Psalms 57

¹NGINYĨRIA wega waku, Ngai, nginyĩria wega waku, amu nĩ harĩ wee ngoro yakwa ĩĩgiritĩtie; ĩĩ-ni, kĩĩgunyĩ-inĩ kĩa mathagu maku nĩho ngũkĩĩgiritia o nginya kĩanangĩko gĩkĩ kĩrĩkie kũhĩtũka.

²Ngũkaĩra Ngai o Ũrĩa-wĩ-Igũrũ-Mũno, o we Mũrungu ũrĩa ũ’hingagĩria maũndũ.

³Gũtũmana no atũmane arĩ igũrũ, a’honokie, rĩrĩa ngũmenwo nĩ ũrĩa ũkwenda kũ’meria; ũtugi wake, na ũhoro wake wa ma, nĩmo egũgĩtũma.

⁴Ngoro yakwa ĩrĩ o gatagatĩ ka mĩrũthi; no nginya ngome harĩ arĩa maakanĩte mwaki, ciana cia kĩrĩndĩ, arĩa magego mao arĩ o matimũ na mĩguĩ, nacio nĩmĩ ciao no njomo iria njũgĩ.

⁵Tũũgĩra, Ngai, kũhĩtũka o igũrũ rĩa igũrũ; riri waku nĩũgĩe igũrũ rĩa mabũrũri mothe!

⁶Nĩ kwamba maambĩire nyarĩrĩ ciakwa wabu ya gũtegana; ngoro yakwa ĩgagĩĩthikĩra: menjete irima mbere yakwa rĩa kũndekia; o ene magakĩgũa o rĩo thĩinĩ.

⁷Ĩ Ngai, ngoro yakwa nĩĩĩkindĩire, ngoro yakwa no ĩĩkindĩire: nĩ kũina ngũina, ĩĩ-ni, ngũgooce na rũĩmbo.

⁸Ũkĩra, riri wakwa; gĩũkĩre, kĩnanda kĩa mũgeto, o gwata kĩrĩa kĩgambi mũno: nĩngwarahũkania na ruoro rũgĩtema.

⁹Ngũgũcokeria ngatho, Mwathani, irĩndĩ-inĩ cia thĩ; ngũgĩkũinĩra ngũkumĩrie ndũrĩrĩ-inĩ.

¹⁰Nĩ gũkorũo ũtugi waku nĩ mũnene, ũgakinya o igũrũ igũrũ, ningĩ ũhoro waku wa ma ũgagĩkinya o kũrĩa matu-inĩ.

¹¹Gĩtũũgĩre, Ngai, kũhĩtũka o igũrũ rĩa igũrũ; riri waku nĩũgĩe igũrũ rĩa mabũrũri mothe!