Psalms 69

¹NGAI, ’honokia, nĩ amu maĩ marĩ kũndonya o nginya ngoro thĩinĩ.

²Nĩ gũtonyerera ndĩratonyerera mũtondo-inĩ, o harĩa hatangĩrũgamĩka; nginyĩte maĩ-inĩ o harĩa hariku, ngahubĩkanio nĩ mũiyũro wamo.

³Kũnoga nĩ’nogete nĩ gũkaya, mũmero ũkang’ara; maitho makwa nĩ maagu hinya nĩ gũgĩtanya Ngai wakwa.

⁴Arĩa ma’thũire hatarĩ gĩtũmi-rĩ, nĩ aingĩ kũrĩ njuĩrĩ ciakwa cia mũtwe; acio mendaga kũ’nina metuĩte thũ ciakwa tũhũ nĩ andũ akandĩru: ndacokithirio indo itaatunyanĩte.

⁵Ĩ Ngai, wee nĩwe ũũĩ ũrimũ wakwa wa ũũra-matũ; ũgeri wakwa wa ngero wee ndũngĩũhithĩka.

⁶Andũ arĩa agwetereri, ndũgakĩreke maconoke nĩ ũndũ wakwa, wee Mwathani Jehova mwene mbũtũ cia ita; acio makũrongoragia-rĩ, ndũgakĩreke manyararĩke nĩ ũndũ wakwa, wee Ngai wa Isiraeli.

⁷Nĩ gũkorũo nduĩkĩte kĩmene no ũndũ waku, wee, ũthiũ wakwa ũgakĩhumbwo nĩ thoni.

⁸Nduĩkĩte ta mũgeni harĩ andũ aitũ, ngakĩhaana ta mũrũrĩrĩ harĩ ariũ a maitũ.

⁹Tondũ nĩ kĩyo kĩrĩa ndĩ nakĩo kĩa nyũmba yaku kĩndĩĩte, nacio inyenyo cia arĩa makũnyenyaga igũĩte o na niĩ.

¹⁰Rĩrĩa ndarĩrire, na ngĩĩnyerekia ngoro nĩ kwĩhinga kũrĩa, ũndũ ũcio ũgĩgĩtuĩka o wa kũ’nyenyithia.

¹¹Ndatua ikũnia nguo yakwa ya kwĩhumba, ngĩtuĩka ta rũgano harĩ o.

¹²Andũ arĩa ndinda-thome nĩ ũhoro wakwa materetaga, na nĩ niĩ rũĩmbo rũa anyui a njohi.

¹³No atĩrĩ, niĩ, nowe Jehova ndĩrahoya, hingo ya gwĩtĩkĩrĩka; wee Ngai, tondũ wa ũrĩa ũtugi waku wĩ mũingĩ-rĩ, njokeria kũringana o na wĩhokeki wa ũhonokania waku.

¹⁴Ndangĩra, ũndute mũtondo-inĩ, ndũgakĩreke ndonyerere: nĩndeithũrũo harĩ arĩa ma’thũire, nĩndutwo maĩ-inĩ maya mariku.

¹⁵Mũiyũro wa maĩ-rĩ, ndũkareke ũ’hubĩkanie; tiga kũreka ’merũkio nĩ ndia ici: irima rĩa gĩkuũ-rĩ, ndũgakĩreke rĩ’hingĩrĩrie thĩinĩ wa kanua karĩo.

¹⁶Jehova, nyamũkĩria; amu ũtugi waku nĩ mwega mũno: wĩĩ’hũgũrĩre ũkĩnjerekere kũringana na ũrĩa matha maku maingĩhĩte.

¹⁷Ũgĩtige kwĩhithĩra ndungata ĩno yaku ũthiũ; amu ndĩ mũnyamarĩku kĩnyamũkĩrie o narua.

¹⁸Thengerera harĩ ngoro yakwa, ũmĩkũũre: tondũ wa thũ ciakwa-rĩ, kĩnjohorithie.

¹⁹Wee nĩwe ũũĩ ũrĩa ’nyenyagwo, na ũrĩa njonoretwo, o na ũrĩa ’nyararĩkĩte: arĩa othe me muku na niĩ makĩrĩ o mbere yaku.

²⁰Kũnyenyũo nĩgũ’thuthĩte ngoro, ngakĩigua ũũru o mũno: ndĩretereire nyone wa kũnjakaĩra, na kũraaga; ngĩone a kũ’nyamarũra, na ndione.

²¹Gĩa-kũrĩa kĩrĩa mara’heire nĩ mũtĩ mũrũrũ, ningĩ ndanyota, nĩ ndibei ngagatu mara’heire ’nyue.

²²Metha ĩrĩa ĩrĩ mbere yao, ya kũrĩĩra, ĩrotuĩka mũtego, hĩndĩ ĩo maikaire na thayũ ĩgĩtuĩke kĩndũ gĩa kũmagwatia!

²³Maitho mao marogĩa nduma, matige kuona; na ũtũme njuthĩ ciao itũũre o itetemaga!

²⁴Maitũrũrĩre mang’ũrĩka maku; nĩmakinyĩrĩrũo nĩ marakara maku marĩa mahiũ!

²⁵Harĩa maakĩte harokira ihooru; hema ciao irokĩaga wa kũitũũra!

²⁶Nĩ gũkorũo ũrĩa wee ũringĩte nĩmamũthingataga, arĩa wee ũguraritie, ũhoro wa ruo rũao nĩguo materetaga.

²⁷Onganĩrĩria waganu wao na waganu ũngĩ, matikanagĩtonye ũthingu-inĩ waku,

²⁸Nĩmathario mbuku-inĩ ya arĩa a gũtũũra muoyo, matige gũkĩandĩkanĩrio na arĩa athingu.

²⁹No niĩ-rĩ, ndĩ mũthĩnĩku, na ngarĩo nĩ kĩeha, reka ũhonokio waku, Ngai, ũnjige handũ haraya na igũrũ.

³⁰Rĩĩtwa rĩa Ngai ngũrĩkumia na rũĩmbo, kũnenehia ndĩkĩmũnenehie na ngatho iria ngũmũcokeria.

³¹Naguo ũndũ ũcio no gũkenia Jehova kũrĩ kũmũhe ndegwa, kana gĩcaũ kĩĩ na hĩa na mahũngũ.

³²Andũ arĩa ahoreri mona uguo, no makene: inyuĩ mũrongoretie Ngai-rĩ, ngoro cianyu ta nĩiriũke!

³³Amu andũ arĩa aagi, Jehova no amaiguaga; arĩa ake ohe ndangĩmaagĩra bata.

³⁴Igũrũ na thĩ ta nĩimũgooce, gwata maria marĩa manene, na kĩrĩa o gĩothe gĩthiangaga thĩinĩ wamo.

³⁵Amu Ngai nĩakahonokia Zayuni, na aake matũũra ma Juda; nao andũ nĩ gũikara magaikara kuo, gũtuĩkĩte kwao kĩũmbe.

³⁶Na kũgaya nĩ mbeũ ya ndungata ciake igakũgaya; arĩa menda rĩĩtwa rĩake, nĩo magatũũraga kuo.