Psalms 5

¹JEHOVA, tegera ciugo ciakwa gũtũ, mwĩheeho ũyũ wakwa, ũkĩũigue wega.

²Thikĩrĩria mũgambo wakwa ngĩkũrĩrĩra, Mũthamaki wakwa, o wee Ngai wakwa, nĩ gũkorũo nowe ndĩrahoya.

³Ĩ Jehova, ngũkũiguithia mũgambo wakwa o rũcinĩ; ũhoro wakwa ngũgũtandaĩria kĩroko, na njikare o ndorereirie.

⁴Amu wee ndũrĩ Mũrungu wa gũkenera ũmaramari; mũndũ mũũru-rĩ, ndangĩtuĩka mũgeni waku.

⁵Arĩa erahi matingĩĩkinyĩra maitho-inĩ maku; andũ othe arĩa eki maũndũ maaganu, wee nĩũmathũire.

⁶Arĩa maaragia mathara, nĩ kũnina ũmaninaga: mũndũ nake wa thakame na ũrĩa-ma, Jehova amũnyirĩte o kũmũnyira.

⁷No niĩ-rĩ, tondũ wa ũtugi waku mũingĩ, ngũgĩtonya nyũmba yaku; ngũkũinamĩrĩra ngwĩtigĩrĩte, ndorete hekarũ yaku theru.

⁸Ndongoria, Jehova, na ũthingu waku, nĩ ũndũ wa arĩa maikaraga manjoheirie; njaraganĩria njĩra yaku mbere ya ũthiũ wakwa.

⁹Amu tũnua twao tũtirĩ na ũhoro ũngĩĩhokeka; ngoro ciao thĩinĩ no maũndũ ma ũthũkia kũrĩ; mĩmero yao nĩ ta marima iceng’ũ ma gũthikanwo; nĩmĩ ciao nĩ kũgathima macigathimaga.

¹⁰Ngai, kĩmatue ehia; nĩmagũithio nĩ maũndũ mao, macio metaaraga o ene: maikanie mehere, tondũ wa ũrĩa mehia mao maingĩhĩte; amu nĩmagĩkũng’athiĩrie.

¹¹Nao andũ othe arĩa megiritagia harĩ we, nĩmakene; nĩmakũngũyagie hingo ciothe, tondũ nĩũmagitagĩra; acio endi rĩĩtwa rĩaku, o nĩmatũũre macanjamũkĩte nĩ ũndũ waku.

¹²Amu mũndũ mũthingu-rĩ, nĩ kũrathima ũrĩmũrathimaga; wee Jehova, ũgũtũũra ũmũirigĩire na wega waku o ta arĩ ngo.