoke, manyararĩke; nĩmacokio na thutha, magegeare, acio ma’thugundagĩra ũndũ mũũru.

⁵Nĩmatuĩke ta mũũngũ mũũmbũre nĩ rũhuho, nake mũraika wa Jehova o akĩmatindĩkaga.

⁶Njĩra yao ĩrogĩa nduma, na ĩtendere, nake mũraika wa Jehova athingatanĩte o nao.

⁷Nĩ ũndũ nĩmanyembeire wabu ya kũndega, na hatarĩ gĩtũmi; magakĩenjera muoyo wakwa irima, o ũguo, tũhũ.

⁸Mwĩki ũguo arokorererũo nĩ mwanangĩko na aterĩgĩrĩire; wabu ĩo embanĩire ĩromũgwatia we mwene: arogũa thĩinĩ wayo aanangĩke arĩ we.

⁹Nayo ngoro yakwa hĩndĩ ĩo no ĩcanjamũkĩre Jehova, ĩgĩkenyũke o gũkenyũka nĩ ũndũ wa ũhonokio waku.

¹⁰Mahĩndĩ makwa mothe no makiuge atĩrĩ, Jehova, nũ ũkĩhaana tawe, o wee ũteithũraga mũndũ ũrĩa mũthĩnĩku harĩ ũrĩa ũmũkĩrĩtie hinya, ĩĩ-ni, ũrĩa mũthĩnĩki, o ũrĩa mwagi, ũgakĩmũteithũra harĩ ũrĩa ũmũburaga?

¹¹Nĩgũũkĩrĩte aiganĩrĩri igenyo; makanjũria maũndũ marĩa itekũmenya.

¹²Wega wakwa mandĩhaga na ũũru, ngoro yakwa igagĩtigwo na ihooru.

¹³No niĩ hakwa-rĩ, maarũara, ndehumbaga o ikũnia, o na ngethĩnia ngoro nĩ kwĩima irio: mahoya macio makwa no manjokerere o gĩthũri-inĩ gĩakwa mwene.

¹⁴Ndaikaraga ta arĩ mũrata wakwa kana mũrũ wa maitũ ũrũarĩte; ngethikĩra o ’thitĩte nĩ kĩeha, ta mũndũ ũrarĩra akuĩrĩirũo nĩ nyina.

¹⁵No niĩ-rĩ, ndahĩngwo, o no gũkena maakenire, magĩkĩĩũngania hamwe: ndonganĩirũo nĩ andũ a njerũa, arĩa itoĩ; magĩikara o makĩndarũraga mategũtigithĩria.

¹⁶O ta ũrĩa gwĩkagwo nĩ ithagathago iria ithekererithagia andũ maruga-inĩ, o nao nĩ kũhagaria maa’hagaranagĩria magego.

¹⁷Jehova, nĩ ihinda rĩigana atĩa ũgũikara o wĩroreire? ndũgĩtunyũkithie muoyo wakwa wanangi-inĩ wao; ũyũ wakwa wa mũmwe-rĩ, ũkĩmũhonokie harĩ ngatia icio.

¹⁸Nĩ ngatho ndĩĩgĩgũcokagĩria ndĩ kĩũngano-inĩ kĩrĩa kĩnene; kũu gwĩ kĩrĩndĩ kĩingĩ nĩkuo ndĩrĩgũkumagĩria.

¹⁹Acio metuĩte thũ ciakwa tũhũ, ndũkareke makangenerera; acio magĩ’thũũrĩte hatarĩ gĩtũmi-rĩ, tiga kũreka moinanĩre maitho.

²⁰Amu o ti ndeto cia thayũ maaragia, no nĩ maũndũ ma maheni mathugundaga ma kũigĩrĩra andũ a bũrũri arĩa ahoreri.

²¹Ĩĩ-ni, o na nĩmanjathamagĩria tũnua twao, makoiga, Haiya! haiya! ũrĩa tũretereire-rĩ, maitho maitũ anga matiakĩona!

²²Ũhoro ũcio, wee Jehova, nĩwĩoneire; tiga gũgĩkira: Mwathani, tiga kũnjikara haraya.

²³Ĩribaribe, ũhindũke, ũnduĩre na kĩhooto; cira wakwa ũkĩnjirĩrĩre, wee Ngai wakwa, Mwathani wakwa.

²⁴Jehova Ngai wakwa-rĩ, nduĩra kũringana na ũthingu waku; ndũgakĩreke mangenerere.

²⁵Nĩmatige kũrekwo moige atĩrĩ, na ngoro ciao, Haiya! ũguo noguo tũrendaga! nĩmagirio moige atĩrĩ, Tũrĩ kũmũmerũkia!

²⁶Andũ acio mangenagĩrĩra rĩrĩa ndona ũũru-rĩ, nĩmaconoke, magegeare othe hamwe; acio meĩ’nenehagĩria-rĩ, marohubwo nĩ njono, o gwata ũnyararĩku.

²⁷Nao arĩa a kũigua wega ũthingu wakwa wahandĩka, nĩmakũngũiye, magĩe na gĩkeno; nĩmatũũre moigaga atĩrĩ, Jehova aroneneha, ũcio wĩkenagĩra nĩ ndungata yake gũikara ĩhoroheirũo!

²⁸Na niĩ rũrĩmĩ rũakwa no rũng’ung’uage ndeto cia ũthingu waku, ndindage mũthenya wothe ngĩtereta o cia gũkũgooca.