Psalms 61

¹KAYŨ gakwa ta kaigue, Ngai; thikĩrĩria ihoya rĩakwa.

²Ngũgũkaĩra ndĩ o mũthia-inĩ wa thĩ, rĩrĩa ngoro yakwa ĩthirĩtwo nĩ hinya: ndwara ũnginyie ndũmba ya ihiga igũrũ, ĩrĩa ĩndaihĩire makĩria.

³Nĩ tondũ nĩwe ũtũire ũrĩ irahĩro rĩakwa, rũtara rũraya, rũa hinya, rũa kũũrĩra thũ.

⁴Nĩndekwo ndũũre ndĩ mũgeni wa hema-inĩ yaku nginya tene; nĩngĩrekwo ndahĩre o wĩhitho-inĩ wa mathagu maku.

⁵Amu wee, Ngai, nĩũiguĩte mĩĩhĩtwa yakwa; nĩ kũngaĩra ũngaĩire igai rĩa arĩa etigĩri rĩĩtwa rĩaku.

⁶Matukũ ma mũthamaki nĩũkũmonganĩrĩria na mangĩ; mĩaka yake ikaigana ta ya njiaro nyingĩ.

⁷Egũtũũra aikarĩire gĩtĩ kĩa ũnene mbere-inĩ ya Ngai o nginya tene: athĩrĩra ũtugi o na ũhoro ũrĩa wa ma mamũrindagĩrĩre.

⁸Na nĩndĩĩkĩinagĩra rĩĩtwa rĩaku ngĩrĩkumagia mĩndĩ na mĩndĩ, ’hingagie mĩĩhĩtwa yakwa mũthenya o mũthenya.