Psalms 62

¹NGORO yakwa nĩ gũkindĩria ĩkindĩirie ĩgeterera o Ngai: ũhonokio wakwa uumaga na kũrĩ we.

²Nowe wiki ndũmba yakwa ya ihiga, na nowe ũhonokio wakwa; nowe rĩangĩro rĩakwa rĩake iraya na igũrũ; ndingĩenyenyeka mũno.

³Nĩ hingo ĩigana atĩa mũgũtũũra mũharũkagĩra mũndũ, atĩ mũmũũrage, inyuothe, ta arĩ rũthingo rũerereku, kana ta rũirigo rũrĩa rũendete kũmomoka?

⁴Maciranagĩra no getha mamũikanie mamũthengie ũnene-inĩ wake; ũrongo nĩguo makenagĩra: kanua-rĩ, nĩmarathimanaga nako, na ngoro thĩinĩ no kũgeka maragekana.

⁵Ngoro yakwa-ĩ, kindagĩria, ũgetagĩrĩra o Ngai, amu gĩeterero gĩakwa no kũrĩ we kĩrĩ.

⁶Nowe wiki ndũmba yakwa ya ihiga, na nowe ũhonokio wakwa; nowe rĩangĩro rĩakwa rĩake iraya na igũrũ kwenyenyeka ndingĩkĩenyenyeka.

⁷Harĩ Ngai noho ũhonokio wakwa o na riri wakwa irĩ; ndũmba ya ihiga ĩrĩa nyene hinya wakwa, o yo irahĩro rĩakwa, no harĩ Ngai.

⁸Inyuĩ kĩrĩndĩ kĩa bũrũri-rĩ, wĩhokagei o we mahinda mothe; mũitũrũragĩrei ngoro cianyu: mũrahĩro witũ nĩ Ngai.

⁹Andũ o ũguo-rĩ, no kĩndũ gĩa tũhũ arĩa nao marĩ igweta no kĩndũ kĩa maheni: magĩthimwo na ratiri no kuoerereka mekuoerereka; othe hamwe nĩ ahũthũ o na gũkĩra tũhũ.

¹⁰Mũtigakĩĩhoke ũhinyanĩrĩria, na mũtigatuĩke a kwĩrahĩra ũtunyani; ũtonga ũngĩkorũo nĩũrathegea, menyai mũkaũiga ngoro.

¹¹Ngai nĩoigire ũhoro ũyũ rĩmwe, o na nĩ kerĩ niĩ ndanaigua ũguo, atĩ hinya no wa Ngai;

¹²Na atĩ ũtugi o naguo no waku, Mwathani: amu nĩwe ũrĩhaga mũndũ o mũndũ kũringana ma maũndũ marĩa ekĩte.