Psalms 34

¹NĨNDĨRĨGATHAGA Jehova o hingo ciothe; kanua gakwa kũmũkumia gatirĩ hĩndĩ gatarĩmũkumagia.

²Jehova nowe ngoro yakwa ĩrĩĩrahagĩra: arĩa ahoreri marĩiguaga ũguo magakena.

³Ĩ kĩgoocei Jehova mũmũnenehie mwĩ hamwe na niĩ, tũtũũgĩrie rĩĩtwa rĩake tũrĩ o ũndũ ũmwe.

⁴Ndarongoririe Jehova, nake akĩnyamũkĩria, agĩkĩndeithũra harĩ maũndũ mothe marĩa maanjiguithĩtie guoya.

⁵Andũ aya-rĩ, nĩmaamũrorereirie, makĩarĩrũo nĩ ũtheri, nao mothiũ mao matirĩ hingo makahumbwo nĩ thoni.

⁶Mũthĩnĩki ũyũ aakaire, nake Jehova akĩmũigua, akĩmũhonokia mĩnyamaro-inĩ yake yothe.

⁷Arĩa etigĩri-Jehova-rĩ, mũraika wake nĩamaakagĩrĩra iraaro ciake hĩrĩrĩ, agakĩmatharaga ũgwati-inĩ.

⁸Ĩ camai muone atĩ Jehova nĩ mwega: gũkena-rĩ, nĩ mũndũ ũrĩa ũrahĩire harĩ we.

⁹Ĩtigagĩrei Jehova, inyuĩ andũ ake atheru, thima arĩa amwĩtigĩri matirĩ kĩndũ maagaga.

¹⁰Mĩrũthi mĩĩthĩ, yo nĩĩthĩnangaga, ĩgakĩhũta, no arĩa marongoragia Jehova matirĩ kĩndũ kĩega mangĩaga.

¹¹Ũkai, ariũ akwa, mũthikĩrĩrie ũrĩa nguuga: nĩngũmũruta mũgĩe na gwĩtigĩra Jehova.

¹²Nĩ mũndũ ũrĩkũ wĩriragĩria gũtũũra muoyo, akenda gũkĩingĩhia matukũ, eonagĩre maũndũ mega?

¹³Atĩrĩ, kĩrigagĩrĩrie rũrĩmĩ rũaku rũtikanoige ũũru; giragia mĩromo yaku ndĩkanakĩarie ũrongo.

¹⁴Wĩthemagie ũũru-inĩ, wĩkage o wega; caragia thayũ, o nginya kũũthingata.

¹⁵Maitho ma Jehova merekeire na kũrĩ arĩa athingu, na matũ make magategerũo kĩrĩro kĩao.

¹⁶Arĩa mekaga ũũru-rĩ, ũthiũ wa Jehova nĩ kũmomĩra ũmomĩire, atĩ ang’ũrie rĩĩtwa rĩao rĩtikaririkanwo gũkũ thĩ.

¹⁷Arĩa athingu maakaire, nake Jehova akĩigua, akĩmateithũra mĩnyamaro-inĩ yao yothe.

¹⁸Jehova nĩakoragwo hakuhĩ na arĩa athuthĩku ngoro; acio maherete roho-rĩ, agakĩmahonokia.

¹⁹Maũũru no maingĩ makoraga ũrĩa mũthingu, ĩndĩ, Jehova nĩamũteithũraga harĩ mo mothe.

²⁰Kũmenyerera nĩamenyagĩrĩra mahĩndĩ make mothe: gũtirĩ o na rĩmwe rĩngiunĩka.

²¹Arĩa aaganu-rĩ, ũũru nĩ kũũraga ũkamoraga; andũ arĩa mathũũraga ũcio mũthingu nĩmagatuwo ehia.

²²Jehova nĩ gũkũũra akũũraga ngoro cia ndungata ciake: arĩa marahagĩra harĩ we gũtirĩ ũngĩtuwo mwĩhia.