Psalms 59

¹Ĩ NGAI wakwa, ndeithũra harĩ thũ ciakwa: njiga handũ haraya na igũrũ nyume harĩ arĩa manjũkĩrĩire.

²Ndeithũra harĩ acio eki maũndũ ma waganu, ũkĩ’honokie harĩ andũ acio a thakame.

³Thima-rĩ, nĩ kuoheria moheirie muoyo wakwa; nĩ hĩndĩ andũ arĩa me hinya meĩnyũnganĩirie; na ti tondũ wa rĩĩhia rĩakwa, Jehova, kana ũndũ wa ĩhĩtia ndĩ narĩo.

⁴O na hatarĩ waganu njĩkĩte-rĩ, nĩ kũhanyũka mahanyũkaga magaikara methagathagĩte: kĩramũke ũndangĩre, ũkĩĩonere.

⁵Wee, o wee Jehova Ngai mwene mbũtũ cia ita, wee Ngai wa Isiraeli-rĩ, ũkĩra ũũke ũkaherithie ndũrĩrĩ ciothe: mĩgarũka ĩo mĩaganu, o ĩrĩkũ, menya ũmĩkinyĩrie wega waku.

⁶Hwaĩ-inĩ macokaga, makararamaga ta ngui, magĩthiũrũrũkangaga itũũra.

⁷Onei, nĩ kwerũrũka merũrũkaga na tũnua twao; mĩromo-inĩ yao nĩ ta kwĩ na hiũ cia njora: Nũ ũngĩkĩigua? nĩ ũguo moragia.

⁸Ĩndĩ wee, Jehova, no gũtheka ũramathekerera; ndũrĩrĩ ciothe nĩ gũcikenerera ũracikenerera.

⁹Wee, hinya wakwa-rĩ, nowe ndĩrĩroragĩrĩria, nĩ gũkorũo Ngai nĩwe rĩangĩro rĩakwa rĩake iraya na igũrũ.

¹⁰Ngai wakwa nĩekũndũnga na ũtugi wake; we Ngai niarĩnjĩtĩkĩria nyone ũrĩa ngwenda harĩ acio manjohagĩria.

¹¹Kũũraga ndũkamorage-ĩ, andũ akwa matikae gũkariganĩrũo: gũtororia matororagie na ũhoti waku, kinya ũmacokie na thĩ, wee Mwathani, o wee ngo iitũ.

¹²Tondũ wa wĩhia wa tũnua twao, ciugo cia mĩromo yao-rĩ, tũma magwatio nĩ mwĩtũũgĩrio o ũcio me naguo, tondũ wa maũndũ macio moigaga ma kũrumana na ningĩ ma maheni.

¹³Manine nĩ ũrĩa ũmarũrĩire, manine, matigacoke gũkorũo ho, kũmenyeke atĩ Ngai no aathanaga kwa Jakubu, kũmenyithanio ũguo nginya o ituri cia thĩ.

¹⁴Acio-rĩ, hwaĩ-inĩ nĩ gũcoka macokaga, makararamaga ta ngui, magĩthiũrũrũkangaga itũũra.

¹⁵O no gũcuracura macuracuraga magĩcaragia kĩrĩa mangĩrĩa, na maaga kũhũna makaraara ũtukũ wothe o makĩhaara.

¹⁶Ĩndĩ niĩ-rĩ, no nyinagĩre hinya waku; ĩĩ-ni, no ndokage gũkũngũiya ũtugi waku o rũcinĩ: tondũ wee nĩũtuĩkĩte rĩangĩro rĩakwa iraya na igũrũ, ũgagĩtuĩka ũũrĩro harĩ niĩ mũthenya ũrĩa ndanyamarĩka.

¹⁷Wee, hinya wakwa-rĩ, nĩwe ndĩrĩinagĩra ngĩkũgoocaga: nĩ gũkorũo Ngai nĩwe rĩangĩro rĩakwa rĩake iraya na igũrũ, o we Ngai mũnjĩki maũndũ ma ũtugi.