Psalms 60

¹Ĩ NGAI, nĩ gũte ũtũteete; kũmomora nĩũtũmomorete; ũrarĩ na marakara: ĩtĩkĩra gũtũcokereria.

²Nĩũtũmĩte bũrũri ũthingithe; gwatũra nĩũwatũrĩte: thondeka mĩatũka yaguo, amu nĩũrenyenya.

³Kĩrĩndĩ gĩaku nĩũkĩonetie maũndũ maritũ; ũtũnyuithĩtie ndibei ĩrĩa ya gũtũgũgania.

⁴Andũ arĩa agwĩtigĩri nĩũmaheete kĩbebero, no getha more monana na arathi na ũta.

⁵Nĩguo endwa aku matharũo ũũru-inĩ-rĩ, honokania na guoko gwaku kwa ũrĩo, ũgĩtwĩtĩke.

⁶Ngai nĩaarĩtie arĩ na ũtheru wake, akoiga, Ngũkena, ngenũrũrũke! bũrũri wa Shekemu nĩngũwatũrania, o na ’thimanĩre gĩtuamba gĩa Sukothu.

⁷Gileadi nĩ gwakwa, o na Manase no gwakwa; Efiraimu nakuo nĩkuo mwĩgito wa mũtwe wakwa; Juda nĩ mũthĩgi wakwa wa ũthamaki.

⁸Moabi nĩ rũgĩo rũakwa rũa gwĩthambĩra; na harĩ Edomu-rĩ, nĩ kĩratũ gĩakwa ndĩrĩikagia: wee Filisitia, kayũrũrũka nĩ ũndũ wakwa.

⁹Nũ ũkũnginyia thĩinĩ wa gĩtũũro kĩrĩa kĩirige? nũ ũngĩkĩndwara o kũu Edomu?

¹⁰Githĩ tiwe, wee Ngai, o wee ũtũteete, nacio ita ciitũ, Ngai, ũkaaga gũũkanĩria nacio?

¹¹Gĩtũteithie harĩ ũrĩa wĩ muku na ithuĩ, thima nĩ tũhũ kwĩhoka ũhonokania wa andũ.

¹²Tondũ wa hinya wa Ngai no twĩke maũndũ ma ũcamba, amu nĩwe ũgaterema a-muku aitũ.