Psalms 33

¹INYUĨ athingu, kũngũiyai nĩ ũndũ mwĩ na Jehova; andũ arĩa arũngĩrĩru nĩo maagĩrĩirũo nĩ kũmũkumia.

²Cokeriani Jehova ngatho na kĩnanda kĩa mũgeto; mũmũinĩre mũkĩmũgoocaga na kĩnanda kĩrĩa kĩgete na nga ikũmi.

³Itĩkai kũmũinĩra rũĩmbo rũerũ; iniai inanda na ũgereki, mũgĩkenũkaga o gũkenũka.

⁴Nĩ ũndũ-rĩ, uuge wa Jehova nĩ mwerekereru; wĩra wake wothe nĩ wa kwĩhokwo.

⁵Ũndũ ũrĩa enda nĩ ũthingu, o na kĩhooto: thĩ ĩiyũire ũtugi wa Jehova o kũiyũra.

⁶Kũũmbwo kwa igũrũ, nĩ uuge wa Jehova warĩũmbire; mwaranĩrie wa ũingĩ wothe wakuo ũgĩkĩũmbwo nĩ mũheeho wa kanua gake.

⁷Maĩ ma iria rĩrĩa inene amonganĩtie magaikara ta kĩhumbu; marĩa ma kũrĩa kũriku mũno amekĩrĩte nyũmba cia kũmaiga mũthithũ.

⁸Andũ a thĩ yothe nĩmagĩĩtigĩre Jehova; mabũrũri mothe arĩa mamatũũraga nĩmamũguoyohere.

⁹Amu nĩwe woigire, na gũgĩtuĩka guo; nĩwe waathanire, ũndũ ũcio ũgĩkĩgĩa, ũkĩrũma.

¹⁰Jehova-rĩ, ũhoro ũrĩa wĩtaarĩtwo nĩ ndũrĩrĩ, nĩaũthatagia; mathugunda ma irĩndĩ, agatũma matuĩke ma mana.

¹¹Ũndũ ũrĩa Jehova etaarĩte arĩ we ũtũũraga wĩ mũrũmu nginya mĩndĩ na mĩndĩ, mathugunda ma ngoro yake-rĩ, magagĩkinyĩrĩra njiaro na njiaro.

¹²Gũkena, nĩ rũrĩrĩ rũrĩa Jehova arĩ we Ngai waruo, o kĩo kĩrĩndĩ kĩrĩa ethurĩire gĩgatuĩka igai rĩake.

¹³Jehova e kũrĩa igũrũ nĩacũthagĩrĩria; kũbara nĩabaraga ciana cia kĩrĩndĩ o ciothe:

¹⁴E kũu gĩtũũro-inĩ gĩake nĩ kũng’etia ang’etagia andũ othe arĩa matũũraga thĩ;

¹⁵O we mũũmbi wa ngoro ciao othe, namo mawĩra mao mothe agakĩmacucura.

¹⁶Mũthamaki gũtirĩ ũngĩhonoka nĩ kũgĩa na ita nyingĩ; njamba ndĩngĩĩteithũra nĩ ũrĩa ĩĩ ngandĩru mũno.

¹⁷Ha ũhoro wa kũhonokia mũndũ, mbarathi-rĩ, nĩ ya tũhũ, o na ndĩrĩ mũndũ ĩngĩguna nĩ hinya wayo kũneneha.

¹⁸Atĩrĩrĩi, riitho rĩa Jehova rĩerekeire harĩ arĩa amwĩtigĩri, rĩgakĩerekera harĩ andũ arĩa merĩgagĩrĩra o ũtugi wake;

¹⁹Nĩguo ateithũrage maroho mao gĩkuũ-inĩ, gwata hingo ya ng’aragu amaikaragie na muoyo.

²⁰Maroho maitũ-rĩ, makirĩrĩirie metereire o Jehova: we nowe ũteithio witũ o na ngo iitũ.

²¹Nĩ amu ngoro ciitũ igũtũũra o ikenaga nĩwe, nĩ ũndũ rĩĩtwa rĩake rĩamũre nĩrĩo twĩhokete.

²²Ũtugi waku, Jehova, tũma ũikarage na ithuĩ, kũringana o na ũrĩa tũtũire tũkwĩrĩgĩrĩire.