Psalms 55

¹NGAI, tega matũ, ũigue ihoya rĩakwa; ndũgakĩĩhithe ngĩgũthaitha.

²Thikĩrĩria ũhoro wakwa, na ũnjokerie: nĩ kũũrũra njũrũraga o ngĩng’ung’uaga na ngĩcayaga,

³Nĩ ũndũ wa mũgambo wa thũ, tondũ o wa gũkĩgũmĩrũo nĩ arĩa imaramari: nĩ amu nĩ kũngũithĩria mangũithagĩria maũndũ maaganu, gũ’thũkĩra magagĩ’thũkĩra nĩ ũrĩa mandakarĩire.

⁴Ngoro yakwa nĩ nduure mũno thĩinĩ wakwa, na ngagũĩrũo nĩ matebeba ta ma gĩkuũ.

⁵Ndĩ mũtonye nĩ guoya o na gĩtetemo, ngakĩhubĩkanĩrio nĩ kĩmako kĩnene.

⁶Ndĩrakiuga atĩrĩ, Na arĩ korũo ndĩ na mathagu ta ndutura! nĩ kũgũrũka ingĩĩgũrũkĩra, ’thiĩ ngahurũke.

⁷Hĩndĩ ĩo ndethiĩra, ’thiĩ ndurure; ndathiĩ gũikara o werũ-inĩ.

⁸Nĩ kũhanyũka ingĩhanyũka nginye harĩa he na mwĩgitio, ngegitie rũhuho rũrũ rũnene, nyume kĩhuhũkanio-inĩ.

⁹Mwathani, manine; rigithania nĩmĩ ciao: amu gũkũ itũũra rĩrĩ nyonete o maũndũ ma ũtoi na mahiũrania.

¹⁰Mũthenya o na ũtukũ marĩthiũrũrũkaga marĩ igũrũ rĩa rũirigo rũarĩo: kuo thĩinĩ gũikaraga waganu o na kĩũnũhu.

¹¹Gatagatĩ-inĩ karĩo no maũndũ ma ũmaramari kũrĩ; mathome-inĩ marĩo gũtirĩ hingo kwagaga ũhahanyi o na ũrĩa-ma.

¹²Amu ningĩ ũrĩa ũ’hereketie ti thũ; hĩndĩ ĩo ndahota gwĩtiirĩrĩria: ningĩ ti ũrĩa mũ’thũũri wĩĩ’neneheirie; ũcio nĩ kwĩhitha ingĩmwĩhithĩte:

¹³No rĩ’, nĩwe, wee, mũndũ wa riika rĩakwa, o wee mũthiritũ wakwa, mũrata wakwa ũrĩa tũmenyaine mũno.

¹⁴Nĩtũragĩaga ndundu njega nawe, na tũgacangania hamwe na kĩrĩndĩ nyũmba-inĩ ya Ngai.

¹⁵Marohobanĩrio nĩ gĩkuũ, maroikũrũka kwa ngoma marĩ o muoyo! amu ũũru nĩguo wĩ gĩtũũro-inĩ kĩao, gwata o thĩinĩ wa ngoro ciao.

¹⁶No niĩ-rĩ, no ngayagĩre Ngai, nake we Jehova nĩarĩkĩ’honokia.

¹⁷Hwaĩ-inĩ, na rũcinĩ, o na ningĩ mĩaraho, no ’ng’ung’uage o ngĩcayaga; nake mũgambo wakwa nĩekũũigua.

¹⁸Rĩu nĩakũũrĩte muoyo wakwa njikare na thayũ itegũthengererũo nĩ mũndũ, amu nĩ aingĩ, acio mangoretie mbaara.

¹⁹Kũigua-rĩ, Mũrungu nĩekũigua, na nĩekũmaherithia, o we ũrĩa ũtũire kuuma o tene wa tene, akĩherithie acio matagarũkagwo nĩ maũndũ, magakĩaga gwĩtigĩra Ngai.

²⁰Mũndũ ũcio-rĩ, arĩa maratũirie thayũ nake, nĩo atwarĩrĩire moko; nĩathahĩtie kĩrĩko gĩake.

²¹Kanua gake kaanyorokete ta ngorono, na ngoro yake no mbaara; ciugo ciake ciororoete o ta maguta, nacio no ta hiũ njomore.

²²Rekereria mũrigo waku na harĩ Jehova; nĩwe ũrĩgũtiiragĩrĩra; ndarĩ hingo angĩreka ũrĩa mũthingu enyenyeke.

²³No andũ acio-rĩ, wee, Ngai, ũkamaharũrũkia o nginya thĩinĩ wa irima rĩrĩa rĩa ũũrĩro; andũ a thakame na ũrĩa-ma, matikaigananĩria matukũ mao: no niĩ hakwa-rĩ, wee nowe ngũtũũra ndĩĩhokete.