Psalms 56

¹NGINYĨRIA wega waku, Ngai amu andũ mekwenda kũ’merũkia; matindaga mũthenya wothe o mangũrĩire marĩ o na mbaara.

²Acio manjoheirie nĩ gũtinda matindaga mũthenya wothe makĩendaga kũ’merũkia: amu acio manyonagia mbaara o metũũgĩirie nĩ aingĩ.

³Mũthenya ũrĩa ngwĩtigĩra, niĩ nowe ndĩrĩĩhokaga.

⁴Tondũ wa hinya wa Ngai, no ngoocage uuge wake: ũrĩa ndĩĩhokete nĩ Ngai, gwĩtigĩra ndingĩĩtigĩra; arĩa a mwĩrĩ wa nyama-rĩ, nĩ ũndũ ũrĩkũ mangĩkĩnjĩka?

⁵Mũthenya wothe o matindaga o makĩhotomia ndeto ciakwa; meciria mao mothe no niĩ meciragĩria manjĩke ũũru.

⁶Nĩ kũũngana monganaga, magaikara megitanĩtie, magacũthagĩrĩria mĩkinyĩre yakwa, no ũndũ wa ũrĩa matũire metereire mandute muoyo.

⁷Ĩ nĩmakĩhonoke nĩ waganu ũcio wao? wee, Ngai, ũmomore irĩndĩ cia thĩ na marakara maku.

⁸Morũra makwa wee nawe nĩũmagerete: maithori makwa ta kĩmekĩre cuba-inĩ waku; githĩ to maandĩke mbuku-inĩ yaku?

⁹Mũthenya ũrĩa ingĩkaya-rĩ, thũ ciakwa no ikĩhũndũke: nĩnjũĩ ũguo, nĩ ũndũ Ngai arĩ mwena wakwa.

¹⁰Tondũ wa hinya wa Ngai, no ngoocage uuge wake; tondũ o wa hinya wa Jehova, uuge wake no ndĩũgoocage.

¹¹Ũrĩa ndĩĩhokete nĩ Ngai, gwĩtigĩra ndingĩĩtigĩra; andũ-rĩ, nĩ atĩa mangĩkĩhota kũnjĩka?

¹²Mĩĩhĩtwa ĩrĩa ndĩĩhĩtĩte harĩ wee, Ngai, ndĩ o nayo; no ngũrutĩre igongona cia gũcokia ngatho,

¹³Nĩ ũndũ wee nĩũteithũrĩte muoyo wakwa harĩ gĩkuũ; anga wee towe ũgirĩtie magũrũ makwa mahigũrũo? nĩ getha ng’endage ndĩ mbere-inĩ ya Ngai ngĩonaga ũtheri ũrĩa wonagwo nĩ arĩa me muoyo.