Psalms 58

¹MAŨNDŨ ma kĩhooto nomo mũkiugaga, athamaki aya? cira no mũtuaga o ũrĩa kwerekereire, ciana ici cia kĩrĩndĩ?

²Aca, tiguo; ngoro cianyu thĩinĩ no ũũru mwĩkithagia; ũtoi wa moko manyu nĩguo mũgeragĩra bũrũri.

³Andũ arĩa aaganu matuĩkaga orũri o kuuma maaciarũo; o moima nda norĩo magwataga kũũngũtũka, makaaragia mathara.

⁴Ũrũrũ wao nĩ ta ũrũrũ wa nyamũ-ya-thĩ; matariĩ ta nduĩra gĩtaigua, ĩrĩa ĩthingĩte matũ;

⁵Ĩrĩa ĩtangĩthikĩrĩria mĩgambo ya arĩa macithuuthagĩra, o na maatuĩka nĩmaramĩthuuthĩra na wara mũnene.

⁶Ng’ethũranga magego mao, Ngai, macio me tũnua twao; makamburu ma mĩrũthi ĩo mĩĩthĩ, ũkĩmakũũre, wee Jehova!

⁷Andũ acio nĩmahũĩrĩrĩre mathire, ta maĩ ma kĩguũ, ũrĩa maikũrũkaga na ihenya: mũndũ aagereka mĩguĩ yake-rĩ, nĩĩikare ta ĩrengetwo mĩthia.

⁸Marotuĩka ta ndinoho, ũrĩa ĩtwekaga o igĩthiaga: marohaana ta kĩhuno kĩhunĩtwo nĩ mũndũ mũka, kĩrĩa gĩtonete riũa!

⁹O nyũngũ cianyu itanaigua mwaki wa mĩigua-rĩ, we no amĩhurutithĩrĩrie rũhuho rũnene, ĩrĩa mĩigũ na ĩrĩa mĩakanu o ũndũ ũmwe.

¹⁰Ũrĩa mũthingu nĩ gũkena agakena akĩona irĩhanĩria rĩu: acio aaganu, agathambia makinya make thakame-inĩ yao.

¹¹Nao andũ makiuge atĩrĩ, Ti-itherũ ngerenwa no kũrĩ ya mũndũ mũthingu: ti-itherũ nĩkũrĩ Ngai ũtuanagĩra gũkũ thĩ!